ESEKIELE 25 - Embimbiliya - Bíblia Sagrada em Umbundu

¹ Ondaka ya Yehova yeya kokuange yiti,

² A Mõlõmunu, imba ovaso ove ku va Amoni. Va imbila owanji woku va pisa.

³ Popia la va Amoni, huti, Yevi ondaka ya Ñala Yehova. Ca popia Ñala Yehova ceci, hati, Omo wa yoli epembe eci onjo yange yi kola ya sepuiwa, leci ofeka ya Isareli ya kunduiwa, leci epata lia Yuda lia enda kumandekua,

⁴ oco ndu weci komanu vakuotundilo okuti vo viali. Va tunga pokati kene ovilombo viavo ndaño olonjo viavo. Va lia epako liene. Va nyua asenjele ene.

⁵ Ombala yavo Raba yi linga ocunda colongamelo, lovaimbo a va Amoni a linga ocunda colomeme; oco vu limbuka okuti ame ndi Yehova.

⁶ Momo ca popia Ñala Yehova ceci, hati, Omo wa panduli povaka loku tutula lolomãi oku sanjukila ofeka ya Isareli,

⁷ oco ndo wõluili eka liange okuti ndu weci ku vakualofeka. Ndu tepi pokati komanu. Ndu malipo pokati kolofeka. Ndu nyõli. Oco vu limbuka okuti ame ndi Yehova.

⁸ Ca popia Ñala Yehova ceci, hati, Omo Moavi wa popia hati, Tala, epata lia Yuda lia lisoka lapata osi akuavo,

⁹ oco ha yulula onele ya Moavi tunde kovaimbo okolongave viaye hao ulamba wofeka, okuti Bete-Yesimonte, la Baale-Meone, kuenda Kiriatami.

¹⁰ Ndi yeca kumosi lofeka ya va Amoni komanu vakuotundilo ha va yi viala, okuti ka va ivalukiwa vali pokati kolofeka.

¹¹ Kuenje netuluila va Moavi. Oco va limbuka okuti ame ndi Yehova.

¹² Ca popia Ñala Yehova ceci, hati, Omo Edome a fetuluinya epata lia Yuda kuenje poku fetuluinya kuaco wa sanga eko linene,

¹³ oco Ñala Yehova hati, Ngõluila eka liange ku Edome. Nyolamo lomanu lovinyama. Ndi yi kundula. Tunde ko Temani toke ko Dedani va fa losipata.

¹⁴ Fetuluinya Edome leka liomanu vange va Isareli. Vofeka ya Edome va lingamo ndeci ca soka lonyeño yange kuenda oku tema kuange. Va limbuka efetuluinyo liange. Ñala Yehova wa ci popia.

¹⁵ Ca popia Ñala Yehova ceci, hati, Omo va Filisiti va fetuluinya efetuluinyo lutima wonya kuenje va nyõla lukuse ka u pui,

¹⁶ oco, Ñala Yehova hati, Ota, ngõluila eka liange ku va Filisiti. Ñundula va Kirete. Nyõla ocisupe ci kasi konele yokalunga.

¹⁷ Ndi va fetuluinya layambulo onyeño, Eci malusula efetuluinyo liange oco va limbuka okuti ame ndi Yehova.