ESEKIELE 30 - Embimbiliya - Bíblia Sagrada em Umbundu

¹ Ondaka ya Yehova yeya vali kokuange yiti,

² A Mõlõmunu, imba owanji. Popia huti, Ca popia Ñala Yehova ceci, hati, Leñi, leñi, lingi hoti, A mãi we! eteke liohali lieya!

³ Eteke liaco lia kokela, eteke lia Yehova likasi ocipepi. Li kala eteke lialende, liotembo yekundu liolofeka.

⁴ Ke Egito kuiya osipata kuenje vo Etiopia mu kala otokua, eci ava va pondiwa ve Egito va kupuka, kuenje omanu vayo vambatiwa, loviseveto viayo vi papuluiwa.

⁵ Etiopia la Puti la Ludu lomanu vosi va Arabia la va Libia la va Kurete va nyõlẽhela kumosi losipata.

⁶ Ca popia Ñala Yehova ceci, hati, Ava va tundila Egito olunda va kupuka, lunene waye, una wo kokisa epela, wimũha. Vokati kaye, tunde ko Mingidole toke ko Suwene, va fa losipata.

⁷ Oco ca popia Ñala Yehova. Kuenje o linga elunda pokati kolofeka via linga alunda, lovaimbo aye a kala pokati kovaimbo a linga alunda.

⁸ Oco va limbuka okuti ame ndi Yehova, eci nimĩha Egito kuenje oloñuatisi viayo viosi vi kunduka.

⁹ Keteke liaco kokuange ku tunda olomunga vioku yokokisa va Etiopia va lipolapo. Kokuavo kuiya otokua eteke liekundu lia Egito; momo tala, ciya.

¹⁰ Ca popia Ñala Yehova ceci, hati, Malapo owiñi we Egito leka lia Nevukandesa osoma ya Bavulono.

¹¹ Eye kumue lomanu vaye vana va piãla kungangala va tualiwa oku nyõla ofeka. Olosipata viavo va vi somuĩla Egito. Va yukisa ofeka lava va pondiwa.

¹² Lolui Nilu ndu lu kukutisa, lofeka ndi yi landisa oku yeca peka liomanu vãvĩ. Leka lia vakualofeka ñundula ofeka la cosi ci kasimo. Ame ndi Yehova nda popia.

¹³ Ca popia Ñala Yehova ceci, hati, Nyõla oviteka loku nyimũla oviñumañuma vioko Memfisi. Ka mu kala vali osoma vofeka ye Egito. Ñapa muẽle usumba vofeka ye Egito.

¹⁴ Kuenje ñundula Patirosi, nimĩha Coana, netuluila Tebe.

¹⁵ Sukumuĩla Pelusio, ombonge yavo Egito, onyeño yange. Ñundula owiñi wa Tebe.

¹⁶ Nimĩha Egito. Pelusio o sanga otokua yalua. Tebe o nyõlẽha, Memfisi o kunduka.

¹⁷ Ovikuenjepombo vioko Awene la Pivesete vi fa losipata, lakãi vaco va enda umandekua.

¹⁸ Kuenje vo Tehafinehese, eteke nyõla usoma we Egito, utanya u pongoloka owelema. Leci unene waye, una wo kokisa epela, wimũha oco o sitikua lelende.

¹⁹ Oco netuluila Egito, kuenje va limbuka okuti ame ndi Yehova.

²⁰ Kunyamo wekũi lamosi, kosãi yatete, keteke liepanduvali kosãi, ondaka ya Yehova yeya kokuange yiti,

²¹ A Mõlõmunu, nda teya okuokuo kua Fareo osoma ye Egito, kuenje tala, ka kua pandekiwile okuti ku sakuiwa poku ku iña lonanga ha ku pami vali oku kuata osipata.

²² Oco Ñala Yehova hati, Ota, mekonda liaco, ame nda tundila Fareo osoma ye Egito. Neya ovoko aye, loku kua pama loku kua teka ale,, kuenje ñupuisa peka liaye osipata.

²³ Sanduila va Egito kapata loku va nyanyowaila kolofeka.

²⁴ Ñolĩsa ovoko osoma ya Bavulono. Ñapa osipata yange peka liaye; puãi neya ovoko a Fareo, kuenje o kumbaila kovaso aye ndongase ya nyoñamẽla kokufa.

²⁵ Ñolĩsa ovoko osoma ya Bavulono, puãi ovoko a Fareo a kupuka. Va limbuka okuti ame ndi Yehova. Eci ñapa osipata yange peka liosoma ya Bavulono eye o yoluila kofeka ya Egito.

²⁶ Sanduila va Egito kapata loku va nyanyowaila kolofeka. Oco va limbuka okuti ame ndi Yehova.