ESEKIELE 23 - Embimbiliya - Bíblia Sagrada em Umbundu

¹ Ondaka ya Yehova yeya vali kokuange yiti,

² A Mõlõmunu, kua kala akãi vavali, omãla vonjali yimosi.

³ Va lingila ukahonga ve Egito. Vutila omo va linga ukahonga. Oko va kuataiwaila volonete, haiko va va sĩlaila kavele avo.

⁴ Olonduko viavo vievi: Ukulu waco eye Ohola, manjaco eye Oholiba; kuenje va linga vange. Va cita omãla valume lomãla vakãi. Olonduko viavo vievi: Ohola eye Samaria, Oholiba eye Yerusalãi.

⁵ Ohola wa linga ukahonga osimbu a kala wange. Wa liyongowaila olombaisi viaye okuti va Asuria,

⁶ haivo asualali va wala evi via tekãvelua, lolonguluvulu lolombiali, vosi akuenje volonumbu haivo vakuakuendela kotuvalu.

⁷ Oco wa linga lavo ukahonga, vosi yavo alume va velapo k'Asuria. Wa livĩhisa loviteka via vosi a liyongowaila.

⁸ Ka imbilepo ukahonga una a kala lawo tunde koloneke a kala ke Egito, momo alume va pekela laye loku sĩla sĩla kavele aye, kuenje va linga laye ukahonga.

⁹ Oco ndo telekala peka liolombaisi viaye va Asuria vana a liyongowaila.

¹⁰ Vo sikũlũla ha kala epõlõla. Va kuata omãla vaye valume lava vakãi. Eye muẽle vo wipa losipata yu wa linga ocãsũ pokati kakãi eci a pisiwa.

¹¹ Manjaye Oholiba wa ci mola, haimo wa piãlisapo evĩho liaye koku liyongowaila, lukahonga waye wa velapo ukahonga wa manjaye.

¹² Wa liyongowaila va Asuria, olonguluvulu lolombiali lasualali va wala uwalo wovita, haivo va endela kotuvalu, vosi akuenje volonumbu.

¹³ Kuenje nda limbuka okuti wa vĩhĩsua, kavali kavo vakuanjila yimosi.

¹⁴ Eye puãi wa vokiyako kukahonga waye. Wa mõla alume wa luvikiyiwa vocimano, oviluvialuvia via va Kaldea via luvikiyiwa leci ci kusuka.

¹⁵ Oviongo viavo via itikiwa lovivia, lovifuto vinene via futisua kovitue viavo. Vosi yavo va mõleha ndavakapitango, ociluvialuvia caco ca va Bavulono, ofeka yucitue wavo Kaldea.

¹⁶ Eci a va mõla haico a va liyonguila yu wa va tumisa olomunga ko Kaldea.

¹⁷ Oco va Bavulono veya kokuaye pula wocisola, yu vo vĩhĩsa lukahonga wavo. Kovaso yoku livĩhĩsa lavo oco wa litepa lavo lonyanya.

¹⁸ Omo a luisa ukahonga waye loku enda loku lekisa etimba liaye oco utima wange wa litepa laye ndeci wa litepele lamanjaye.

¹⁹ Haimo wa luisa ukahonga waye, loku ivaluka oloneke viutila waye cina a lingile ukahonga kofeka ye Egito,

²⁰ loku liyongowaila olombaisi viaye, oloñei viavio via soka loloñei viovimbulu lotuvalu.

²¹ Oco wa livela ukahonga wutila wove, eci va Egito va kuata kuata konete yove loku sĩla sĩla kavele ove.

²² Oco, a Oholiba, ca popia Ñala Yehova ceci, hati, Tala, hu katuila vombaisi yove vana wa litepa lavo kutima, kuenje kolonele viosi ndi va tuma kokuove;

²³ va Bavulono, la va Kaldea vosi, Pekode la Sowa la Kowa, la va Asuria vosi pamosi lavo; akuenje volonumbu, olonguluvulu lolombiali, vakapitango lasualali, vosi yavo va endela kotuvalu.

²⁴ Kuenje va tunda ko Norte, veya kokuove lakãlũ ovita lowiñi womanu. Va ku ñuala ocingonja loviyepelo lolotevele lolongalãu. Ndi va ĩha omoko yoku yala ekanga, kuenje va ku tetuluila ndeci va tuwa ale oku tetulula.

²⁵ Kuenje hu suñamisa oku tema kuange oco va linge love lonyeño yalua. Va kumbula anyulu lovatuĩ ove. Ava va ku supilapo va kupuka losipata. Va kuata omãla vove valume lomãla vove vakãi. Ava va ku supilako va nyõlẽha londalu.

²⁶ Va ku sũlũla uwalo wove, va ku nyẽha aposuiso ove a tĩla.

²⁷ Oco ñotola kokuove evĩho liove, lukahonga wove una wokofeka ye Egito, okuti ku petuila vali va Egito ovaso ove, ndaño oku va ivaluka vali.

²⁸ Omo ca popia Ñala Yehova ceci, hati, Tala, hu eca peka liava wa suvuka, peka liava utima wove wa litepa lavo.

²⁹ Va linga love lesuvu, Vambata apako osi upange wove, kuenje va ku sia epõlõla, lepõlõla liukahonga wove li muiwa. Evĩho liove kuenda ukahonga wove

³⁰ via ku ci nenela, momo wa lingainga ukahonga la vakualofeka, wa livĩhĩsa loviteka viavo.

³¹ Wa endela vonjila ya manjove, oco ngeca okopo yaye peka liove.

³² Ca popia Ñala Yehova ceci, hati, O nyua kokopo ya manjove ukãi haiyo yondungu, kuenda ya sanjavala. O yoliwa epembe, haive o sepuiwa, momo ye yuka ca lua.

³³ Love o yukililua luholua lesumuo. Okopo ya manjove Samaria okopo yocikomo kuenda yekundu.

³⁴ Love o yi nyua, o yi malapo, lovitami viayo o vi takila, kuenje o lisuyulula avele. Momo ame ndi Ñala Yehova, ame nda popia.

³⁵ Oco Nala Yehova hati, Omo wa njivala loku njimba konyima oco epako lievĩho liove lukahonga wove o lituika lalio ove muẽle.

³⁶ Yehova wa popia lame hati, A Mõlõmunu, o pisa hẽ Ohola la Oholiba? Nda oco va sapuila ovombondo avo.

³⁷ Momo va linga uvaisi, losonde yeyi povaka avo. Va linga uvaisi loviteka viavo. Ndaño omãla vavo vana va nyitila ame va va lumba kokuavio poku va imba vondalu ha yi va li.

³⁸ Kuenda vali cikuavo va ndingila ceci: Eteke liaco hailio va vĩhĩsa onjo yange yi kola loku sepuisa asambata ange.

³⁹ Momo eci va lumba omãla vavo koviteka viavo, eteke liaco hailio, va iñila vonjo yange yi kola oku yi sepuisa. Tala, eci muẽle oco va lingila vonjo yange.

⁴⁰ Kuenda vali va tuma kupãla oku kovonga alume, va tuma muẽle omunga, kuenje veya. Mekonda liavo wa liyuisa, wa yukula ovaso ove, wa limiangulula laposuiso.

⁴¹ Wa tumãla kula wa posoka. Kovaso yaco kua yaliwa omesa oko wa kapa insensu viange lulela wange.

⁴² Kua yevala onjuvungo yowiñi wa sanjuka. Kumue lalume vaño kueyililavo oloholua via tunda kekalasoko. Va kapa ovinunga kovoko akãi lakolowa a posoka kovitue viavo.

⁴³ Oco nda popia siti, Alume hẽ, ka va lingi uvaisi eci va lingainga laye ukahonga?

⁴⁴ Momo va iñila kokuaye ndava va iñila kocipuepue. Haico va iñila ku Ohola kuenda Oholiba, akãi vakuokahonga.

⁴⁵ Omanu vakuesunga va va pisa, va va pisa lepiso lia vakuovaisi. Va va pisa lepiso liava va pesela osonde; momo ovo vakuovaisi, osonde yeyi povaka avo.

⁴⁶ Oco, ca popia Ñala Yehova ceci, hati, Olohoka vi va katukile oco va yokokisue, va pundiwe.

⁴⁷ Kuenda olohoka vi va sosola lovawe, loku va kundula lolosipata viavo. Va ipa omãla vavo valume lomãla vavo vakãi, va temĩha olonjo viavo.

⁴⁸ Oco nyimũla umbondo vofeka oco akãi vosi va lunguke, va yuvule umbondo wene.

⁴⁹ Umbondo wene u vu tiukila. Vu lituika eyambulo liafendelo ene oviteka, oco vu limbuka okuti ame ndi Ñala Yehova.