ESEKIELE 9 - Embimbiliya - Bíblia Sagrada em Umbundu

¹ Oco wa mbilikiya vovatui ange londaka yinene hati, Kokeli ene akulu vovimbo, omunu omunu locimãlẽho coku ipaya peka.

² Kuenje tala, alume epandu veyilila kombundi yokonano ya imba ovaso ko Norte, omunu omunu locimãlẽho coku ipaya peka. Pokati kavo pa kala umue wa wala ovalatanya. Lombinga yimue yotinda yoku sonẽha ya kala kuvia waye. Kuenje va iñila, va talama konele yutala wosipi.

³ Lulamba wa Suku ya Isareli wa votoka kukeruvi, oko wa kala, wa wila kuvelo wonjo. Wa vilikiya ulume wa wala ovalatanya haeye wa wala ombinga yotinda yoku soneha kuvia waye.

⁴ Oco Ñala wa popia laye hati. Pita vokati kimbo, vokati ka Yerusalãi. Kapa ondimbukiso kolopolo viomanu va lisiõsiõla loku leñaila avĩho osi a lingaiwa vokati kalio.

⁵ Oco nda yeva eci a popia la vakuavo, hati, Piti vimbo oku u landula. Nyõli. Ovaso ene ka a ka siemo ndaño umosi, ndaño oku kuata ohenda.

⁶ Ipayi akongo, lakuenje lafeko, kuenda otumãla lakãi toke vu va kundula. Puãi omunu wosi o kasi londimbukiso ka vu ko lambi. Fetikili konjo yange yi kola. Kuenje va fetika lakulu va kala kovaso yonjo.

⁷ Wa popia lavo hati, Vĩhĩsi onjo. Yukisi ovitali lava va pondiwa. Kuendi. Oco va enda, va nyõla vimbo.

⁸ Osimbu va kala loku kundula ame nda siala lika wange, nda wila posi, nda lituvikapo, kuenje nda vilikiya siti, A Ñala Yehova, o nyõla ocisupe cosi ca Isareli poku sukumuila Yerusalãi onyeño yove?

⁹ Oco wa popia lame hati, Ohole yepata lia Isareli la Yuda ya lua enene. Ofeka ye yuka osonde. Imbo lie yuka ungangala. Momo va popia vati, Yehova wa yanduluka ofeka, Yehova ka lete.

¹⁰ Ndaño ame, iso liange ka li sipo umue. Ndaño oku kuata ohenda si kuatako, puãi kilu liovitue viavo ha kupuilako ovilinga viavo.

¹¹ Kuenje tala, ulume wa wala ovalatanya lombinga yotinda kuvia waye, weya, wa lombolola hati, Nda ka lingile cosi wa numile.