ESEKIELE 6 - Embimbiliya - Bíblia Sagrada em Umbundu

¹ Ondaka ya Yehova yeya kokuange, yiti,

² A Mõlõmunu, imba ovaso ove kolomunda via Isareli loku vimbila owanji wovitumasuku,

³ huti, Alomunda via Isareli, yevi ondaka ya Ñala Yehova. Ca popela Ñala Yehova kolomunda kuenda kawulu, kolondamba kuenda kovimbota, ceci, hati, Tala, ame muẽle, ame ndu neneli osipata kuenje nyõla olonumbuko viene viefendelo.

⁴ Ovotala ene a nyõlẽha, loviteka viene viekumbi vi teka. Alume vene va ipaiwa ndi va kupuila kovaso yoviteka viene.

⁵ Kuenje ndangeka ovivimbi viomãla va Isareli kovaso yoviteka viavo. Sanduila akepa ene kolonele viovotala ene.

⁶ Kovitungilo viene viosi ovaimbo a linga alunda. Olonumbuko viene viefendelo vi nyõlẽha oco ovotala ene a lunduke loku nyõlẽha. Oviteka viene vi teka teka hã ha vi sulila. Oviteka viene viekumbi vi timbuiwa. Ovilulikilo viene vi imuiwa.

⁷ Ava va ipaiwa va kupuka pokati kene, kuenje vu limbuka okuti ame ndi Ñala Yehova.

⁸ Haimo siapo ocisupe. Eci pokati kolofeka pali vamue vene va puluka kosipata, leci vu sandokaila kolofeka,

⁹ oco ava pokati kene va puluka, va njivalukila pokati kapata kuosi va tualiwa, eci ndi teya utima wavo wukahonga una wa litepa lame, leci matisa ovaso avo a tunguila koviteka viavo, leci va likuatela onyanya ovo muẽle mekonda liavĩho avo osi va lingainga kuenda ovombondo avo osi.

¹⁰ Kuenje va limbuka okuti ame ndi Yehova. Sia popele esanda eci nda linga siti, Ndi va linga ũvi waco.

¹¹ Ca popia Ñala Yehova ceci, hati, Liveta peka. Tutula posi olumãi luove. Linga huti, Avoyo we! mekonda liovombondo osi a vĩha epata lia Isareli. Momo va kupuka losipata, lelambu, lefengi.

¹² U o kasi kupãla o fa lefengi. U o kasi ocipepi o kupuka losipata. U wa supa vocingonja o fa lelambu. Oco ndi va tẽlisila onyeño yange.

¹³ Eci omanu vavo va ipaiwa va kala pokati koviteka viavo loku ñuala ovotala avo, ndaño kolonumbuko viosi viefendelo, pamue kilu liolomunda viosi, ndaño vemehi liuti wosi utalala, lovemehi liocinendele cosi cinene, kuosi va lumbila oviteka viavo viosi elemba lipepa, oco vu limbuka okuti ame ndi Yehova.

¹⁴ Kuenje ndi võluila eka liange. Nyõla ofeka lenyõlẽho lia piãla, lovitungilo viavo viosi tunde kekango toke ko Rivila; oco va kũliha okuti ame ndi Yehova.