ESEKIELE 32 - Embimbiliya - Bíblia Sagrada em Umbundu

¹ Kunyamo wekũi lavali, kosai yekũi lavali, keteke liatete kosãi, ondaka ya Yehova yeya kokuange yiti,

² A Mõlõmunu, lisiõsuĩla Fareo osoma ya Egito. Popia laye huti, Wa lisokisa ndohosi pokati kolofeka, puãi wa soka ndocimuandu vokalunga. O pamba ovava, o venga ovava lolomãi viove kuenje o liñisa olondui.

³ Oco Ñala Yehova hati, Hu nyanyumuĩla owanda wange lowiñi womanu valua. Hu koka lowanda wange.

⁴ Hu takumuĩla kongongo kuenje hu imba venyala. Hu vatisa olonjila viosi viovilu. Ñutisa ovinyama viosi viokilu lieve lositu yove.

⁵ Nyalẽha ositu yove kolomunda, loku yukisa ovimbota lakepa ove.

⁶ Losonde yove yi ku tunda njulisa layo ofeka toke kolomunda. Ovilukua vi yuka layo.

⁷ Eci hu takisa sitika ovailu loku tekavisa olombungululu viao. Sitika ekumbi lelende, losãi ka yi eci owi wayo.

⁸ Ovinyi viosi via tuila kilu hu vi tekãvĩsila, kuenje nena owelema kofeka yove. Oco ca popia Ñala Yehova.

⁹ Sumuisa ovitima viapata a lua eci sapula okunyõlẽha kuove kolofeka, kolofeka kuna kua kũlĩhĩle.

¹⁰ Njokokisa apata a lua mekonda liove. Olosoma viaco vi luluma loku ku kuatela ocinjoko eci ndi va sakumuĩla osipata yange. Keteke lioku nyõlẽha kuove, eteke liaco liosi, va luluma, omunu o lulumĩla omuenyo waye, omunu o lulumĩla omuenyo waye.

¹¹ Momo ca popia Ñala Yehova ceci, hati, Osipata yosoma ya Bavulono yiya kokuove.

¹² Ñupula owiñi wove lolosipata via vakuonene, vosi ava ovo va piãla koku kangisa pokati kolofeka. Va nyõla okulituna kue Egito, lowiñi waco wosi u nyõlẽha.

¹³ Ñundula ovinyama viosi vi kasi kolonele violondui. Layimue omãi yomunu yi va sakalaisa vali, ndaño akonjo ovinyama ka a va sakalaisa.

¹⁴ Noke mbenguluisa ovava avo loku pitisa olondui viavo ndulela. Oco ca popia Ñala Yehova.

¹⁵ Eci ñundula ofeka ye Egito, leci ofeka yi upiwa cosi ye yuka laco, leci ñundula vosi va tungamo, oco va limbuka okuti ame ndi Yehova.

¹⁶ Oku oko okulisiõsiõla va lisiõsuĩla; omãla vakãi volofeka va ku lisiõsuĩla. Va lisiõsuĩla Egito lowiñi wayo wosi. Oco ca popia Ñala Yehova.

¹⁷ Kunyamo wekũi lavali, kosãi yatete, keteke liekũi latãlo kosãi, ondaka ya Yehova yeya kokuange yiti,

¹⁸ A Mõlõmunu, lisiõsuĩla omanu va Egito. Va tuma kakungu a longa kokuava va lokila konjembo, eye kumosi lomãla vakãi volofeka via kemãla.

¹⁹ Wa piãla elie keposo? Loka, langekiwa kumosi loviyamba.

²⁰ Va kupukila pokati kava va pondiwa losipata. Pekela posi, ove lowiñi wove wosi.

²¹ Oco konjembo ku tunda ondaka yolosoma via kemãla yoku u lombolola eye loloñuatisi viaye, yiti, Va loka, va langekiwa kumosi loviyamba, pokati kava va pondiwa losipata.

²² Oko ku kasi Asuria lomanu vaye vosi. Ayambo avo o ñuala. Vosi yavo va pondiwa, va kupuiwa losipata.

²³ Ayambo avo a kapiwa vokati konjembo, lomanu vaye va ñuala eyambo liaye. Vosi yavo va pondiwa, va kupuiwa losipata, ovo vana va lingaisaile usumba ofeka ya vakuamuenyo.

²⁴ Oko ku kasi Elami, lowiñi waye wosi wa ñuala eyambo liaye. Vosi yavo va pondiwa, va kupuiwa losipata, ovo va enda luyamba kakungu a longa, ovo vana va lingaisaile usumba ofeka ya vakuamenyo. Va kutisuila osõi kumosi lava va lokila konjembo.

²⁵ Vo yalela ula kumue lowiñi waye wosi pokati kava va pondiwa. Ayambo avo o ñuala. Vosi yavo oviyamba, va fa losipata. Momo va lingaisaile usumba ofeka ya vakuamuenyo, va kutisuila osõi kumue lava va lokila konjembo. Va langekiwa pokati kava va pondiwa.

²⁶ Oko ku kasi Meseke la Tuvale lowiñi wavo wosi. Ayambo avo a va ñuala. Vosi yavo oviyamba, va fa losipata, omo va lingaisaile usumba ofeka ya vakuamenyo.

²⁷ Ka va langekiwila kumosi lomanu va kemãla, vana va lokila vonjembo lovimãlẽho viavo vioku yaka, kuenje olosipata viavo via kapiwa vemẽhi liovitue viavo, lolotevele viavo vi kasi kilu liakepa avo, momo unene wavo wa lingaisaile usumba ofeka ya vakuamuenyo.

²⁸ Oco ove o teyiwa kuenje o langekiwa pokati koviyamba kumosi lava va fa losipata.

²⁹ Oko ku kasi Edome kumosi lolosoma viaye lomãla vavo vosi. Unene wavo wa luile tupu va langekiwa kumue lava va fa losipata. Va langekiwa loviyamba lava va lokila konjembo.

³⁰ Oko ku kasi omãla volosoma vioko Norte, vosi yavo, kuenda va Sidono vosi, va lokilako kumosi lava va pondiwa, va lokilako losõi mekonda liusumba va lingaisaile lunene wavo. Oviyamba tupu haimo va langekiwa kumosi lava va fa losipata. Va kutiwa osõi kumosi lava va lokila konjembo.

³¹ Eci Fareo a va mola oco o lembelekua oku ivaluka owiñi waye wosi, eye muẽle Fareo locitundo caye cosi casualali, vana va fa losipata. Oco ca popia Ñala Yehova.

³² Omo wa lingaisaile usumba ofeka ya vakuamuenyo, oco o langekiwa pokati loviyamba, kumue lava va fa losipata, ndaño Fareo lowiñi waye wosi. Oco ca popia Ñala Yehova.