ESEKIELE 39 - Embimbiliya - Bíblia Sagrada em Umbundu

¹ Love, a Mõlõmunu, imba owanji woku pisa Goge. Popia huti, Ca popia Ñala Yehova ceci, hati, Ota, nda ku pongolokelamo, a Goge, ove usoma yinene ya Meseke la Tuvale.

² Kuenje hu tiula, hu songuila, loku ku upa kuna ka ku ci, ka ku ci, ko Norte. Hu katuisila olomunda via Isareli.

³ Ohonji yi kasi peka liove liepĩli ndi yi kupula, ndaño ovisongo vi kasi peka liondio.

⁴ Ove o kupukila kolomunda via Isareli, ove lolohoka viove viosi, lomanu va kasi love. Hu eca kolonjila viñi viñi vina vi lialia ositu, kuenda kovinyama viovusenge okuti o liwa.

⁵ O kupukila vanyala; momo ame nda popia. Oco ca popia Ñala Yehova.

⁶ Numa ondalu ko Magoge kuenda kokuava va tunga loku huima kolonẽle viokalunga. Kuenje va limbuka okuti ame ndi Yehova.

⁷ Londuko yange yi kola ndi yi situluila pokati komanu vange va Isareli. Lalimue vali eteke nava okuti onduko yange yi kola yi sawuka. Lolofeka vi limbuka okuti ame ndi Yehova, u o kola vo Isareli.

⁸ Tala ciya, kuenje ci lingiwa. Ñala Yehova wa popia. Eli olio eteke nda tukuile.

⁹ Lava va tunga vovaimbo a Isareli va tundamo, va siakãla ondalu lovimãleho. Va yoka olotevele loviyepelo, olohonji lovisongo, olombueti vio peka lovonga. Va siakãla lavio ondalu alima epanduvali,

¹⁰ okuti ka va sukila vali oku tiaña olohui kovapia, pamue oku vi timbula kasisi. Momo va siakãla lovimãleho; va punda vana va va pundile, va nyẽha vana va va nyẽhele. Ñala Yehova wa popia.

¹¹ Eteke liaco ngeca ku Goge usenge wayambo vofeka ya Isareli okuti ocimbota ca Abarini kesinya liokalunga kokufa kutundilo. Ocimbota caco ci sitikiwa momo oko va kenda Goge lowiñi waye wosi, kuenje va ci tukula vati, Cimbota cowiñi wa Goge.

¹² Va Isareli va pesela olosãi epanduvali oku va kenda okuti oco ofeka yi yelisue.

¹³ Omanu vosi vakuafeka va va kenda, kuenje va kemalisua eteke ndekisa ulamba wange. Oco ca popia Ñala Yehova.

¹⁴ Va nola alume va ñuala ñuala vofeka ha va kendi ava va sialamo oco mu yelisue. Kefulilo liolosãi epanduvali va vanjiliya.

¹⁵ Leci va pita vofeka nda umue o lete ekepa liomunu o li kapa ondimbukiso toke vakuakukenda va li kenda vocimbota cowiñi wa Goge.

¹⁶ Oco va yelisa ofeka. Mulivo imbo va li tukula vati, Wiñi.

¹⁷ Love a Mõlõmunu, Ñala Yehova wa popia love hati, Popia lapata osi olonjila lovinyama viosi viovusenge, huti, Likongeli. Tundilili kolonẽle viosi. Enjui kofesta yocilumba ñasi oku vu pongiyilili kolomunda via Isareli, ofesta yinene yocilumba oko vu lia ositu loku nyua osonde.

¹⁸ Vu lia ositu ya vakuonene loku nyua osonde yolosoma vio kilu lieve, leyi yolomanga lotumeme, leyi yolonupi lotunui tuolongombe, viosi via netisilua vo Basiane.

¹⁹ Kofesta yange yocilumba yina ñasi oku vu pongiyila vu lia alenda toke we kuti, vu nyua osonde toke wa kolui.

²⁰ Kuenje komesa yange oko vu kutisilui lotuvalu la vakuakuendela kotuvalu kuenda vakuonene lasualali vaiñi vaiñi. Oco ca popia Ñala Yehova.

²¹ Oco ñapa ulamba wange pokati kolofeka. Lolofeka viosi vi mõla onetululo yange nda tetulula, kuenda eka liange nda kapa kokuavo.

²² Oco, tunde keteke liaco toke kovaso, epata lia Isareli li limbuka okuti ame ndi Yehova Suku yavo.

²³ Lolofeka vi limbuka okuti epata lia Isareli kumandekua lia endeleleko ahuku avo. Omo va ndingilile usuanji oco nda va wundisilile ocipala cange, kuenje nda va telekalele Povaka ovanyãli vavo, yu vosi yavo va kupuka losipata.

²⁴ Nda linga lavo ndeci ca soka levĩho liavo kuenda ahuku avo. Nda va wundisilile ocipala cange.

²⁵ Oco, ca popia Ñala Yehova ceci, hati, Oco cilo numbulula vali esumũlũho lia Yakoba. Ñuatela ohenda epata liosi lia Isareli. Sumbisa onduko yange yi kola.

²⁶ Va ivalako osõi yavo lusuanji wosi va ndingilile eci va tunga loku huima vofeka yavo lu o va yokokisa ka kuli,

²⁷ leci nda ka vopile pokati kapata aiñi aiñi loku va ongolola kolofeka viovanyali vavo. Eci okukola kuange ku kolisua kovaso apata pokati kovina ndi va vi lingila,

²⁸ oco va limbuka okuti ame ndi Yehova Suku yavo, momo nda va tumĩle kumandekua pokati kolofeka, haime nda va nena vali kofeka yavo muẽle. Lomue umosi pokati kavo ndi sia vali volofeka.

²⁹ Eci sukumuĩla epata lia Isareli Espiritu liange si va wundisila vali ocipala cange. Oco ca popia Ñala Yehova.