ESEKIELE 46 - Embimbiliya - Bíblia Sagrada em Umbundu

¹ Ca popia Ñala Yehova ceci, hati, Ombundi yocitali covokati yina ya imba ovaso kutundilo yi yikiwa oloneke epandu viupange. Puãi keteke liesambata yi yikuluiwa, kuendavo keteke osãi yokaliye yi mõlẽha yi yikuluiwavo.

² Osoma oku tunda posamua yiñilĩla kocindumba combundi, yi talama pongunji yombundi. Ovitunda vi nena ocilumba caye coku pia elisi, lovilumba viaye viombembua, leye muẽle o fendelela kuvelo wombundi. Noke o tundila posamua, ombundi puãi ka yi yikiwa toke koñolõsi.

³ Omanu vakuafeka va fendelela puvelo wombundi yaco haipo, kovaso a Yehova kasambata kuenda kokumõlẽha kuolosãi.

⁴ Ocilumba coku pia elisi ci lumba olosoma ku Yehova keteke liesambata ci kala otumeme epandu ka tu kuete etime kuenda omanga ka yi kuete etime.

⁵ Ocilumba colomema ci kala ndomo, eci a nena omanga o nenavo efa liolomema, eci a nena otumeme o nenavo olomema ndeci a tẽla. Kumosi lolomema o nenavo ulela okuti efa liolomema ohine yulela.

⁶ Eteke osãi yokaliye yi mõlẽha o lumba onui ka yi kuete etime.

⁷ Ocilumba colomema o ci nena ndomo. Eci a nena onui o nenavo efa liolomema, leci a nena omanga o nenavo efa liolomema, eci a nena otumeme o nenavo olomema ndeci a tẽla. Kumosi lolomema o nenavo ulela okuti efa liolomema ohine yulela.

⁸ Eci osoma yiñila yiñilĩla kocindumba combundi kuenda haiko yi tundila.

⁹ Eci omanu vakuafeka va kokela ku Yehova kotembo yolofesta via tukuiwa, u iñilĩla kombundi yoko Norte oku fendela o tundila kombundi yoko Sul, lu iñilĩla kombundi yoko Sul o tundila kombundi yoko Norte. Lomue o tiukila ha tundila posamua kombundi oko a iñilĩla, puãi o tundila kueyi yi kasi kovaso aye.

¹⁰ Eci va iñila osoma yi iñilĩla kumosi lavo, leci va tunda lahevo o tunda.

¹¹ Kolofesta via tukuiwa ocilumba colomema ci kala efa limosi konui, lefa limosi komanga, lokotumeme ndeci a tẽla oku eca, kuenda ohine yimosi yulela kefa.

¹² Eci osoma yi lumba ocilumba cocipango caye, nda ceci coku pia elisi, nda vievi viombembua, ndocilumba cocipango caye coku Yehova, vo yuluila ombundi ya imba ovaso kutundilo. O lumba ocilumba caye coku pia elisi pamue ovilumba viaye viombembua, ndeci a lingainga keteke liesambata, kuenje o tunda. Eci a tunda oco ombundi yi yikiwa noke.

¹³ Eteke keteke o nena omeme yi tẽla ulima haiyo ka yi kuete etime, o yi nena ha yi lumbila Yehova ocilumba coku pia elisi. Omẽle lomẽle o nena.

¹⁴ Kumosi layo omẽle lomẽle o nena ocilumba colomema cokuti onepa yepandu yefa kuenda onepa yatatu yohine yulela woku leñelisa osema. Eci oco ca linga ocilumba colomema coku Yehova, eci oco ociholo ka ci pui cocilumba coku pia elisi.

¹⁵ Oco omeme, locilumba colomema, kuenda ulela, vi neniwa omẽle komẽle ndocilumba coku pia elisi ka ci pui.

¹⁶ Ca popia Ñala Yehova ceci hati, Nda osoma kocipiñalo caye eca ombanjaile yimue komãla vamue vaye, yi tiama muẽle komãla vaye, yi linga yavo yocipiñalo.

¹⁷ Puãi nda kocipiñalo caye eye eca ombanjaile yimue kumue ukuenje waye yi linga yaye toke kunyamo woku yovoka, oco yi tiuka vali kosoma. Ocipiñalo caye ci kala comãla vaye lika.

¹⁸ Osoma ka yi tambula cimue cocipiñalo comanu oku va tundisa kocitumãlo cavo. Upa kukuasi waye muẽle ha eci ocipiñalo komãla vaye ndokuti lomue pokati komanu vange o tundisua vali kocitumãlo caye.

¹⁹ Oco wa mitisa kuvelo una wa kala konẽle yombundi, wa nena kokololo yolohondo vi kola viovitunda yina ya imba ovaso ko Norte, Kosulo kutakelo nda mõlãko ocitumãlo cimue.

²⁰ Oco a popia lame hati, Kocitumãlo eci oko ovitunda vi telekela ocilumba ceko leci cekandu, haiko vi yokela ocilumba colomema. Ka vi vi tuala tuala kocitali cokosamua sanga vi kolisa omanu.

²¹ Kuenje wa nuala kocitali cokosamua loku mitisa kavindi akuãla ocitali. Vevindi lovevindi liocitali mua kala ocitali cikuavo.

²² Vavindi akuãla ocitali mua kala otuvitali tutito usõvĩ watuo akũi akuãla kovikeya, upati watuo akũi atatu kovikeya. Kakuãla katuo tua lisoka.

²³ Vokati, otuvitali tuosi, kakuãla katuo, okacitali lokacitali, ka ñualĩwa locimbaka. Vemẽhi liovimbaka mua tungiwa ovaiko kolonẽle viaco viosi.

²⁴ Oco a popia lame hati, Evi ovio oviwo omo vakuakuvumba vonembele va telekela ocilumba comanu.