ESEKIELE 36 - Embimbiliya - Bíblia Sagrada em Umbundu

¹ Love, a Mõlõmunu, imba owanji kolomunda via Isareli. Popia huti, Alomunda via Isareli, yevi ondaka ya Yehova.

² Ca popia Ñala Yehova ceci, hati, Omo unyãli wo yoli epembe hati, Olonumbuko viosiãhũlu via linga vietu,

³ oco, imba owanji, popia huti, Ca popia Ñala Yehova ceci, hati, Omo vo kunduli kuenje vo tundili kolonẽle viosi oku vu sakalaisa okuti wa lingi ocipiñalo colofeka vi lisungue lene, yu wa lingi ndesapulo pokati komanu, kuenje vo wendisili olombonde vĩvĩ,

⁴ oco, alomunda via Isareli, yevi ondaka ya Ñala Yehova. Ca popia Ñala Yehova kolomunda kuenda koviwulu, kolondamba lokovimbota, kakalasoko kuenda kalunda ana a kuatiwa hao a suangiwa lolofeka vikuavo vi lisungue lene,

⁵ ca popia Ñala Yehova ceci, hati, Lutima wa sanya lonyeño misa olofeka vi lisungue lene. Misavo Edome yosi, vana va kuata ofeka yange lovitima vie yuka esanju, letombo lia piãla okuti yi linga yavo oku punda.

⁶ Oco imbila ofeka ya Isareli owanji. Popia kolomunda lokoviwulu, kolondamba lokovimbota, huti, Ca popia Ñala Yehova ceci, hati, Ota, mopia lutima we yuka lonyeño lesepa omo wa kutisui osõi kovaso olofeka.

⁷ Oco Ñala Yehova hati, Ame ndi lisila okuti olofeka vi kasi kolonẽle viene laviovo vi kutisuavo osõi.

⁸ Puãi ene, alomunda via Isareli, vu yova olonãvi kuenje wimĩla omanu vange va Isareli epako; momo otembo yokutiuka kuavo yi kasi ocipepi.

⁹ Momo, tala, ndinyima yene, ndu likundiki, kuenje vu limiwa loku kũlĩwa.

¹⁰ Ndu luisili omanu ndokuti epata liosi lia Isareli, liosi muẽle. Vovaimbo mu kala omanu, lovitumãlo via nyõlẽhele vi tumbuluiwa.

¹¹ Oco ndu luisili omanu lovinyama. Ci licita ha ci siati. Ndu tungisi ndeci cosimbu kuenje ndu lingili ohenda yalua okuti yina ndo lingilili ale yi sule. Oco vu limbuka okuti ame ndi Yehova.

¹² Ocili muẽle ngendisa omanu vange kokuene, okuti omanu vange va Isareli. Ovo vo fuki, ene vu lingi ocipiñalo cavo, ene ka vu va pumbisa vali omãla.

¹³ Ca popia Ñala Yehova ceci, hati, Omo omanu va vangula lene vati, Wu nyõla nyõla omanu, vu pumbaisa ofeka yene omãla,

¹⁴ oco tunde opo, ka vu nyõla nyõla vali omanu, ndaño oku pumbisa ofeka yene omãla. Ñala Yehova wa ci popia.

¹⁵ Kuenje si tava okuti vu yeva yeva vali epembe liolofeka. Ka vu tali vali ohali yoku fukĩlĩsua lomanu. Ka vu konjuisa vali ofeka yene. Oco ca popia Ñala Yehova.

¹⁶ Ondaka ya Yehova yeya kokuange yiti,

¹⁷ A Mõlõmunu, eci epata lia Isareli lia tungile vofeka yavo muẽle va yi vĩhĩsa lovituwa viavo lovilinga viavo. Okukala kuavo kovaso ange kua sokele ndokuvĩha kukãi o kasi kocituwa.

¹⁸ Oco nda va sukumuĩlĩle onyeño yange mekonda liosonde va peselele vofeka kuenda mekonda lioviteka va yi vĩhĩsile lavio.

¹⁹ Nda va sanduilile pokati kapata. Va sandokalaile kolofeka. Ca soka lokukala kuavo lovilinga viavo oco nda va tetuluila laco.

²⁰ Eci va pitila kapata kuosi va enda va vĩhĩsa onduko yange yi kola, okuti omanu va va popia vati, Ava ovo omanu va Yehova haimo va tundisua vofeka yaye.

²¹ Puãi nda ivaluka onduko yange yi kola yina epata lia Isareli lia vĩhĩsa pokati kolofeka oko va enda.

²² Oco popia lepata lia Isareli huti, Ca popia Ñala Yehova ceci, hati, Apata lia Isareli, hamekonda lieneko ndingila eci ñasi loku linga, puãi mekonda lionduko yange yi kola, yina wa vĩhĩsili pokati kolofeka kuna wa endeli.

²³ Lame ñolisa okukola kuonduko yange yinene, yina ya vĩhĩsiwile pokati kolofeka, yina ene muẽle wa yi vĩhĩsisili pokati kavo. Kuenje olofeka vi limbuka okuti ame ndi Yehova eci okukola kuange ku kolisua kovaso avo mekonda liokukala kuange pokati kene. Ñala Yehova wa ci popia.

²⁴ Kuenje ndu wupi pokati kapata. Ndu wongololi kolofeka viosi. Ndu neni vofeka yene muẽle.

²⁵ Oco ndu nyĩli ovava a yela okuti vu yelisua kevĩho liene liosi. Ndu yelisi koviteka viene viosi.

²⁶ Ndu wĩhi utima wokaliye. Ñapa pokati kene espiritu liokaliye. Ndu wupi utima wewe, ndu kapi utima womuenyo.

²⁷ Kuenje ndu fuimĩli omuenyo wange, loku wendisili vovisila viange ho tati oviholo viange, loku vi linga.

²⁸ Vu tunga vofeka yina nda ecele kolosekulu viene. Ene vu linga omanu vange, lame ndinga Suku yene.

²⁹ Oco ndu popeli kevĩho liene liosi. Ñovonga olomema loku vi luisa. Onjala siu muisi vali.

³⁰ Nduisa epako koviti, lovaima kovapia, ndokuti ko mõli vali epembe lionjala pokati kolofeka.

³¹ Kovaso yaco, wivaluki olongenda viene vĩvi lovilinga viene ka via sungulukile. Vu likuatela ene muẽle onanya mekonda liolohole viene lovombondo ene.

³² Ñala Yehova hati, Apata lia Isareli, hamekonda lieneko ndi ci lingila. Kutisui osõi loku sakalalela olongenda viene.

³³ Ca popia Ñala Yehova ceci, hati, Eteke ndu yelisi kolohole viene viosi oco ndinga okuti vovaimbo mu kala omanu, lovitumãlo via nyõlẽhele vi tungiwa.

³⁴ Losi yina ya vongele yi limiwa okuti oku kala vali ocipembe kovaso a vosi va pitako hacoko vali.

³⁵ Lavovo va linga vati, Osi ya kaile ocipembe cilo ya linga ndocumbo ce Edene. Lovaimbo ana a nyõlẽhẽle kuenda a kundukile hao a lingile akalasoko, cilo a tungiwa vali, a kolisua.

³⁶ Oco olofeka via sialapo vio ñuali vi limbuka okuti ame ndi Yehova, ame nda tunga vali ovitumãlo via nyõlẽhẽle, haime nda lima vali eci ca vongele. Ame ndi Yehova nda ci popia, kuenje ndi ci linga.

³⁷ Ca popia Ñala Yehova ceci hati, Cikuavo navavo okuti epata lia Isareli li pinga okuti ndi va ci lingila ceci, okuti, oku uisa omanu vavo ndocunda.

³⁸ Ndocunda ci kola covilumba, ndocunda ci kala kala ko Yerusalãi kotembo yolofesta viayo, haico ovaimbo ana a kaile alunda e yuka lowiñi womanu. Oco va kũlĩha okuti ame ndi Yehova.