ESEKIELE 22 - Embimbiliya - Bíblia Sagrada em Umbundu

¹ Ondaka ya Yehova yeya kokuange yiti,

² Ove, a Mõlõmunu, o pisa hẽ? O pisa hẽ imbo liosonde? Nda oco, li sapuila ovombondo alio osi.

³ O popia huti, Ca popia Ñala Yehova ceci, hati, Aimbo lia pesalaela osonde vokati kalio oco otembo yalio yiye, hailio li livĩhĩsa loviteka.

⁴ Wa pia losonde yina wa pesela. Wa vĩhĩsua loviteka wa tunga. Wa nena ocipepi eteke liove. Otembo yekanga liove yeya. Oco nda ku pembuisa lapata, nda ku fuanguisa lolofeka viosi.

⁵ Ava va kasi ocipepi lava va kasi kupãla va ku fuanguĩla, ove okualuhimo luvi, haive we yuka olonjaya.

⁶ Ota, olosoma via Isareli vina vi kasi vokati kove, osoma ndongusu yayo, osoma ndongusu yayo, via livela lika oku pesela osonde.

⁷ Vokati kove omunu o pembula isiaye la inaye. Vokati kove akombe va talisua ohali. Vokati kove va linga cĩvi losiwe locimbumba.

⁸ Wa pembula ovina viange vi kola. Asambata ange wa tomba.

⁹ Vokati kove mu sangiwa vakuaku lundila loku pesela osonde, mu sangiwavo ava va lila lila kolomunda lava va lingainga avĩho.

¹⁰ Vokati kove mũli ava va sikũlũla vaisiavo ha va kala epõlõla, mũlivo ava va pekalaisa akãi va kasi kocituwa.

¹¹ Umue o pekalaisa ukãi wokuavo, ukuavo o pekalaisa ukãi womolaye, ukuavo o pekalaisa mukãi waye, omõla a isiaye.

¹² Vokati kove mũli ava va tambola ovitukiko ha va pesela osonde. O kapa kapa osindike lombandeke. O talaisa vakuẽle ohali locipululu cove, puãi ame wa njivala. Oco ca popia Ñala Yehova.

¹³ Oco nda pandula peka poku komoha ocipululu cove losonde ya peselua vokati kove.

¹⁴ Utima wove hẽ, u kuata utõi, pamue ovaka ove hẽ a pama voloneke vieci hu pokuisa? Ame ndi Yehova ame nda ci popia haime ndi ci linga.

¹⁵ Hu sanduila pokati kapata, hu nyanyowaila kolofeka. Ha sulisa evĩho liove.

¹⁶ Lame sepuisua love kovaso olofeka kuenje o limbuka okuti ame ndi Yehova.

¹⁷ Ondaka ya Yehova yeya kokuange yiti,

¹⁸ A Mõlõmunu, epata lia Isareli kokuange lia linga ovaña. Vosi yavo, lopalata longula lofoya lutale losumbu vondalu va linga ovaña.

¹⁹ Oco Ñala Yehova wa popia hati, Omo vosi yene wa lingi ovaña, oco tala, ndu kongeli vo Yerusalãi.

²⁰ Ndeci va kongela vondalu opalata, kuenda ongula lutale losumbu lofoya oku vi yeveya ha vi yenguluka, haico ndu kongeli ene vonyeño yange ndo temẽli kuenje ndu yengululi.

²¹ Ndu kongeli vondalu yonyeño yange siu yeveyi kuenje vu yengulukilamo.

²² Ndeci opalata yi yengulukila vondalu haico ene vu yenguluka. Kuenje vu limbuka okuti ame ndi Yehova ame ndo sukumũili onyeño yange.

²³ Ondaka ya Yehova yeya kokuange yiti,

²⁴ A Mõlõmunu, u sapuila huti, Ove vufeka ka ya yelisiwile haiyo ombela ka yi lokimo eteke lionyeño yange.

²⁵ Olosoma viayo vokati kayo via linga ndohosi yi koma koma, yi suyulula eci ca kuatiwa. Vi Ha omanu. Vi punda ukuasi lovina via tĩla. Vi luisa ovimbumba vokati kayo.

²⁶ Ovitunda viayo via nyõla ovihandeleko viange, via sepuisa ovina viange vi kola, ka via tepisile evi vi kola levi viaño. Ka via longisile oku tepisa pokati keci ca liña leci ca yela. Via pembula asambata ange kuenje nda sepuisua pokati kavio.

²⁷ Olosoma viayo vokati kayo vi kasi ndolombinji vi suyulula eci ca kuatiwa. Vi pesela osonde loku nyõla omanu ha va limuĩsa ukuasi hawesungako.

²⁸ Kuenje ovaprofeto vayo va ci sieketa locikela, va mõla ovinjoinjoi viesanda, va imba owanji wuhembi vati, Oco ca popia Ñala Yehova, osimbu Yehova ka ci popele.

²⁹ Omanu vofeka va talisa vakuavo ohali. Va enda loku punda. Va linga cĩvi kolohũkui lokolosuke, Va talisa ohali ukombe.

³⁰ Kuenje nda vanjiliya pokati kavo umue o tunga ocimbaka loku tata kepangu okuti si nyõli ofeka, puãi lomue nda sanga.

³¹ Oco nda va sukumuĩla onyeño yange. Nda va nyõla londalu yonyeño yange. Ongole yavo nda yi kupuila kovitue viavo. Oco ca popia Ñala Yehova.