ESEKIELE 43 - Embimbiliya - Bíblia Sagrada em Umbundu

¹ Noke wa nuala kombundi ndokuti ombundi ya imba ovaso kutundilo.

² Kuenje tala, ulamba wa Suku ya Isareli weyilila kutundilo. Onjuvungo yokuiya kuaco ya soka ndonjuvungo yovava a lua. Oluali lua nina lulamba waye.

³ Locinjoinjoi nda mõla ca soka locinjoinjoi nda muĩle eci eyile oku nyõla imbo, ca sokavo locinjoinjoi cina nda muĩle kolui Kevare. Oco nda wila posi, nda lituvikapo.

⁴ Eci ulamba wa Yehova wa iñilĩla vonembele pombundi ya imba ovaso kutundilo,

⁵ oco Espiritu lia njelula, lia nuala vocitali covokati. Kuenje tala, ulamba wa Yehova wa yukisa onembele.

⁶ Osimbu ulume a talama nda yeva umue vokati konembele konẽle yange, wa popia lame,

⁷ wa sapuila hati, A Mõlõmunu, eci oco ocitumãlo comangu yange yusoma, haico ociliatelo colomãi viange, oko nunga pokati komanu va Isareli, kuenje ñalako otembo ka yi pui. Kuenje epata lia Isareli ka li vĩhĩsa vali onduko yange yi kola lukahonga wavo kuenda ovivimbi violosoma viavo, ndaño ovo muẽle, ndaño olosoma viavo.

⁸ Ka li yi vĩhĩsa vali loku kapa olukuki luavo ocipepi lolukuki luange, locikuli cavo ocipepi locikuli cange, okuti pokati kavo lame pa pindika lika ocimano. Va vĩhĩsile onduko yange yi kola lovombondo avo va lingile, oco nda va lilepo lonyeño yange.

⁹ Cilo va kape kupãla lame efendelo liavo lioviteka kuenda ovivimbi violosoma viavo, kuenje nunga pokati kavo otembo ka yi pui.

¹⁰ Love, a Mõlõmunu, lomboluila epata lia Isareli onembele loku molẽha kuayo loseteko yayo, oco va kutisue osõi yolohole viavo.

¹¹ Kuenje nda va kutisilua osõi yeci cosi va linga, va lekisa onembele ndomo yi kasi, va lekisavo atundilo ayo lañilĩlo ayo loku tungiwa kuayo kuosi. Va longisa ovisila viayo viosi lovihandeleko viayo viosi. Cosi eci ci sonẽha kovaso avo, oco va kũlĩhe ovisila viayo viosi, lovihandeleko viayo viosi, loku vi pokola.

¹² Ocihandeleko conembele ceci: Osi yosi yokilu liomunda yi kola koku kola. Tala, eci oco ocihandeleko conembele.

¹³ Ukeya woku seteka wa soka ukeya kuenda epaluma. Oloseteko viutala kovikeya vievi: Ocitumãlo caco ukeya umosi koku lepa, kuenda ukeya umosi vupati waco, locimbimbi caco ca ñualãko ca soka lepaluma.

¹⁴ Utunga wutala u kala ndomo: Tunde posi toke vemẽhi liocimbimbi cinene, ovikeya vivali, upati wawo ukeya umosi; tunde kocimbimbi citito toke kocimbimbi cinene, ovikeya vikuãla, lupati waco ukeya umosi.

¹⁵ Kuenda iko liokilu liutala ovikeya vikuãla. Kiko liutala ku kala olombinga vikuãla vimba ovaso kilu,

¹⁶ utunga wavio ukeya umosi. Avindi iko liutala, kakuãla kao, a lisoka, usõvĩ walio ekũi lavivali kovikeya, upati walio ekũi lavivali haivio.

¹⁷ Avindi ocimbimbi cinene, kakuãla kao, a lisoka; usõvĩ waco ekũi lavikuãla kovikeya, upati waco ekũi lavikuãla kovikeya; locimbimbi citito ca ñualãko, upati waco, omeyu yukeya; ocitumãlo caco ca ñualãko ca soka lukeya. Oviliatelo viutala vimba ovaso kutundilo.

¹⁸ Oco a popia lame hati, A Mõlõmunu, ca popia Ñala Yehova ceci, hati, Ovisila viutala vievi: Keteke lioku u angiliyila oku lumbilako ovilumba vioku pia elisi, loku nyilĩlako osonde,

¹⁹ weca onui ndocilumba cekandu kovitunda va Lewi, vakuepata lia Sadoke. Ovo va pitila kokuange oku mbumba, Ñala Yehova wa ci popia.

²⁰ O nyañula osonde yimue yayo, o yi kapa kolombinga vikuãla viutala kuenda kavindi akuãla ocimbimbi cinene locimbimbi citito ca ñualãko; oco o yelisa utala loku u upa eko.

²¹ Kuenje o nyañulãvo onui ndocilumba cekandu. Yi yokiwila apa pa tukuiwa pa tiamẽla konembele, haipo pa kasi posamua yoku ku kola.

²² Eteke liavali o nena ocitupi ka ci kuete etime ndocilumba cekandu, kuenje utala u yelisua ndomo wa yelisiwile lonui.

²³ Eci wa mãla oku u yelisa weca onui ka yi kuete etime kuenda omanga yovocunda ka yi kuete etime.

²⁴ O vi eca muẽle kovaso a Yehova kuenje ovitunda vi kapako omongua, loku vi lumbila Yehova ocilumba coku pia elisi.

²⁵ Oloneke epanduvali, eteke keteke, weca ohombo ndocilumba cekandu, wecavo onui kuenda omanga yovocunda, evi ka vi kuete etime.

²⁶ Oloneke epanduvali vopa utala eko loku u yelisa hã ha vo tumbika oco va u kolisa.

²⁷ Eci va tẽlĩsa oloneke viaco oco, tunde keteke liecẽlãla oku enda kovaso, ovitunda vi lumbila kutala ovilumba viene vioku pia elisi kuenda ovilumba viene viombembua, kuenje ame ndu tavi. Oco ca popia Ñala Yehova.