ESEKIELE 42 - Embimbiliya - Bíblia Sagrada em Umbundu

¹ Kovaso yaco wa nuala kocitali co vokati konẽle yoko Norte, wa nuala kolohondo via imba ovaso kocitali conembele, havio via imba ovaso konẽle yoko Norte.

² Oku lepa kuonjo ya imba ovaso ko Norte ocita covikeya; upati wayo akũi atãlo kovikeya.

³ Ocipepi lokovikeya akũi avali vina via tiama kocitali covokati, haivio via imba ovaso kombambakau yocitali cokosamua, kua kala ovindumba via litungihinya kolosapalalo vitatu.

⁴ Kovaso yolohondo kua kala okololo yoku iñilila, upati wayo ekũi liovikeya, okulepa kuayo ocita covikeya. Apito avio a kala konẽle yoko Norte.

⁵ Olohondo viosapalalo yokilu vitito, momo ovindumba viokilu via vi tepulula calua, ndeci via tepulula olohondo viosapalalo yokombuelo leyi yopokati hacoko.

⁶ Momo via kala kolosapalalo vitatu, kuenje ka via kaile lolongunji ndevi viocitali cokosamua. Oco olohondo viokilu via sukatela calua okuti evi viokombuelo levi viopokati hĩse.

⁷ Locimbaka cokosamua colohondo cina ca imba ovaso kocitali cokosamua ca kala lusõvi wakũi atãlo kovikeya.

⁸ Momo usõvĩ wolohondo via kala konẽle yocitali cokosamua wa soka lakũi atãlo kovikeya, puãi usovĩ wevi via imba ovaso konembele wa soka locita covikeya.

⁹ Vemẽhi liolohondo evi mua kala uvelo woku iñilila konẽle yokutundilo eci umue a tunda kocitali cokosamua,

¹⁰ kuna ocimbaka cokosamua ci fetikila, ha iñila vokati. Konẽle yoko Sul, oku imba ovaso kocitali kuenda konjo, kua kala olohondo.

¹¹ Kovaso yavio kua kala okololo. Via soka soka ndolohondo vioko Norte, usõvĩ wavio kuenda upati wavio hawo umosi, ndaño atundilo avio lutungilo wavio, kuenda apito avio, cosi cimosi.

¹² Vemẽhi liolohondo vioko Sul mua kala uvelo woku iñilĩla konẽle yokutundilo vokololo muna muiñilĩlua. Kovaso kua kala ocimbaka.

¹³ Oco a popia lame hati, Olohondo vioko Norte lolohondo vioko Sul, vina via imba ovaso kocitali, ovio olohondo vi kola. Omu omo ovitunda vina vi enda loku kokela ku Yehova, vi lila lila ovilumba vi kola koku kola, haimo vi kapa kapa ovilumba vi kola koku kola, ndeci ocilumba colomema, locilumba cekandu, locilumba ceko, momo olohondo viaco vi kola.

¹⁴ Eci ovitunda vi iñila, ka vi tundi oko ku kola ha vi endi kocitali cokosamua te vi lula uwalo wavio una via wala poku vumba, momo u kola. Kuenje vi wala uwalo wiñi osimbu ka via endele kuna ku kala kala omanu.

¹⁵ Eci a mala oku seteka onjo yovokati wa mitisila pombundi ya imba ovaso kutundilo, yu wa seteka ocitumãlo cosi conembele.

¹⁶ Wa seteka onẽle yokutundilo loluneva luoku seteka, loluneva luoku seteka ya soka ovita vitãlo kovikeya.

¹⁷ Wa ñualãpo kuenje wa seteka onẽle yoko Norte, loluneva luoku seteka ya soka ovita vitãlo kovikeya.

¹⁸ Wa ñualãpo kuenje wa seteka onẽle yoko Sul, loluneva luoku seteka ya soka ovita vitãlo kovikeya.

¹⁹ Wa ñualapo kuenje wa seteka onẽle yokutakelo, loluneva luoku seteka ya soka ovita vitãlo kovikeya.

²⁰ Wa seteka olonẽle vikuãla. Kua kala ocimbaka ca ñualapo, usõvĩ waco ovita vitãlo kovikeya, lupati waco ovita vitãlo kovikeya. Ca tepisa oku ku kola loku ka ku koli.