ESEKIELE 47 - Embimbiliya - Bíblia Sagrada em Umbundu

¹ Noke wa niuwiya kuvelo wonembele, kuenje tala, konẽle yutundilo vemẽhi liolukuki luonembele mua tunda ovava, momo onembele ya imba ovaso kutundilo. Ovava aco a pita konẽle yoko Sul yonembele haiko ko Sul yutala, kuenje a suñamẽla kombuelo.

² Oco wa mitisa kombundi yoko Norte, wa nuala posamua, wa ñualĩsila posamua toke kombundi yokosamua yina ya imba ovaso kutundilo; kuenje tala, konele yoko Sul kua tunda ovava.

³ Omunu waco wa suñamẽla kutundilo. Peka liaye pa kala ukolo, yu wa seteka ohulũkãi yovikeya, kuenje wa mitisa vovava. Ovava aco a ñuatela volohotowaila.

⁴ Wa seteka vali ohulũkãi yovikeya, kuenje wa mitisa vovava. Ovava a ñuatela volongolo. Wa seteka vali ohulũkãi yovikeya, kuenje wa mitisa vovava, Ovava a ñuatela vombunda.

⁵ Wa seteka vali ohulũkãi yovikeya, kuenje ca linga olui ndokuti sia tẽlẽle oku pita. Momo ovava a a londa, a longa okuti oku pita te oku yua, a linga olui ka lu pitiwa.

⁶ Wa mula hati, A Mõlõmunu, wa ci mõla? Oco wa nuala, wa niuwiya vali kohulo yolui.

⁷ Eci nda tiukila kohulo yolui nda mõla oviti via lua sinya lilo la sinya olio.

⁸ Oco a popia lame hati, Ovava a a suñama kutundilo, a ka itila vo Aramba. Eci a itila vovava a sava ovokalunga oco ovava aco a savuluka.

⁹ Kuenje kuosi olui lu pita oviendalomuenyo viosi via siata vi kuata omuenyo. Ku kala olõsi via lua momo ovava aco a pitililako okuti oco ovava okalunga a savuluke. Kuõha ku pita olui luaco cosi ci kuata omuenyo.

¹⁰ Vakuaku pipa va talama konẽle yokalunga. Tunde ke Engedi toke ke Enengilayimi ku linga ocinyalẽho cawanda olõsi. Olõsi viaco vi kala viñi viñi ndolõsi viovokalunga kanene.

¹¹ Puãi ovisave viaco lovima viaco ka vi savuluka, vi kalaño lomongua.

¹² Kuenje kolohulo sinya lilo lokesinya ku kulila oviti viosi viokulia. Amẽla aco ka a owuka, ndaño epako liaco ka li fulila. Osaĩ kosãi wima apako okaliye momo ovava aco a tunda konembele. Epako liaco li linga okulia, lamẽla aco a linga ovihemba.

¹³ Ca popia Ñala Yehova ceci, hati, Olongave vu liaveli lavio ofeka yocipiãlo pokati kapata ekũi lavali a Isareli, vievi: Yosefe o tambula olonepa vivali.

¹⁴ Ene vosi vu liaveli pokati eci ca lisoka omunu lomunu. Nda lisila oku yeca kolosekulu viene, kuenje ofeka yilo yi linga muẽle ocipiñalo cene.

¹⁵ Ongave yofeka yi kala ndomo: Konẽle yoko Norte, tunde kokalunga kanene, konjila yoko Hetilone, toke poku iñila ko Hamati loku enda ko Zedade,

¹⁶ la Berota la Sivirayi, eyi yi kasi kongave yopokati ka Damasko la Hamati, toke ko Hacare-hatikone, yi kasi kongave ya Hawerana.

¹⁷ Oco ongave yi tunda tunde kokalunga toke ko Hacarenana yi kasi kongave yoko Norte yoko Damasko; ko Norte ku kale ongave yoko Hamati. Eyi oyo ongave yoko Norte.

¹⁸ Konẽle yokutundilo ongave yi tunda ko Hazerenoni pokati ka Hawerana la Damasko, yi likuama lolui Yordão tunde ko Gildeada lofeka ya Isareli toke kokalunga kokutundilo ta ko Tamare. Eyi oyo ongave yokutundilo.

¹⁹ Konẽle yoko Sul ongave yi kala tunde ko Tamare toke kovava a Merivoti-kadesi, oku vamba olui luo ve Egito, toke kokalunga kanene. Eyi oyo ongave yoko Sul.

²⁰ Konẽle yokutakelo ongave yi kala okalunga kanene toke ocipepi koku iñilĩla vo Hamati. Eyi oyo ongave yokutakelo.

²¹ Oco vu litepisili pokati kene ofeka eyi ndeci ca soka lapata a Isareli.

²² Vu yi tepisi pokati kene kuenda pokati ka valualofeka va kasi lene, va citila omãla pokati kene. Kokuene va kala ndolonyitiwe vakuepata lia Isareli muẽle. Va tepisiluavo ocipiñalo kumosi lene pokati kapata a Isareli.

²³ Kuosi ku kasi ukualofeka, nda vepata lielie, nda vepata lielie, vu u wihĩli ocipiñalo caye. Oco ca popia Ñala Yehova.