ESERA 1 - Embimbiliya - Bíblia Sagrada em Umbundu

¹ Kulima watete wokovava a Kuro, Soma yoko Persia, Suku wa tuñunya vutima wa Soma Kuro okuti ondaka ya Yehova, yina ya Popiwa lomẽla wa Yeremiya, yi lemuluiwa. Oco Soma wa imbila ofeka yaye yosi oluiya. Loluiya luaco wa lu soneha hati,

² Ca popia Kuro; Soma yoko Persia, ceci, hati, Yehova, Suku yovailu, wa nyiha olofeka viosi violuali, haeye wa nyihavo ocikele coku u tungila onjo ko Yerusalãi yo vo Yuda.

³ Oco wosi pokati kene o tiama komanu vaye,— Suku yaye a kale laye,— a ende ko Yerusalãi yo vo Yuda, a tunge onjo ya Yehova, Suku ya Isareli. Eye Suku o kasi vo Yerusalãi.

⁴ Kuenje kuosi kuli u wa puluka, vimbo liosi a kasi, alume vakuimbo liaco vo kuatise. Vo wihe opalata lulu lovikuata lovinyama, vo wihevo olombanjaile viocisola ndomo va sima oku kuatisa onjo ya Suku yi kasi vo Yerusalãi.

⁵ Oco kua votoka akulu vapata a Yuda la Benjamini, kuenda ovitunda, la va Lewi, la vosi va tuñunyiwa la Suku vovitima, okuti va enda ko Yerusalãi oku ka tunga onjo ya Suku.

⁶ Kuenje vosi va kala lavo va va kuatisa lovina viosi, lovikuata viopalata, levi viulu, lolonanga, lovinyama viupange, lovina via tĩla. Kilu liaco va vokiyako olombanjaile viocisola.

⁷ Ovikuata viosi Soma Nevukandesa a pundile ko Yerusalãi kuenje wa vi kapele vonjo yolosuku viaye Soma Kuro wa vi ongolola.

⁸ Ovikuata viaco Soma Kuro wa vi tuma la kalef kaye, Mitiredata, kalei eye wa vi eca ku Sesebecare, ukulu wa va Yuda.

⁹ Ovina viaco vievi, ohulukãi yolombasiya viulu, lohulukãi yolombasiya viopalata, lakui avali lecea koviyukilo viondalu viulu.

¹⁰ Atiyela ulu akuĩ atatu, atiyela opalata olohulukãi vivali kovita vikuãla lekui, lovina vikuavo ohulukãi.

¹¹ Ovina viosi viulu lopalata via soka olohũlũkãi vitãlo kovita vikuãla lakui epandu lecea. Kuenje viosi Sesebacare wa vi ambata oku vi tiula eci olomandekua via tunda ko Bavulono oku tiukila ko Yerusalãi.