ESEKIELE 34 - Embimbiliya - Bíblia Sagrada em Umbundu

¹ Ondaka ya Yehova yeya kokuange yiti,

² A Mõlõmunu, imba owanji woku pisa ovangombo va Isareli. Imba owanji, popia muẽle lovangombo. Popia lavo huti, Ca popia Ñala Yehova ceci, hati, Ovangombo va Isareli va litekola ovo muẽle, ngongo yavo! Ovangombo he, ka va lisa lisa olomeme?

³ Vu lialia via neta. Vu liwalisa olonanga viovonya olomeme. Wipayi otumeme tua netisua, puãi ka vu lisa lisa olomeme.

⁴ Via homa ka wa vi kolisili. Vi vela ka wa vi sakuili. Via teka ka wa vitikili. Via panjuka ka wa vi kondoluili. Via nyẽlẽla ka wa vi sandiliyili, puãi wa vi tulamẽli longusu loku vi kangisa.

⁵ Oco via sandokaila momo ka kua kaile ungombo. Via linga okulia kuovinyama viosi viovusenge.

⁶ Olomeme viange via sandoka, via tungayala kolomunda viosi kuenda koviwulu viosi. Olomeme viange via sandokaila kovivanja viosi violofeka, lu o vi sanda loku vi vanjiliya lomue.

⁷ Oco ene, avangombo, yevi ondaka ya Yehova:

⁸ Ñala Yehova hati, Ndomo ñasi lomuenyo, omo olomeme viange via enda loku kuatiwa, kuenje olomeme viange via linga okulia kuovinyama viosi viovusenge momo ka kua kaile ungombo, lomo ovangombo vange ka va sandiliyile olomeme viange, puãi ovangombo va litekola ovo muẽle, ka va lisaile olomeme viange,

⁹ oco ene, avangombo, yevi ondaka ya Yehova.

¹⁰ Ca popia Ñala Yehova ceci, hati, Ota, nda pongolokelamo ovangombo. Milika olomeme viange peka liavo. Ndi va liwekisapo oku lisa olomeme. Ovangombo ka va litekola vali ovo muẽle. Mopela olomeme viange kolomẽla viavo oco ka vi ka linge vali eteku liavo.

¹¹ Momo Ñala Yehova hati, Tala, ame, ame muẽle, sanda olomeme viange loku vi vanjiliya.

¹² Ndeci ungombo a sandiliya olomeme viaye nda vimue kolomeme viaye via sandoka haico ame sandiliya olomeme viange, hã si vi ongolola kuosi via sandokalale keteke lialende lowelema walua.

¹³ Ndi vi upa kapata, ndi vi ongolola kolofeka, ndi vi nena kofeka yavio muẽle. Ndi vi lisila kolomunda via Isareli, ocipepi lokolono kuenda kovitungilo viosi viofeka.

¹⁴ Ndi vi lisila kowangu uwa, kuenda kolomunda via Isareli ku kala ulisilo wavio. Vi pekela vulisilo uwa woku kumba. Vi lila kovilisilo viwa vi kasi kolomunda via Isareli.

¹⁵ Ame, ame muẽle, ndinga ungombo wolomeme viange haime ndi vi puyuisa. Oco Ñala Yehova a popia.

¹⁶ Ya nyẽlẽla ndi yi vanjiliya. Ya panjuka ndi yi kondolola. Ya teka ndi yitika. Ya hongua ndi yi kolisa. Ya neta leyi ya pama ndi vi tata, ndi vi lisa ciwa.

¹⁷ Ñala Yehova hati, Ene alomeme viange, tala, netulula pokati kolomeme lolomeme, pokati kolomanga lolonupi.

¹⁸ Ka cu tẽli hẽ oku lialia owangu uwa? Haimo ukuavo vu u kosi lolomãi viene? Pamue oku nyuanyua ovava a yela, haimo akuavo wa a vengisi lolomãi viene?

¹⁹ Olomeme viange hẽ, vi lia eci ca kosiwa lolomãi viene, vi nyua eci ca vengisua lolomãi viene?

²⁰ Oco Ñala Yehova wa popia lavo hati, Ota! Ame, ame muẽle, netulula pokati kolomeme via neta levi via hongua.

²¹ Momo vu fuita lonẽle lepepe kuenda vu toma lolombinga viene evi via hongua toke vu vi sanduila kupãla.

²² Ame mopela olomeme viange okuti ka vi kuatiwa vali, kuenje netulula pokati kolomeme lolomeme.

²³ Ndi vi kapa ungombo umosi okuti ukuenje wange Daviti. Eye o vi lisa, o vi lisa kuenje o linga ungombo wavio.

²⁴ Kuenje ame ndi Yehova ndinga Suku yavio, lukuenje wange Daviti o linga osoma yavio. Ame ndi Yehova ame nda ci popia.

²⁵ Kuenje ndi lisila lavio ocisila combembua. Nundisa vofeka ovinyama via tema okuti olomeme vi kala ciwa vakalasoko loku pekela vovisenge.

²⁶ Kuenje ndi vi lingisa ndesumũlũho, ovio muẽle kumue lovitumãlo via ñuala omunda yange. Ndokaisa ombela kuvo wayo. Ombela yaco yi linga ombela yesumũlũho.

²⁷ Oviti viusenge vi eca apako avio, losi yeca ovaima ayo. Vi koka vofeka yavio, kuenje vi limbuka okuti ame ndi Yehova eci neya oviti viomi yavo, leci ndi va popela peka liava va vi vumbisile.

²⁸ Oco ka vi kuatiwa vali lolofeka, lovinyama viusenge ka vi vi takĩla vali. Puãi vi koka, lomue o vi lingisa vali usumba.

²⁹ Ndi vi muisa ovisenge via posoka okuti ka vi kala vali lonjala vofeka, ndaño oku tombiwa vali lolofeka.

³⁰ Kuenje vi kũlĩha okuti ame ndi Yehova Suku yavio ame ñasi lavio, lovio, haivio epata lia Isareli, ovio omanu vange. Oco ca popia Ñala Yehova.

³¹ Ene vulomeme viange, haene vulomeme viovusenge wange. Lame, ame ndi Suku yene. Oco ca popia Ñala Yehova.