ESEKIELE 26 - Embimbiliya - Bíblia Sagrada em Umbundu

¹ Kunyamo wekũi lamosi, keteke liatete kosãi, oco ondaka ya Yehova yeya kokuange yiti,

² A Mõlõmunu, omo Turo a popia Yerusalãi hati, Tala ya! ombundi yolofeka ya teka, ya njulukila ame, ame ndi limuĩsa osimbu eye a nyõleha,

³ oco Ñala Yehova hati, Ota, nda ku pongolokelamo, a Turo. Hu katuila olofeka vialua ndeci okalunga ka likatuila akimba ako.

⁴ Ovio vi nyõla ovimbaka via Turo loku kupuila posi olombonge viaye. Ndu komba eve liaye loku u lingisa ohanda.

⁵ Pokati kokalunga o linga ocinyãlẽho cawanda momo ame ndi Ñala Yehova ame nda ci popia; kuenje o pundiwa lolofeka.

⁶ Lomãla vaye vakãi va kasi kongongo va fa losipata. Oco va limbuka okuti ame ndi Yehova.

⁷ Momo ca popia Ñala Yehova ceci, hati, Tala, Turo ndu nenẽla Nevukandesa, osoma ya va Bavulono. O tunda ko Norte, eye osoma yolosoma. Iya lotuvalu, lakalu, lava vakuakuendela kotuvalu, lolohoka viasualali.

⁸ Ipãla losipata omãla vove vakãi va kasi kongongo. O tunga ombonge. Ongekavo olondunda vieve. O limãlẽhisa loviyepelo, cosi coku yaka love.

⁹ O veta ovimbaka viove lolomakina viaye vioku yaka. O kupuila posi olombonge viove lolondiaviti viaye.

¹⁰ Otuvalu tuaye tu lua enene ndokuti oneketela yatuo yi ku sikililamo. Eci eye a iñilĩla volombundi viove ndeci ci iñilĩwa imbo lia kuatiwa oco onjuvungo ya vakuakuendela kotuvalu lakãlu yi lulumisa ovimbaka viove.

¹¹ Akonjo otuvalu tuaye a kosa olokololo viove viosi. O ponda omanu vove losipata, lolongunji viove via pama vi kupukila posi.

¹² Va punda ukuasi wove. Va punda ovitanda viove. Va kupuila posi ovimbaka viove. Va nyõla olonjo viove viwa. Lovawe ove loviti viove leve liove, viosi va vi imba vokati kovava.

¹³ Nyimũla ocileñi covisungo viove. Locileñi cotulialia tuove ka ci yevala vali.

¹⁴ Kuenje hu lingisa ohanda. O linga ocinyãlẽho cawanda. Ku tungiwa vali; momo ame ndi Yehova nda ci popia. Oco ca popia Ñala Yehova.

¹⁵ Ca Popia Ñala Yehova ku Turo ceci hati, Olongongo hẽ ka vi luluma londindimo yoku kupuka kuove eci olongase vi leña leña, leci ekundu li lingiwa vokati kove?

¹⁶ Olosoma viokalunga vi tunda kolomangu viavio, vi liupa olonanga viavio, vi sũlũla uwalo wavio wa posuisua. Vi luika ovilulumu. Vi tumãla posi. Vi luluma otembo yosi. Vi ku komõha.

¹⁷ Kuenje vi ku lisiõsũila. Vi popia love viti, Aimbo lia kemalele, wa taka vokalunga; ove lolonungi viove wa kaili lunene walua kokalunga haene wa yokokisili vosi va lisungue lene.

¹⁸ Cilo ovifuka vi luluma keteke lioku taka kuove. Ovifuka vi kasi vokalunga vi komõha oku taka kuove.

¹⁹ Momo ca popia Ñala Yehova ceci, hati, Eci hu lingisa elunda ndovaimbo ka a kuete omanu, leci hu undumuĩla vokalunga lovava a lua a ku tuvika,

²⁰ oco hu lowisila kumue lava va lokila vonjembo, komanu vakuanãhũlu. Hu imba kolohondongolo kuna kua linga ale alunda, kumue lava va lokila vonjembo, oco ku sangi vali olonungi ndaño ocitungilo vofeka ya vakuamuenyo.

²¹ Hu tuãla kefulilo lia kãla kuenje ku kalako vali. Ndaño va ku vanjiliya ku sangiwa vali otembo yosi. Oco ca popia Ñala Yehova.