ESEKIELE 7 - Embimbiliya - Bíblia Sagrada em Umbundu

¹ Kuenje ondaka ya Yehova yeya kokuange yiti,

² Ove, A Mõlõmunu, ca popia Ñala Yehova kofeka ya Isareli ceci, hati, Efulilo! Efulilo lieya kolonele vikuãla viofeka.

³ Kaliye efulilo lia kuiyilila. Hu tumisa onyeño yange. Hu pisa ndolongenda viove. Hu nenela ovombondo ove osi.

⁴ Iso liange ka liu ku si, ndaño ohena siu ku kuatela. Hu nenela ndolongenda viove, lovombondo ove a kala pokati kove; kuenje o limbuka okuti ame ndi Yehova.

⁵ Ca popia Ñala Yehova ceci, hati, Ũvi,

⁰ vi kũvi! Ota, wiya.

⁶ Efulilo lieya, efulilo lieya, li kasi love, ota, lieya.

⁷ Ekumbi liove lieya, anungi yofeka! Otembo yeya. Eteke li kasi ocipepi, eli liesakalalo, halioku vilikiyako lesanju kilu liolomunda.

⁸ Ndopo hu sukumuĩla onyeño yange, hu tẽlisila oku tema kuange. Hu pisa ndolongenda viove, kuenje hu nenela ovombondo ove osi.

⁹ Iso liange ka liu ku si, ndaño ohenda si ku kuatela. Hu nenela ndolongenda viove lovombondo ove a kala pokati kove. Kuenje o limbuka okuti ame ndi Yehova ame njambula.

¹⁰ Ota, eteke liaco, ota, lieya. Ekumbi liove lieya. Ahuku a temũla, lemande lia yova.

¹¹ Ungangala wa katuka ndombueti yevĩho. Ka ku va supila cimue. Ndaño kovipako viavo, ndaño kukuasi wavo, ka ku supi. Ka ku kala vali u o linga fũ.

¹² Otembo yeya, eteke li kasi ocipepi. Ukuakulanda ka ka sanjuke, lu o landisa ka ka sumue, momo onyeño yi kasi kowiñi wosi.

¹³ Momo osimbu yosi va kasi lomuenyo u o landisa ka tiukila kueci a landisa. Momo onyeño yi tiama kowiñi waco wosi, ka yi tiukila konyima. Mekonda lievĩho liaye lomue o tata omuenyo waye.

¹⁴ Va sika ale olumbeta. Cosi va sokiya, puãi lomue enda kocilunga momo onyeño yange yi kasi kowiñi waco wosi.

¹⁵ Posamua osipata. Vokati efengi lelambu. U o kasi vusenge o fa losipata, lu o kasi vimbo elambu lefengi viu nyõla.

¹⁶ Ndaño vamue va puluka, va kala kolomunda ndolopomba viovimbota. Vosi va leñaila, omunu evĩho liaye, omunu evĩho liaye.

¹⁷ Ovaka osi a pua ongusu, lolongolo viosi vi leñela ndovava.

¹⁸ Va liwalisa ovikelẽyi. Va kuatiwa locilulumu. Kovipala viosi ku kala osõi, lokovitue viosi atoto.

¹⁹ Opalata yavo va yimba volokololo, lulu wavo u linga ndocina ca viha. Opalata yavo lulu wavo ka vi tẽla oku va popela keteke lionyeño ya Yehova, ka vi tẽlisa ovitima viavo ndaño oku kutisa ovaimo avo, momo ovio via linga ocilondokua cevĩho liavo.

²⁰ Va nyõla onembele ya posoka poku lingilamo ovina viulamba wavo. Va tungilamo oviteka viovombondo avo, lovina viavo vi lingisa onyanya. Oco ame nda yi va lingisila ndocina ca vĩha.

²¹ Ndi yi eca povaka ovingendeleyi ha va yi kuata, kuenda kolondingãivi ha yi pundiwa, kuenje va yi vĩhisa.

²² Ocipala cange ci va pukula. Va vĩhisa ociwundilo cange. Mu iñila ovinyõi oku ci sama,

²³ loku ci punda. Omo ofeka yeyuka lakandu losonde, kuenda imbo lie yuka lungangala,

²⁴ oco nena vofũ kevĩho pokati kolofeka kuenje va kuata olonjo viavo. Nyimũla unene va lituna tuna lawo. Ovitumãlo viavo vi kola vi vĩhĩsua.

²⁵ Eci oku nyõleha ku iya va ka sanda ombembua puãi ka ku kala.

²⁶ Upongo u lundika kupongo lemumu kemumu. Va sanda ocinjoinjoi kuprofeto, puãi ocihandeleko kocitunda ca pua, lelungulo kovakulu.

²⁷ Osoma yi lisiõsiõla, lepalanga li wala ocinjoko, lovaka omanu vofeka a luluma. Ndinga lavo ndonjila yavo, kuenje ca soka lepiso liavo oco ndi va tetuluila. Oco va limbuka okuti ame ndi Yehova.