ESEKIELE 45 - Embimbiliya - Bíblia Sagrada em Umbundu

¹ Eci vu liamuĩla ocipiñalo cofeka vu tepisila Suku onepa yimue yofeka ha yi lingi onepa yaye yi kola. Usõvĩ wonepa yaco akũi avali lavitãlo kolohũlũkãi viovikeya, lupati waco akũi avali kolohũlũkãi viovikeya. Onepa yaco yosi yi kala yi kola.

² Vonepa yaco yi kola mu kala ocitumãlo cimue ci linga conembele, usõvĩ waco ovita vitãlo kovikeya, lupati waco ovita vitãlo kovikeya. Avindi aco a lisoka. Ci ñualiwa locitali ci kuete upati wakũi atãlo kovikeya.

³ Konepa yi kola yofeka va tepako onepa yimue yi kuete usõvĩ wakũi avali kolohũlũkãi kolohũlũkãi vitãlo viovikeya, lupati wekũi liolohũlũkãi viovikeya. Omo mu kala onembele, haiyo ocitumãlo ci kola koku kola.

⁴ Onepa eyi oyo yi kola ca piãla vofeka. Yi kala yovitunda vakuakuvumba vonembele haivo va kokela ocipepi la Yehova ha vo vumbi, yi linga ocitumãlo colonjo viavo, yi lingavo ocitumãlo ci kola conembele.

⁵ Onepa yikuavo, usõvĩ wayo akũi avali kolohũlũkãi kolohũlũkãi vitãlo viovikeya, lupati wayo ekũi liolohũlũkãi viovikeya yi linga ya va Lewi, vana vakuakuvumba vonembele. Yi linga yavo ha va tungimo ovaimbo avo.

⁶ Ocipepi lonepa ya tepisilua ovitungilo vi kola vu tepelako imbo onepa yalio, upati wayo olohũlũkãi vitãlo viovikeya, lusõvĩ wayo akũi avali kolohũlũkãi kolohũlũkãi vitãlo viovikeya. Yi tiama kepata liosi lia Isareli.

⁷ Kuenje ku Soma ku tiamẽla osi yi lisungue lokonepa yi kola leyi yimbo konẽle yutakelo, kuenda osi yi lisungue lokonepa yi kola leyi yimbo konẽle yutundilo; usõvĩ wayo u soka lusõvĩ wonepa yeciwa kepata lepata, upati wayo tunde kongave yofeka yokutakelo toke kongave yokutundulo.

⁸ Oyo yi linga onepa yaye vo Isareli. Kuenje olosoma viange ka vi talisa vali omanu vange ohali, puãi va tepisila va Isareli osi ndeci ca soka lapata avo.

⁹ Ca popia Ñala Yehova ceci, hati, Ci tẽla, alosoma via Isareli. Liweki kungangala kuenda koku punda. Lingi ocili lesunga. Liweki oku tundisa omanu vange kolonjo viavo. Oco ca popia Ñala Yehova.

¹⁰ Vu kala lolombalãsa viesunga, efa liesunga, lombandu yesunga.

¹¹ Efa kuenda ombandu vi kala loseteko yimosi, ombandu yi kala lonepa yekũi yohomeri, efa haico, onepa yekũi yohomeri. Ohomeri oyo yi linga esĩla lioku yonga.

¹² Osiekele yi soka lakũi avali kolongera. Olosiekele vitãlo vi linge muẽle olosiekele vitãlo, lolosiekele ekũi vi linge muele olosiekele ekũi. Akui atãlo lolosiekele vi linge omina yene.

¹³ Ocilumba vu lumba ceci: Kohomeri yotiliku weci onepa yepandu yefa; kohomeri yosevata wecivo onepa yepandu yefa.

¹⁴ Eci ca handelekua ceci: Kokoru weci onepa yekũi yombandu, okoru ya lisoka lohomeri, yi kuete olombandu ekũi.

¹⁵ Kocunda lokocunda ca va Isareli ci kuete olomeme ovita vivali wupako omeme yimosi. Eci ci linga ocilumba colomema, lovilumba vioku pia elisi, lovilumba viombembua, vioku vopa eko. Oco ca popia Ñala Yehova.

¹⁶ Omanu vosi vofeka va eca ocilumba caco kosoma ya Isareli.

¹⁷ Ci linga ocikele cosoma oku eca ovilumba vioku pia elisi, lovilumba violomema, lovilumba vioku nyua, kolofesta lo kokumõlẽha kuolosãi, lokasambata, lokolofesta viosi via tukuiwa viepata lia Isareli. Eye angiliya ocilumba cekandu locilumba colomema locilumba coku pia elisi, kuenda ovilumba viombembua, oku upa eko kepata lia Isareli.

¹⁸ Ca popia Ñala Yehova ceci hati, Vosãi yatete, veteke liatete kosãi, o kuata onui ka yi kuete etime, kuenje o yelisa onembele.

¹⁹ Ocitunda ci nyañula osonde yimue yocilumba cekandu, o yi kapa kovikuli viapito onembele kuenda kavindi akuãla ocimbimbi cutala, kuenda kolongunji viombundi yocitali covokati.

²⁰ Eteke liepanduvali kosãi vu ci lingila ava va lueya puãi halocipangoko lava va lueya lonumbi hã vupi eko kepata lia Isareli.

²¹ Kosãi yatete, keteke liekũi lakuãla kosãi, vu kala lo Pascoa kuenje oloneke epanduvali vu lia ombolo ka yi kuete etumbisa.

²² Eteke liaco osoma yi liangiliyila eye muẽle kuenda omanu vosi vofeka onui yocilumba cekandu.

²³ Kuenda koloneke viaco epanduvali viofesta eteke keteke o lumbila Yehova ocilumba coku pia elisi, olonui epanduvali lolomanga epanduvali ka vi kuete etime, eteke keteke koloneke viaco epanduvali, kuenda ocitupi cohombo eteke keteke ndocilumba cekandu.

²⁴ Kuenje o lumba ocilumba colomema, conui ci linga efa, leci comanga efa, kuenda ohine yulela kefa lefa.

²⁵ Kosãi yepanduvali, keteke liekũi latãlo kosãi, kuenda oloneke viaco epanduvali viofesta, ovilumba viaco haivio vi lumbiwa vali ndokuti ocilumba cekandu locilumba coku pia elisi, locilumba colomema, kuenda culela.