ESEKIELE 44 - Embimbiliya - Bíblia Sagrada em Umbundu

¹ Kovaso yaco wa niuwiya kombundi yokosamua yonembele yina ya imba ovaso kutundilo. Tua yi sanga ya yiliwa.

² Oco Yehova wa popia lame hati, Ombundi eyi yi yiliweño, ka yi yuluiwa, lomue iñilĩlamo. Momo Yehova, Suku ya Isareli, wa iñilĩlemo oco yi yiliweño.

³ Osoma lika yi tumalamo ha lilamo ombolo kovaso a Yehova. Eye iñilĩla pocindumba combundi, haipo muẽle a tundila.

⁴ Noke wa mitisa pombundi ya imba ovaso ko Norte kuenje wa nuala kovaso yonembele. Nda vanja, kuenje tala, ulamba wa Yehova wa yukisa onembele ya Yehova. Oco nda wila posi, nda lituvikapo.

⁵ Oco Yehova wa popia lame hati, A Mõlõmunu, limbuka ciwa, vanja lovaso ove, yeva lovatũi ove cosi hu sapuila covisila viosi vionembele ya Yehova, lovihandeleko viayo viosi. Limbuka ciwa ava vosi ci tava oku iñila vonembele, lava vosi ka ci tava oku iñila.

⁶ Popia lepata liusuanji ndokuti epata lia Isareli, huti, Ca popia Ñala Yehova ceci, hati, Avĩho ene a pue, apata lia Isareli,

⁷ ndeci oku tava vakualofeka, haivo oviyamba vietimba lutima, oku iñila vonembele yange yi kola loku yi vĩhĩsa poku mbumbila okulia kuange, alenda losonde. Wa nyõli ocisila cange lavĩho ene osi.

⁸ Ka wa tateli ovikuata viange vi kola; puãi wa kapi vakualofeka ha va vi tati vonembele yange yi kola.

⁹ Oco Ñala Yehova hati, Pokati ka vakualofeka va sangiwa pokati komãla va Isareli, lomue ukualofeka, haeye ociyamba cutima letimba, iñila vonembele yange.

¹⁰ Puãi va Lewi, vana va litepele lame, yu va enda kupãla ha va fendela oviteka viavo eci Isareli wa lueya, ovo va sanga eyambulo liolohole viavo.

¹¹ Va linga akuenje vonembele yange yi kola. Va kala locikele colombundi vionembele loku vumba vonembele. Va ipaya ocilumba coku pia elisi kuenda ocilumba ci nena omanu. Va talamãela omanu hã ha va vumbi.

¹² Omo va va vumbailaile kovaso oviteka viavo kuenje va lingilile epata lia Isareli ocilondokua cekandu, oco nda va lisila okuti va yambuiwa muẽle. Oco ca popia Ñala Yehova.

¹³ Ka va kokela vali kokuange okuti va mbumba ndovitunda, ndaño oku ama kovikuata viange vina vi kola koku kola. Puãi va kala losõi yavo mekonda liavĩho avo va lingile.

¹⁴ Haimo lumue ndi va ĩha ocikele coku tata onembele loku linga upange wayo wosi kuenda cosi ci lingiwilamo.

¹⁵ Puãi ovitunda, va Lewi, omãla va Sadoke, vana va kaile locikele coku tata onembele yange eci omãla va Isareli va litepele lame, ovo va kokela ocipepi lame oku mbumba. Va talayama ha va nyĩha alenda losonde. Oco ca popia Ñala Yehova.

¹⁶ Oco va iñila vonembele yange, va kokela komesa yange oku mbumba, kuenje va lava ocikundi cange.

¹⁷ Eci va iñilĩla volombundi viocitali covokati va wala uwalo wovalatanya, wovonya omeme ka vo wala osimbu va vumbila volombundi viocitali covokati kuenda vokati konembele.

¹⁸ Kovitue viavo ku kala ovifuto viovalatanya. Va wala ovikalasãu viovalatanya. Ka va wala cimue ci koka oku salamĩha.

¹⁹ Eci va tundila komanu kocitali cokosamua va lula uwalo wavo woku vumba, vo kapa volohondo vi kola, kuenje va wala uwalo ukuavo, okuti ka va kolisa omanu luwalo wavo.

²⁰ Ka va pemũla ovitue viavo esenye, ka va lepisa esinga liavo puãi va vuvula ño esinga liovitue viavo.

²¹ Lacimue ocitunda ci nyua ovinyu eci ciñila vocitali covokati.

²² Ka va likuela locimbumba ndaño lukãi wa nyalĩwa, puãi va likuela lufeko we lipua haeye ukuepata lia Isareli, pamue locimbumba nda ocimbumba cocitunda.

²³ Va longisa omanu vange oku tepisa pokati keci ci kola leci caño, loku va lekisa ndomo va tẽla oku tepisa pokati keci ca liña leci ca yela.

²⁴ Eci kuli ondaka ovo va linga olonganji viaco, va yi tetulula ndonetululo yange. Va lava ovihandeleko viange lovisila viange volofesta viange viosi vina via tukuiwa. Va kolisa asambata ange.

²⁵ Ka va livĩhĩsa poku iya ocipepi lomunu wa fa. Puãi nda u wa fa onjali yulume pamue onjali yukãi, pamue omõla ulume pamue omõla ukãi, pamue manjaye ulume pamue manjaye ukãi nda ka la kuela, ci tava oku livĩhĩsa.

²⁶ Kuenje kovaso yoku livĩhĩsa o kalapo oloneke epanduvali oco a yelisua noke.

²⁷ Eteke a iñila vonembele, vocitali covokati, oku vumba vonembele, o nena ocilumba caye cekandu. Oco ca popia Ñala Yehova.

²⁸ Ka va kuata ocipiñalo, ame ndinga ocipiñalo cavo. Ka va ĩhĩwa osi vo Isareli, ame ndinga osi yavo.

²⁹ Va lia ocilumba colomema, locilumba cekandu, locilumba ceko. Cosi ci lumbiwa vo Isareli ci linga cavo.

³⁰ Kuenje viatete kovaima osi, lovilumba viene viosi, cosi ci linga covitunda. Locitiva cene catete vu ceci kovitunda oco vi sumuluĩse onjo yene.

³¹ Cosi ca lifila pamue ca nyanyõha, ci kale onjila, ci kale ocinyama, ka ci liwa lovitunda.