ESEKIELE 3 - Embimbiliya - Bíblia Sagrada em Umbundu

¹ Yu wa popia lame, hati, A Mõlõmunu, lia eci ca ku ihiwa, lia ociña eci. Kuende, ka popie lepata lia Isareli.

² Oco nda asama, kuenje wa ndisa ociña caco.

³ Yu wa sapuila hati, A Mõlõmunu, lia ociña cilo huĩha, kutisa laco imo liove. Oco nda ci lia kuenje vomẽla wange ca sõsa ndowiki.

⁴ Kuenje wa popia lame, hati, A Mõlõmunu, kuende kepata lia Isareli. Popia lavo olondaka viange.

⁵ Momo ove kua tumiwĩle komanu vakuelimi ka lia kũlĩhĩwile pamue lia tila, puãi kepata lia Isareli.

⁶ Hakomanu valuako vakuelimi ka lia kũlĩhĩwile pamue lia tĩla okuti olondaka viaco ka viu ku lomboloka. Nda nda ku tumile kokuavo nda va ku yeva muẽle ocili.

⁷ Puãi epata lia Isareli ka li yongola oku ku yeva, momo ka li yongola oku njeva ame, momo epata lia Isareli liosi lia kevela hailio liumbinde.

⁸ Puãi hu sokisa lavo koku kevela lokumbinde.

⁹ Hu sokisa ndutale koku kola, ewe li sule. Ku ka va yokokele. Ku ka lulume eci va ku vanja, momo vakuepata liusuanji.

¹⁰ Kuenje wa popia lame, hati, Kapa vutima wove olondaka viosi mbangula love. Vi yevelela lovatuĩ ove.

¹¹ Kuende kolomandekua viaco havo omanu vove. Popia lavo, huti, Ca popia Ñala Yehova ceci, nda va yeva, nda ka va yevi.

¹² Oco Espiritu lia njelula, kuenje osimbu ulamba wa Yehova wa tunda komangu yawo, konyima yange nda yeva onjuvungo hutiño ocilemawe cinene.

¹³ Onjuvungo yaco onjuvungo yavava oviendalomuenyo a liveta kumosi, lonjuvungo yalola kumosi lao, onjuvungo yaco hutiño ondindimo yinene.

¹⁴ Oco espiritu lia njelula kuenje lia ngambata, yu nda enda lesumuo lutima wa feluka. Leka lia Yehova lia mbuila longusu.

¹⁵ Kuenje ndeya kolomandekua ko Telavivi, vina via tunga ocipepi lolui Kevare. Nda kalako lavo oloneke epanduvali loku komõha enene.

¹⁶ Kuenje kefulilo lioloneke epanduvali ondaka ya Yehova yeya kokuange, yiti,

¹⁷ A Mõlõmunu, nda ku kapa ondavululi yepata lia Isareli. Posi o yevela ondaka yi tunda komẽla wange oco o va lungula lalungulo ange.

¹⁸ Nda mopia londingãivi siti, Ocili muẽle o fa, kuenje ove nda kuo lunguile, ku popi hu lungula ondingãivi konjila yaye yĩvi, okuti o popela omuenyo waye, ondingãivi yaco yi fa longole yaye muẽle, omuenyo waye puãi ho pula peka liove.

¹⁹ Puãi ove, nda o lungula ondingãivi kuenje ka yi tinduka kũvi wayo, pamue konjila yayo yĩvi, eye o fa longole yaye, puãi ove wa popela omuenyo wove.

²⁰ Haicovo nda ukuesunga o pambuka kesunga liaye ha lingi evĩho, kuenje ñapa ocilondokua kovaso aye, eye o fa, momo kuo lunguile, o fa lekandu liaye kuenje ovilinga viesunga vina a lingile ka vivalukiwa vali; puãi omuenyo waye ho pula peka liove.

²¹ Puãi nda ove wa lungula ondingesunga, okuti ukuesunga ka ka linge ekandu, kuenje kekandu ka kuateleko, ocili muẽle o kala lomuenyo, momo wa lunguiwa, love o popela omuenyo wove.

²² Leka lia Yehova oko lia mbuilila, kuenje wa sapuila hati, Votoka. Kuende kocimbota, oko mbanguila love.

²³ Yu nda votoka, nda enda kocimbota, kuenje tala, ulamba wa Yehova wa kalako, ndulamba una nda muĩle ocipepi lolui Kevare. Oco nda wila posi, nda lituvikapo.

²⁴ Puãi Espiritu lia nyiñila yu lia mbotola, loku popia lame, liti, Kuende, liyilila vonjo yove.

²⁵ Puãi ove, a Mõlõmunu, tala, va ku kapa ovikolo kuenje va ku kuta lavio okuti ku tẽla oku tundila pokati komanu.

²⁶ Elimi liove ndi li kakatelisa vuliakusu wove okuti o linga ocitende, ku tẽla vali oku va lemẽla; momo vakuepata liusuanji.

²⁷ Puãi eci mopia love oco ngasamisa omẽla wove, kuenje o popia lavo, huti, Ca popia Ñala Yehova, ceci, hati, U o yeva a yeve, u ka yevi a kale, momo vakuepata liusuanji.