ESEKIELE 4 - Embimbiliya - Bíblia Sagrada em Umbundu

¹ Oco ove, a Mõlõmunu, yelula etisolo, li kapa kovaso ove, kuenje luvikiyamo imbo lia Yerusalãi.

² Ñualĩsako ocingonja, loku tungilako olombonge. Ongeka olondunda vieve. Tungilako ovilombo. Kapa olomakina vioku yaka kolonẽle viaco.

³ Love, yelula elonga liutale, li kapa ndocimbaka cutale pokati kove limbo. Li imba ovaso, oco li ñualĩsa ocingonja. Love o li ñuala ocingonja. Eci oco ocindekaise cokepata lia Isareli.

⁴ Lovevo lilangeka konele yove yepĩli. Hu wilisa ove eyambulo liepata lia Isareli momo oloneke o pekela konele yaco havio o lituika eyambulo lialio.

⁵ Omo ame nda ku tukuila oloneke viaco okuti ovita vitatu kakũi ecea koloneke. Momo oku tendiwa kuaco kuoloneke hako oku tendiwa kuanyamo eyambulo liaco. Ove o lituika eyambulo liepata lia Isareli.

⁶ Kuenda vali, eci wa vi tẽlisa, o pongoloka hu lilangeka konele yondio, oco o lituika eyambulo liepata lia Yuda. Akũi akuãla koloneke nda ku tukuila okuti ulima eteke, ulima eteke,

⁷ Oco wimba ovaso kocingonja ca Yerusalãi, lokuokuo kuove ku siuluiwa. Wimbila imbo owanji wovitumasuku.

⁸ Kuenje tala, hu kapa ovikolo, oco ku pongolokela konele yikuavo, toke o tẽlisa oloneke viocingonja cove.

⁹ Oco ove, nyañula otiliku losevata locipoke lohale lasangu kuenda ovasa. Vi kapa vombia yimosi. Linga lavio ombolo. Oloneke ovita vitatu kakũi ecea o pekela konele yove o lialiako.

¹⁰ Lokulia kuove o lialia ku soka ndopesu yakũi avali kolosiekele eteke leteke. O lialia veteke onjanja, veteke onjanja.

¹¹ Lovava o nyuanyua a yongiwavo, onepa yepandu yohine eteke leteke. O nyuanyua veteke onjanja veteke onjanja.

¹² Kuenje eci o lia ci kala ndakende osevata wa yoka keniña liomunu kovaso avo.

¹³ Yehova hati, Haico omãla va Isareli va ka lialia ombolo yavo ya vihĩsua pokati kapata kuosi ndi va sandowaila.

¹⁴ Oco nda linga siti, A Ñala Yehova, ota, utima wange ka wa la vihĩsua, momo sia la lia eci ca fa, ndaño eci ca nyanyoha lovinyama, tunde kutila wange toke cilo. Ndaño ositu yimue yi lingisa onyanya ka yi la imbiwa vomẽla wange.

¹⁵ Oco wa popia lame hati, Tala, huĩha aniña ongombe pomangu yeniña liomunu, oko o yoka ombolo yove.

¹⁶ Yu wa popia vali lame, hati, A Mõlõmunu, tala, ame ndi nyanyõla ombolo yeteku vo Yerusalãi. Va lia lohele ombolo yi pesaliwa. Va nyua losuama ovava a yongiwa.

¹⁷ Ndi ci lingila okuti oco va suke ombolo lovava, kuenje va livanja loku suangala, loku hongua kuiya leyambulo liavo.