ESEKIELE 27 - Embimbiliya - Bíblia Sagrada em Umbundu

¹ Ondaka ya Yehova yeya vali kokuange yiti,

² A Mõlõmunu, lisiõsuĩla Turo.

³ Popia la Turo, una wa tunga ketapu liokalunga, haeye ukuaku fũla lomami vokolofeka via lua. Popia laye huti, Ca popia Ñala Yehova ceci, hati, Ove a Turo, ove wa popia huti, Ame ndindambi ye lipua.

⁴ Olongave viove vi kasi vokati kokalunga. Ava va ku tunga va ku posuisa olumue.

⁵ Va tunga ovindangala viove loviti viofaya vioko Seniri. Va nena olo-cedro vioko Levanone oku linga lavio olongunji violonaviyu viove.

⁶ Va linga ovipando viove lavaya o carvalho oko Basiane. Va tunga ovitumãlo viove lavaya oviti vio pinheiro via tunda ko Kupro kuenje va vi posuisa lombinga yonjamba.

⁷ Lolovalatanya via mindaliwa vioke Egito ovio via linga olonanga viove vioku ku endisa lofela, haivio apandela ove. Evi viovani levi vi vumbula viokovifuka via Elisa ovio via linga olona yove.

⁸ Olonungi via Sidono levi via Arewada ovo va linga atapuli vove. Olonoño viove, a Turo, ovo va linga olombindululi viove.

⁹ Akulu voko Gebala lolonoño viavo va linga ovasitiki vove. Olonaviyu viosi viovokalunga la vakualonaviyu vaco va kala vokati kove ha va fũli love.

¹⁰ Va Persia la va Ludu la va Futi va kala vocitundo cove casualali, Va nyoñamĩsila vokati kove otevele longalau. Va lekisa ulamba wove.

¹¹ Alume va Arewada locitundo cove casualali va kala kovimbaka viove via ku ñuala. Alume va Gamadi va kala volombonge viove. Va nyoñamĩsa olotevele kovimbaka viove via ku ñuala. Va ku posuisa olumue.

¹² Tarsisi wa fũla fũla love mekonda liokulua kukuasi wove wiñi wiñi. Opalata, lutale, lofuoya, losumbu va vi fũla vovitanda viove.

¹³ Yavani la Tavale la Meseke va fũla fũla love. Va nena omanu lovikuata viongula, va landa ovikuata viove.

¹⁴ Vakuepata lia Togarma va nena kovitanda viove otuvalu, ndaño otuvalu tuovita lolomula.

¹⁵ Va Dedane va fũla fũla love. Va enda kolofeka via lua lovitanda viove, via ku landisa olombinga vionjamba loviti vi tekãva.

¹⁶ Suria wa fũla fũla love mekonda liokulua kukuasi wove. Wa ku landisa ovawe emeralda, lolonanga vi vumbula, lolonanga via mindaliwa, lolovalatanya lolomota vi kusuka, levi viovitulu ya fina.

¹⁷ Yuda lofeka ya Isareli va fũla fũla love. Va ku landisa otiliku, lasetona, lakuyu, lowiki, lulela, longuendu.

¹⁸ Damasko wa fũla fũla love mekonda liovina viove viakahandangala lokulua kukuasi wove wiñi wiñi. Wa ku landisa ovinyu via Kelebone lovonya a yela olomeme.

¹⁹ Va Usãle va fũla fũla love. Va ku landisa utale wa yenguluiwa kuenda kasia la kalamu.

²⁰ Dedane wa fũla fũla love. Wa ku landisa olonanga via tĩla vioku kapa kotuvalu tuoku endela.

²¹ Arabia lomãla vosi volosoma via Kedare va kala olofumbelo viove. Va ku landisa olomeme, lolonanga, lolohombo.

²² Olofumbelo vioko Seva levi vioko Raama via fũla fũla love. Va ku landisa olosimbolua viosi via velapo kuenda ovawe osi a tĩla, lulu.

²³ Harane la Kane la Edene kuenda Asiure la Kilumade va fũla fũla love.

²⁴ Va ku landisa olonanga via velapo luwalo wovani wa mindaliwa lolotapete viavala aiñi aiñi lolombundo viovikolo via pama.

²⁵ Olonaviyu vioko Tarsisi viambayata ovikuata viove vioku fũla. Oco ove wa yukisua have wa lemiwa ca lua vokalunga.

²⁶ Ovatapuli vove va ku tuala kovava a longa. Ofela yokutundilo ya ku nyõlẽla vokati kokalunga.

²⁷ Ukuasi wove lovipako viove lovikuata viove vioku fũla fũla, la vakualonaviyu vove lolombindululi viove, lava va sitika ovitelele, lava va ku fũlãila, lasualali vove vosi va kasi love, lolohoka viove viosi vi kasi vokati kove, cosi ci vomba vokalunga veteke lioku nyõlẽha kuove.

²⁸ Onjuvungo yokuvilikiya kuolombindululi viove yi lulumisa olofeka viosi.

²⁹ Kuenje kolonaviyu ku tunda vakuavipando vosi. Vakualonaviyu lolombindululi viosi va talama kongongo.

³⁰ Kuenje va ku liyuila loku litetela enene. Va limba oneketela kovitue viavo, va litiñolõla vetiko,

³¹ va lipemũla asenya mekonda liove. Va wala ovikelẽyi, va ku lila locinguva lokutãtẽla kua lua.

³² Voku lila kuavo va ku lisiõsuĩla kuenje va ku tãtẽla vati, Helie wa la taka vokalunga nda Turo?

³³ Osimbu ovikuata viove vieyilila koka lunga wa salalisa omanu valua, lokulua kuovikuata viove lovipako viove wa salalisa olosoma viokilu lieve.

³⁴ Cilo wa nyõlẽhẽla valondo okalunga, lovikuata viove la vakualonaviyu vove va nyõlẽhẽla kumue love.

³⁵ Olonungi viosi viofeka via ku komõha ca lua, lolosoma viavo via yokoka enene. Ovipala viavo via suangala.

³⁶ Vakuakufũla pokati komanu va ku yola epembe. Wa pitila kefulilo lia piãla. Ku kalako vali otembo ka yi pui.