ESEKIELE 29 - Embimbiliya - Bíblia Sagrada em Umbundu

¹ Kunyamo wekũi, kosãi yekũi, keteke liekũi lavali kosãi, ondaka ya Yehova yeya kokuange yiti,

² A Mõlõmunu, imba ovaso ku Fareo, osoma ye Egito. Imba owanji woku u pisa kuenda oku pisa va Egito vosi.

³ Popia huti, Ca popia Ñala Yehova ceci, hati, Ota, Nda ku pongolokelamo a Fareo, soma ye Egito, ove ungandu yinene yi kala kala vokati kolondui viaye, yi popia popia yiti, Olui Nilu luange muẽle, ame muẽle nda lu sovola.

⁴ Ame ñapa olonjolo volombanjo viove, olõsi viovolondui viove ndi vi kakatelisa kakaka ove. Hupa volondui viove kumosi lolõsi viosi violondui viove vi kakatela kakaka ove.

⁵ Kuenje hu inasi kekango, ove lolõsi viosi violondui viove. O kupukila venyala, ku noliwa vali ndaño oku kendiwa. Nda ku eca ndeteku kovinyama viusenge lolonjila viokilu.

⁶ Oco olonungi viosi vie Egito vi limbuka okuti ame ndi Yehova. Momo wa kala ndombueti yoluneva kepata lia Isareli.

⁷ Eci va ku kuata peka wa teka. Wa tanda apepe avo osi. Leci va ku kunamẽla wa teka kuenje wa lulumisa oviongo viavo viosi.

⁸ Oco Ñala Yehova hati, Ota, hu nenela osipata, hu kunduila omanu lovinyama.

⁹ Ofeka ye Egito yi linga elunda kuenda ekalasoko. Oco va limbuka okuti ame ndi Yehova. Omo wa popia huti, Olui Nilu luange, ame nda lu sovola,

¹⁰ oco, tala, nda ku pongolokelamo kuenda nda pongolokelamo olondui viove. Ndingisa ofeka ye Egito elunda kuenda ekalasoko tunde ko Mingidole toke ko Suwene ta kolongave via Etiopia.

¹¹ Ka mu piti olumãi luomunu, ndaño ekasa liocinyama ka li pitimo. Akũi akuãla kanyamo ka mu tungiwa.

¹² Kuenje ndingisa ofeka ye Egito elunda pokati kolofeka via linga alunda. Lovaimbo aye a linga alunda akũi akuãla kanyamo pokati kovaimbo a linga alunda. Kuenje sanduila va Egito pokati kapata loku va nyanyowaila kolofeka.

¹³ Ca popia Ñala Yehova ceci, hati, Kefulilo lialima akũi akuãla ngongolola va Egito kolofeka kuna va sandokaila.

¹⁴ Salalisa vali Egito loku va tiula kofeka ya Patirosi haiyo ofeka yucitue wavo. Va kalako luviali u sule.

¹⁵ U linga uviali u sule pokati kovoviali osi. Lalimue eteke u velapo vali. Ndi va tepulula ndokuti lalimue vali eteke va viala olofeka.

¹⁶ Kuenje Egito ka kolelua vali lepata lia Isareli okuti okupingapinga kuavo ekuatiso ku njivaluisa akandu avo. Oco va limbuka okuti ame ndi Ñala Yehova.

¹⁷ Kulima wakũi avali lependuvali, kosãi yatete, keteke liatete kosãi, ondaka ya Yehova yeya kokuange yiti,

¹⁸ A Mõlõmunu, Nevukandesa, osoma ya Bavulono, wa yaka enene la Turo. Ovitue viosi vieya atoto. Apepe osi a tuvuka. Haimo ndaño eye, ndaño asualali vaye, ka va tambuile ku Turo cimue ca soka lupange wavo woku yaka.

¹⁹ Oco Ñala Yehova hati, Tala, mekonda liaco, ame ngeca ofeka ye Egito ku Nevukandesa, osoma ya Bavulono. Eye ambata omanu vayo loku yi punda loku yi nyõla, oco ci linge onima yasualali vaye.

²⁰ Ndo wĩha ofeka ye Egito ndonima yupange waye momo ame va ndingila upange. Oco ca popia Ñala Yehova.

²¹ Eteke liaco numbulula vali unene wepata lia Isareli, kuenda hu muisa evelo lioku asama omẽla pokati kavo. Oco va limbuka okuti ame ndi Yehova.