ESEKIELE 40 - Embimbiliya - Bíblia Sagrada em Umbundu

¹ Kulima wakũi avali latãlo wumandekua wetu, kefetikilo liulima, keteke liekũi kosãi, eci pa pita ale ekũi lialima kalima akuãla tunde koku nyõlẽha kuimbo linene, keteke liaco muẽle oco eka lia Yehova lia mbuila.

² Kuenje, vovinjoinjoi via Suku haimo, lia nualela kofeka ya Isareli, lia ñapa kilu liomunda yimue ya lepa calua. Konẽle yoko Sul kua kala cimue ca soka ndocitungilo cimbo.

³ Eci a nualako tala, kua mõlẽha omunu wa setãhãla ongula. Peka liaye pa kala ukolo welinyu kuenda oluneva luoku seteka. Yu o tãi pombundi.

⁴ Omunu waco wa popia lame hati, A Mõlõmunu, vanja lovaso ove, yeva lovatũi ove, kapa vutima wove cosi hu lekisa. Momo wa neniwila kulo okuti oco hu lekise. Sapuila epata lia Isareli cosi o lete.

⁵ Kuenje tala, ocisendelo cosi conembele ca ñualiwa locimbaka. Okulepa kuoluneva lua kala peka liomunu kua soka ovikeya epandu via lepa, okuti ukeya lukeya wa soka ndukeya kuenda epaluma. Kuenje wa seteka upati wocimbaka caco okuti oluneva lumosi, lutunga waco lawovo oluneva lumosi.

⁶ Oco weya kombundi ya imba ovaso kutundilo, yu wa londa oviliatelo viayo. Wa seteka olukuki luombundi okuti upati waluo oluneva lumosi.

⁷ Lohondo yelavelo yimosi usõvĩ wayo oluneva lumosi, lupati wayo haico oluneva. Pokati kohondo lohondo pa pindika ovikeya vitãlo. Lolukuki luombundi konẽle yocindumba combundi yovokati lua soka oluneva lumosi.

⁸ Wa setekavo ocindumba combundi kuenje ca soka ovikeya ecẽlãla.

⁹ Wa seteka olongunji viayo kuenje via soka ovikeya vivali. Ocindumba combundi ca imba ovaso vokati.

¹⁰ Konele lonẽle yombundi yokutundilo kua kala olohondo vitatu vielavelo, konẽle vitatu, konẽle vitatu. Katatu kavio oseteko yavio yimosi. Kuenda olongunji viavio viokonẽle lonẽle, laviovo oseteko yavio yimosi.

¹¹ Wa seteka upati wuvelo wombundi kuenje wa soka lekũi liovikeya, lusõvĩ wombundi wa soka lekũi liovikeya kovikeya vitatu.

¹² Kovaso yolohondo vielavelo, ohondo lohondo, kua kala ombambakau, usõvĩ wayo ukeya, lupati wayo ukeya. Lolohondo vielavelo via kala okuti usõvĩ wavio ovikeya epandu, lupati wavio ovikeya epandu.

¹³ Noke wa seteka ombundi tunde konyima yohondo yelavelo toke konyima yohondo yikuavo, kuenje kupati wayo ya soka akũi avali kovikeya kovikeya vitãlo, tunde kepito toke kepito.

¹⁴ Wa setekavo ocindumba kuenje ca soka akũi avali kovikeya. Locindumba cuvelo wombundi ca ñualĩwa locitali.

¹⁵ Tunde kuvelo wombundi ya kala koku iñilĩla toke kocindumba covokati combundi ca soka akũi atãlo kovikeya.

¹⁶ Lolohondo vielavelo via kala kolonjanela via tungiwa ndongayola. Locindumba lacovo ca kala lolonjanẽla vokati. Kolongunji kua kala oviti vieva.

¹⁷ Oco wa nuala vocitali cokosamua. Kua kala olohondo kuenda ocitali ca ñualĩwa lovawe a yaliwa posi. Kovawe aco va tungilako akũi atatu kolohondo.

¹⁸ Ovawe aco a kala konẽle yolombundi. Oku lepa kuaco kua lisoka loku lepa kuolombundi. O-o ovawe ovombuelo.

¹⁹ Noke wa seteka upati wocitali tunde konyima yombundi yokombuelo toke konẽle yokovaso yocitali covokati, kuenje ca soka ocita covikeya.

²⁰ Oco wa nuala kombundi yocitali cokosamua yina ya imba ovaso ko Norte yu wa seteka usõvĩ wayo lupati wayo.

²¹ Lolohondo viayo vielavelo okuti konẽle vitatu, konẽle vitatu, kuenda olongunji viayo lovindumba viayo, cosi ca soka loseteko yombundi yatete. Usõvĩ wayo akũi atãlo kovikeya, lupati wayo akũi avali kovikeya kovikeya vitãlo.

²² Lolonjanẽla viayo, locindumba cayo, loviti viayo vieva, cosi ca soka loseteko yombundi yina ya imba ovaso kutundilo. Kua kala oviliatelo epanduvali vioku londako, lovindumba viayo via kala vokati.

²³ Ombundi yoko Norte ndeyi yokutundilo ya imba ovaso kombundi yimue yokocitali covokati. Kuenje wa seteka tunde kombundi toke kombundi, ocita covikeya.

²⁴ Oco wa nuala konẽle yoko Sul. Kua kala ombundi ya imba ovaso ko Sul. Wa seteka olongunji viayo locindumba cayo. Oseteko yayo haiyo yimosi la vikuavo.

²⁵ Vokati mua kala olonjanela ndaño vocindumba cayo mua kalavo olonjanela ndolonjanẽla vikuavo. Usõvĩ wayo akũi atãlo kovikeya, lupati wayo akũi avali kovikeya kovikeya vitãlo.

²⁶ Kua kala oviliatelo epanduvali vioku londako. Locindumba cayo ca kala vokati. Kolongunji viayo kua kala oviti vieva, konẽle uti, konẽle uti.

²⁷ Konẽle yoko Sul yocitali covokati kua kalavo olombundi. Wa seteka tunde kombundi toke kombundi konẽle yoko Sul, ocita covikeya.

²⁸ Oco wa nuala kocitali covokati, oku iñilĩla kombundi yoko Sul. Wa seteka ombundi yoko Sul, oseteko yaco haiyo yimosi.

²⁹ Olohondo viaco vielavelo lolongunji viaco locindumba caco, oseteko yaco haiyo yimosi. Vokati mua kala olonjanela, ndaño vocindumba caco mua kalavo olonjanela. Usovi waco wa soka lakũi atãlo kovikeya, lupati waco akũi avali kovikeya kovikeya vitãlo.

³⁰ Kua kalavo ovindumba via ñualako, usõvĩ wavio akũi avali kovikeya kovikeya vitãlo, lupati wavio ovikeya vitãlo.

³¹ Ovindumba viayo via imba ovaso kocitali cokosamua. Kolongunji viayo kua kala oviti vieva. Ondondelo yayo ya kala loviliatelo ecelãla.

³² Noke wa nuala kocitali covokati konẽle yutundilo; yu wa seteka ombundi oseteko yayo haiyo yimosi.

³³ Olohondo viayo vielavelo lolongunji viayo, locindumba cayo, oseteko yaco haiyo yimosi. Vokati mua kala olonjanela, ndaño vocindumba cayo mua kalavo olonjanela, usõvĩ wayo wa soka lakũi atãlo kovikeya, lupati wayo akũi avali kovikeya kovikeya vitãlo.

³⁴ Ocindumba cayo ca imba ovaso kocitali cokosamua. Kolongunji kua kala oviti vieva, konẽle uti, konẽle uti. Ondondelo yayo ya kala loviliatelo ecelãla.

³⁵ Yu wa nuala kombundi yoko Norte, kuenje wa yi seteka, oseteko yayo haiyo yimosi.

³⁶ Olohondo viayo vielavelo lolongunji viayo locindumba cayo, oseteko yaco haiyo yimosi. Vokati mua kala olonjanela; usovi wayo wa soka lakũi atãlo kovikeya, lupati wayo akũi avali kovikeya kovikeya vitãlo.

³⁷ Locindumba cayo ca imba ovaso kocitali cokosamua. Kolongunji viayo kua kala oviti vieva, konẽle uti, konẽle uti. Ondondelo yayo ya kala loviliatelo ecelãla.

³⁸ Kolongunji violombundi kua kala ohondo yimue lepito liayo. Omo va sukowaila ocilumba coku pia elisi.

³⁹ Vocindumba combundi mua kala olomesa, konẽle vivali, konẽle vivali, oku ipayelako ocilumba coku pia elisi locilumba cekandu locilumba ceko.

⁴⁰ Kosamua yocindumba cokosamua, kondondelo yoku iñilĩla kuombundi yoko Norte, kua kala olomesa vivali. Konẽle yikuavo yocindumba combundi kua kalavo olomesa vivali.

⁴¹ Konẽle yopokati yombundi kua kala olomesa vikuãla, konẽle yoposamua yombundi kua kalavo olomesa vikuãla. Ca linga olomesa ecelãla oko va ipayela ovilumba.

⁴² Kua kalavo olomesa vikuãla viovawe a songiwa vioku ipayela ocilumba coku pia elisi, usõvĩ wavio wa soka ukeya komeyu, lupati haico ukeya komeyu, lokulepa kilu kua soka ukeya. Oko va kapa kapa ovikuata vioku ipaya ocilumba coku pia elisi leci cocitundasonde.

⁴³ Lolomateko via soka lepaluma via kala vokati kovimano viaco. Kolomesa va kapa kapako ositu yocilumba.

⁴⁴ Wa njupa posamua, wa nena kocitali covokati. Vocitali covokati mua kala olohondo vivali, yimue konẽle yombundi yoko Norte ya imba ovaso ko Sul, yikuavo konẽle yombundi yoko Sul ya imba ovaso ko Norte.

⁴⁵ Oco a popia lame hati, Ohondo yilo ya imba ovaso ko Sul oyo yovitunda vi kuete ocikele coku tata onembele.

⁴⁶ Ohondo ya imba ovaso ko Norte oyo yovitunda vi kuete ocikele coku tata utala. Ovitunda evi ovio omãla va Sadoke, kuenje pokati komãla va Lewi ovo lika va tẽla oku kokela ku Yehova oku u vumba.

⁴⁷ Oco wa seteka ocitali, vusõvĩ ocita covikeya, vupati ocita covikeya, avindi akuãla a lisoka. Lutala wa kala kovaso yonembele.

⁴⁸ Oco wa nuala kocindumba conembele, kuenje wa seteka olongunji viocindumba, onẽle ovikeya vitãlo, onẽle ovikeya vitãlo. Lupati wombundi wa soka ovikeya ekũi lavikuãla. Lovimano violonẽle viombundi via soka onẽle ovikeya vitatu, onẽle ovikeya vitatu.

⁴⁹ Usõvi wocindumba wa soka lakũi avali kovikeya, lupati ekũi kovikeya kovikeya vivali. Oku londako kua kala oviliatelo ekũi. Kolongunji kua kala olokoluna, konẽle yimue, konẽle yimue.