ESEKIELE 24 - Embimbiliya - Bíblia Sagrada em Umbundu

¹ Vunyamo wecea, kosãi yekũi, keteke liekũi kosãi, ondaka ya Yehova yeya kokuange yiti,

² A Mõlõmunu, sonẽha onduko yeteke lilo, yetali lilo muẽle. Osoma yoko Bavulono yeya ko Yerusalãi eteke lietali lilo muẽle.

³ Tela epata liusuanji olusapo. Popia lalio huti, Ca popia Ñala Yehova ceci, hati, O tumbika ombia piko, yi fendihinyapo, itilamo ovava.

⁴ Kapamo ovinumba viositu, ovinumba viosi viwa, viovikalo lapepe. Yi yukisa lakepa awa.

⁵ Nola eci ca velapo vocunda. Vumbiliyakovo olohũi. Yi feluke ciwa. Akepa aco a pie ciwa.

⁶ Ca popia Ñala Yehova ceci, hati, Imbo liosonde, ngongo yalio! Ombia yi kasi longuyu, ngongo yayo! Onguyu yayo yu, ka ya tundilemo. Upamo ocinumba cimue, cimue, ka kuli oku pungula.

⁷ Momo osonde wa pesela lopo yeyi vokati kaye, wa yi kapa kilu liesenje, ka yi sukumuĩlĩle posi ha yi lembika leve.

⁸ Oku wengula onyeño yange loku fetuluinya nda kapa osonde yaye kesenje oco ka yi ka lembikiwe.

⁹ Oco Ñala Yehova hati, Imbo liosonde, ngongo yalio! Ame muẽle ngongeka ondunda yinene yolohuĩ.

¹⁰ Vumbiliya olohũi. Siakãla ondalu. Teleka ciwa ositu. Sukumũla usole. Akepa a weme.

¹¹ Kuenje yi tumbika upolokoso kakala okuti yi sanya, losipi yayo yi yenguluka, leliño liayo li sengeteta, longuyu yayo yi pua.

¹² Nda likavisaño. Onguyu yayo yalua ka yi tundi londalu.

¹³ Onguyu yayo oyo umbondo wove. Omo nda nda ku yelisa, kuenje kua yelisiwile kumbondo wove, oco ku yelisua vali toke hu tẽlisila onyeño yange.

¹⁴ Ame ndi Yehova ame nda ci popia kuenje ci kala, ame muẽle ndi ci linga. Si tiukila konyima. Si fila umue ocisõi. Si pongolokamo. Ndolonjila viove lovilinga viove hu pisa. Oco ca popia Ñala Yehova.

¹⁵ Ondaka ya Yehova yeya vali kokuange yiti,

¹⁶ A Mõlõmunu, tala, ndopo hupa ocipikipiki esanju liovaso ove, haimo ku sumua, ku lili, ndaño asuẽlẽla ka a tundi.

¹⁷ Sukoka, puãi ka ci ka yevale. Ku ka sumuĩle ava va fa. Futa ocifuto cove kutue. Wala olohaku viove kolomãi. Ku ka lisitike komela. Ku ka lie ombolo yonambi.

¹⁸ Oco omẽle nda vangula lomanu kuenje oñolosi ukãi wange wa fa. Omẽle yaco nda linga ndomo nda handelekua.

¹⁹ Omanu va popia lame vati, Ku tu sapuila hẽ elomboluilo liovina o kasi loku linga? O kasi oku tu vi lingilila nye?

²⁰ Yu nda popia lavo siti, Ondaka ya Yehova yeya kokuange yiti,

²¹ Sapuila epata lia Isareli huti, Ca popia Ñala Yehova ceci, hati, Tala, ame sepuisa onjo yange yi kola, haiyo ulamba wunene wene, haiyo esanju liovaso ene, haiyo ocilivelo covitima viene. Omãla vene valume lomãla vene vakãi, vana wa si konyima, va kupuka losipata.

²² Kuenje vu linga ndeci nda linga ame, ka vu lisitika komẽla, ka vu li ombolo yonambi.

²³ Ovifuto viene vi kala kovitue viene, lolohaku viene kolomãi viene. Ka vu sumua ndaño oku lila, puãi vu sovolokela volohole viene loku lisiõsuĩla pokati.

²⁴ Oco Esekiele u lingila ondimbukiso. Cosi eye a linga ene vu ci lingavo. Eci ciya oco vu limbuka okuti ame ndi Ñala Yehova.

²⁵ Oco ove, a Mõlõmunu, eteke ndi vopa ombonge yavo, haiyo esanju liavo lulamba wavo, haiyo esanju liovaso avo locilivelo covitima viavo, eteke liaco hailio njupavo omãla vavo valume lomãla vavo vakãi.

²⁶ Eteke liaco umue wa puluka iya kokuove oku ku sapuila eci ca pita.

²⁷ Keteke liaco omẽla wove wasamẽla u wa puluka kuenje o popia, kuha vali. Oco o va lingila ondimbukiso, kuenje va limbuka okuti ame ndi Yehova.