ESEKIELE 21 - Embimbiliya - Bíblia Sagrada em Umbundu

¹ Ondaka ya Yehova yeya vali kokuange yiti,

² A Mõlõmunu, imba ovaso ko Yerusalãi. Pisa ovitumalo vialio vi kola. Imba owanji woku pisa ofeka ya Isareli.

³ Popia lofeka ya Isareli huti, Ca popia Yehova ceci, hati, Tala, ame namalala love. Mola osipata yange vocilalo cayo kuenje nyõla vokati kove lukuesunga londingãivi.

⁴ Omo ha nyõla vokati kove lukuesunga londingãivi oco osipata yange yi tundila vocilalo cayo oku nyõla omanu vosi, tunde ko Sul toke ko Norte.

⁵ Kuenje omanu vosi va limbuka okuti ame ndi Yehova ame nda pola osipata yange vocilalo cayo. Ka yi tiukilamo vali.

⁶ Oco leña leña, a Mõlõmunu, leñaila kovaso avo lutima wa teka kuenda upongo.

⁷ Kuenje eci va ku pula vati, Nye o kasilili loku leña leña? popia lavo huti, Ñasilili oku leñaila olondaka viokaliye. Eci ciya ovitima viosi vi yenguluka, lovaka osi a pua ongusu, laspiritu osi ambuka, kuenda olongolo viosi vi leñela ndovava. Ota, ciya, kuenje ci lemuluiwa. Oco ca popia Ñala Yehova.

⁸ Ondaka ya Yehova yeya vali kokuange yiti,

⁹ A Mõlõmunu, imba owanji. Popia huti, Ca popia Yehova ceci, hati, Popia huti, Osipata, osipata ya lepikiwa, ya kungiwa, yi ndelenga.

¹⁰ Ya lepikiwa okuti yi ponda, ya kungiwa okuti yi liakula ndociliakulo! Tu sanjuka ale? Omõlange wa nyehũla ombalama lombueti.

¹¹ Oco osipata ya eciwa ha yi kungiwila upange. Ya kungiwa loku lepikiwa ha yi kapiwa peka liukuakuponda.

¹² Lila, litetela, a Mõlõmunu, momo yi veta omanu vange. Yi veta olosoma viosi via Isareli, vi telekaliwila kosipata kumue lomanu vange. Oco liveta kevangovango liove.

¹³ Momo eci ka ci lingi oku nyika,— nda ca silivila nye momo wa nyehũli ale ombalama lombueti? Oco ca popia Ñala Yehova.

¹⁴ Oco, a Mõlõmunu, imba owanji. Pandula lovaka. Osipata yi vete luvali ndaño lutatu, osipata yava va pondiwa, osipata yekundu linene lia va ñuala,

¹⁵ oco ovitima viavo vi lulume kuenje valua va kupukila kolombundi viavo viosi. Nda eca osipata yi nina, yi liakula ndociliakulo, haiyo ya angiliyiwila oku ponda.

¹⁶ A Sipata! Teta kondio, teta kẽpilĩ, kuosi kua imba ocipala cove.

¹⁷ Lamevo mandula lovaka ange, nẽlisa onyeño yange. Ame ndi Yehova ame nda popia.

¹⁸ Ondaka ya Yehova yeya vali kokuange yiti,

¹⁹ A Mõlõmunu, sokiya olonjila vivali omu muiyilila osipata yosoma ya Bavulono. Kavali kavio vi tunda vofeka yimuamue. Sembika otaka. Yi sembikila kenyãha li enda kimbo.

²⁰ Sokiya onjila omu muiyilila osipata yi veta Raba ombala yofeka ya va Amoni, yi vetavo Yuda kuenda Yerusalãi ya kolisua.

²¹ Momo osoma ya Bavulono yi talama panyãha, panyãha olonjila vivali, ha tãhi. O sekula ovisongo, o pula koviteka, kuenje o vanja komuma.

²² Peka liaye liondio pa mõlẽha ocitãho ca ilika Yerusalãi, oku vilikiya ekundu, loku imba olukuambi luovita, loku kapa olomakina vioku tuiya olombundi, loku ongeka olondunda viene, loku tunga olombonge.

²³ Puãi kokuavo ci kala ndocitãho cuhembi. Va lisinga asingo a kola, puãi ci njivaluisa ongole yavo okuti va kuatiwa.

²⁴ Oco Ñala Yehova hati, Omo wa ivaluisi ongole yene okuti oku lueya kuene kua situluka, kuenje kovilinga viene viosi akandu ene a mõleha, lomo wa ivalukiwi, oco vu kuatiwa.

²⁵ Love, andingãivi ya sepuka, asoma ya Isareli, eteke liove lieya, otembo yeyambulo liove lia sulako yeya.

²⁶ Ca popia Ñala Yehova ceci, hati, Upa ekofue. Upavo ekolowa. Ovina ka vi kala vali ndomo vi kasi. Citito ci velisapo, cinene ci sepuisa.

²⁷ Ndi li nyõla. Ndi li nyõla. Ndi li nyõla muẽle pe. Ka ku siala ndaño ocima toke kuiya u cu sesamela kuenje ndi ceca kokuaye.

²⁸ Love, a Mõlõmunu, imba owanji huti, Ca popia Ñala Yehova poku tukula va Amoni loku pembula kuavo, ceci, hati, Osipata! Osipata ya poliwila oku kundula, ya kungiwa ha yi nini loku liakula ndociliakulo,

²⁹ yi veta kolosingo violondingãivi omo eteke liavo lieya. Otembo yeyambulo liavo lia sulako yeyavo, osimbu va ku letele ovinjoinjoi viesanda loku kuimbila owanji wuhembi.

³⁰ Yi kapa vali vocilalo. Pana pocikoti cove haipo pofeka yucitiwe opo hu tetuluila.

³¹ Hu sukumuila onyeño yange. Hu siakalela elungulungu lioku tema kuange. Hu eca peka liolongangala vina vi tẽla oku nyõla.

³² O linga olohũi viondalu. Osonde yove yi kala vokati kofeka, ku ivalukiwa vali; momo ame ndi Yehova ame nda popia.