ESEKIELE 5 - Embimbiliya - Bíblia Sagrada em Umbundu

¹ Kuenje ove, a Mõlõmunu, kuata osipata yimue ndomoko yomuto. Yi kuata loku yi pitisa kutue wove lokolonjele viove. Noke o sanda ombalãsa yimue, kuenje o tepisa layo ocifuko.

² Onepa yatatu o yimba vondalu yi kasi oku taima vokati kimbo eci oloneke viocingonja vi tẽlisua. Noke o kuata onepa yikuavo yatatu kuenje poku ñuala imbo o li nyõla losipata. Lonepa yikuavo yatatu o yi sanduila vofeka. Lame ndi va somũĩla osipata konyima yavo.

³ O nyañulako tumue tutito, loku tu kutila kesũsu liuwalo wove.

⁴ Oco wupapo vali tumue loku tu imba vondalu, okuti tu pila vondalu. Omo mu tunda ondalu yi iñila vepata liosi lia Isareli.

⁵ Ca popia Ñala Yehova ceci, hati, Lilo olio Yerusalãi. Nda li kapa pokati kapata kuenda olofeka via li ñuala.

⁶ Eye puãi wa likala oviholo viange, okuti koku likala kuaco olofeka vi sule. Wa tomba ovisila viange ca piãla, okuti olofeka vio ñuala ci sule. Wa likala oviholo viange. Ka endelele vovisila viange.

⁷ Oco, ca popia Ñala Yehova ceci, hati, Omo wa luisa ca lua evĩho liove okuti olofeka via ku ñuala ci sule, lomo kua endelele vovisila viange, kuenje kua lavele oviholo viange, puãi wa linga oviholo violofeka via ku ñuala,

⁸ oco, ame muẽle hu tangulukilamo, ha tetuluila olondaka vokati kove kovaso apata. Oco ca popia Yehova Suku.

⁹ Kuenje, mekonda liumbondo wove wosi, ndinga love eci sia la linga, leci ca soka laco si ci lingi vali.

¹⁰ Oco vaisia va lia omãla vavo vokati kove, lomãla va lia vaisiavo. Ame muẽle neta onimbu yolondaka viove kuenje sanduila kolofeka viosi ocisupe cove cosi.

¹¹ Oco, ndomo ñasi lomuenyo, oco ca popia Ñala Yehova, omo wa vihĩsa onjo yange yi kola lovina viove viosi vi lingisa onyanya, lovombondo ove osi, lamevo hu tepulula. Iso liange ka liu ku si, kuendavo si kuata ohenda.

¹² Onepa yimue yove yatatu yi fa lefengi, kuenje yi liwa lelambu vokati kove. Onepa yikuavo yatatu yi fa losipata kolonele viove. Lonepa yikuavo yatatu ndi yi sanduila kolofela viosi, kuenje somuila osipata konyima yavo.

¹³ Oco oku tema kuange ku pua okuti nda va telĩsila onyeño yange kuenje nda lilemba. Kuenje va limbuka okuti ame ndi Yehova nda ci popela esepa liange eci nda va tẽlĩsila onyeño yange.

¹⁴ Kuenje hu lingisa elunda. Apata a ku ñuala a ku yola epembe kovaso a vosi va pita.

¹⁵ Oco o kala lepembe lesepu kuenje o linga elungulo li lingisa usumba kapata a ku ñuala, eci hu tetuluila loku tema lonyeño kuenda ayambulo a kãla. Ame ndi Yehova ame nda ci popia.

¹⁶ Eci numa kokuove ovisongo vĩvi vielambu, evi vioku nyõla, ndi vi tumĩla enyõlẽho liove, noke mbokiya vali elambu kokuove, kuenje nyõla ombolo yeteku liove.

¹⁷ Numa kokuove elambu. Ovinyama via tema vi lia omãla vove. Efengi losonde vi pita kokuove, kuenje nena kokuove osipata. Ame ndi Yehova, ame nda ci popia.