ESEKIELE 8 - Embimbiliya - Bíblia Sagrada em Umbundu

¹ Oco kunyamo wepandu, kosãi yepandu, keteke liatãlo kosãi, osimbu nda tumãla vonjo yange, lakulu va Yuda Va tumãla kovaso ange, oco eka lia Ñala Yehova lia mbuila.

² Oco nda tala, kuenje ota, nda mõla cimue ca setahãla omunu. Tunde koviongo viaye toke kombuelo ca setahãlã ondalu. Tunde koviongo viaye toke kutue ca nina ndevala li kusuka.

³ Yu wõlõla cimue ca setahãla eka. Wa ñuata kocifuko cokutue wange, kuenje Espiritu lia njeluila pokati kosi lilu. Lia nuala ko Yerusalãi lovinjoinjoi via Suku, toke kuvelo wombundi yocitali covokati, cina ca imba ovaso ko Norte, kuna kua kala ociteka cesepa cina ci koka esepa.

⁴ Kuenje tala, ulamba wa Suku ya Isareli wa kalako, wa soka ndocinjoinjoi nda muĩle vocimbota.

⁵ Oco a popia lame hati, A Mõlõmunu, kaliye petula ovaso ove, vanja ko Norte. Oco nda imba ovaso ange ko Norte, kuenje tala, konele yoko Norte yombundi yutala kua kala ociteka caco cesepa puvelo.

⁶ Yu wa mula hati, A Mõlõmunu, o ci lete eci va kasi loku linga? O lete ovombondo alua vakuepata lia Isareli va lingaila mũlo okuti va ndupuila kupãla lonjo yange yi kola? Haimo o mõla vali ovombondo a piãla.

⁷ Wa nuala toke kuvelo wocitali. Leci nda vanja, tala, vocimano mua kala limue epangu.

⁸ Yu wa popia lame, hati, A Mõlõmunu, tuiya vocimano caco; yu nda tuiya vocimano, kuenje tala kua kala epito.

⁹ Yu wa popia lame, hati, Iñilamo loku vanja avĩho a piãla va kasi loku lingilamo.

¹⁰ Oco nda iñilamo yu nda vanja. Kocimano cosi kua luvikiyiwa ovisetahãi viovina viosi vi yaila posi, lovinyama viosi vi lingisa onyanya, loviteka viosi viepata lia Isareli.

¹¹ Kovaso yavio kua talama alume akui epanduvali, akulu vepata lia Isareli. Pokati kavo pa talama Yasaniya, omõla a Safani. Omunu omunu wa kala lociyukilo caye peka. Elemba lielende linsensu lia katuka.

¹² Oco wa mũla hati, A Mõlõmunu, wa mõla eci akulu va Isareli va linga vowelema, omunu omunu vohondongolo yaye yoviñumañuma? Momo va popia vati, Yehova ka tu lete. Yehova wa yanduluka ofeka.

¹³ Yu wa popia vali lame, hati, Haimo o mõla vali ovombondo a piãla va lingainga.

¹⁴ Kuenje wa nuala toke kuvelo wombundi yonjo ya Yehova ya imba ovaso ko Norte, kuenje tala, oko kua tumãla akãi va lilila Tamusi.

¹⁵ Yu wa mũla hati, Wa ci mõla a Mõlõmunu? Haimo o mõla vali ovombondo a piãla okuti a ndeti a sule.

¹⁶ Yu wa nuãla toke kocitali covokati konjo ya Yehova kuenje, tala, puvelo wonembele ya Yehova, pokati kocindumba lutala, hutiño pa kala akũi avali kalume kalume vatãlo. Va imba olonyima viavo konembele ya Yehova, ovipala viavo kutundilo. Va fendela ekumbi loku imba ovaso kutundilo.

¹⁷ Oco a popia lame hati, Wa ci mõla, A Mõlõmunu? Ka ci lingi cimue hẽ kepata lia Yuda okuti va lingainga ovombondo ndeci va linga kulo, okuti va yukisa ofeka lungangala, loku nemisa vali? Tala va kapa olunavi kanyũlu avo.

¹⁸ Oco ame ndinga lonyeño. Iso liange ka li sipo umue. Ndaño oku kuata ohenda si kuatako. Ndaño va mbilikiya kovatui ange londaka yinene si va yevi.