ESERA 3 - Embimbiliya - Bíblia Sagrada em Umbundu

¹ Eci va Isareli va kala vovaimbo avo olosãi epandu oco osãi yepanduvali va liongoluila ko Yerusalãi lutima umuamue.

² Oco Yesiua, omõla a Yocadake, lovitunda vikuavo, kuenda Seruvavele, omõla a Sialitiyele, la vamue vakuepata liavo, va katuka, va tunga utala wa Suku ya va Isareli okuti va lumbilako ovilumba vioku pia elisi ndeci ca sonehiwa vocihandeleko ca Mose, ukuenje wa Suku.

³ Va tumbika utala kocitumãlo cawo momo va kala lusumba womanu vakualofeka via va ñuala. Omẽle loñolosi va lumbilako Suku ovilumba vioku pia elisi.

⁴ Va lingavo efendelo liofesta yolosinge ndeci ca sonehiwa. Eteke keteke va eca eca ovilumba vioku pia elisi ndeci ca popiwa, eci leteke liaco, eci leteke liaco.

⁵ Kuenda vali va lumba lumba ovilumba vioku pia elisi viomẽle loñolosi levi viokumolẽha kuosãi levi violofesta viosi vi kola ku Yehova. Kua kala vali olombanjaile viocisola va vi lumba ku Suku, omunu omunu lutima waye.

⁶ Tunde keteke liatete liosãi yepanduvali va fetika oku lumbila Suku ovilumba vioku pia elisi. Puãi lopo ociseveto conjo ya Suku ka ca sevetiwile.

⁷ Oco va eca olombongo kovatungi vupange wovawe lowu wavaya. Va ecavo okulia lovinyua lulela ku va Sidono la va Turo okuti va nena ketapu lia Yopa olo-cedro vio ko Levanone, ndomoko ya va ihiwa la Kuro, Soma yo ko Persia.

⁸ Kosãi yavali yulima wavali tunde apa va pitilila ponjo ya Suku ko Yerusalãi, oco Seruvavele, omõla a Sialatiyele, la Yesiua, omõla a Yocadake, kumosi lovitunda vikuavo, la va Lewi, lava vosi va tunda kumandekua ha veya ko Yerusalãi, va fetika oku tunga onjo ya Suku. Va nola va Lewi, tunde kuava va kuete akuĩ avali kalima toke kovaso, okuti ovo muẽle va songola upange woku tunga onjo ya Yehova.

⁹ Oco Yesiua kumosi lomãla vaye valume la vakuepata liaye, kuenda Kadimiyele lomãla vaye valume, haivo omãla valume va Yuda, kumosi lomãla valume va Henadada, kuenda omãla valume va va Lewi la vakuepata liaco, ovo va tava oku songuila olondingupange vionjo ya Suku.

¹⁰ Eci vakuakutunga va seveta ociseveto conjo ya Yehova oco ovitunda via walisiwa uwalo wavio wutunda, kuenda va Lewi, ovo vakuepata lia Asafe, veya ocipepi. Ovitunda viambata olombeta. Ya Lewi vambata olosimbalu. Veya oku sivaya Suku ndondaka ya Daviti, Soma ya Isareli.

¹¹ Oco va imbila pamosi ovisungo viesivayo lolopandu ku Suku, vati, Momo eye ukuesunga. Ocisola caye ka ci pongoloka cenda ño hũ ku va Isareli. Kuenje omanu vosi va vilikiya londaka yalua eci va sivaya Yehova omo ociseveto conjo ya Yehova ca tungiwa.

¹² Puãi ovitunda via lua la va Lewi kuenda akulu vapata, vana va kuka, haivo va kulĩha onjo yatete, cilo oku mõla ociseveto conjo yaco ndomo ci kasi loku tungiwa, va kaluka loku lila, vamue puãi va vilikiya lonjolela.

¹³ Kuenje ka ca tavele oku tepisa onjuela yoku vilikiya lonjolela lonjuela yokulila kuomanu. Momo omanu va vilikiya lonjolela yalua kuenje ondaka yaco ya yevala kupãla.