ESEKIELE 20 - Embimbiliya - Bíblia Sagrada em Umbundu

¹ Kunyamo wepanduvali, kosãi yatãlo, keteke liekũi kosãi, oco kueya akulu vamue va Isareli oku pula Yehova, yu va tumala kovaso ange.

² Kuenje ondaka ya Yehova yeya kokuange, yiti,

³ A Mõlõmunu, popia lakulu va Isareli huti, Ca popia Ñala Yehova ceci, hati, Weyilili oku mula? Ndomo ñasi lomuenyo si puliwa lene.

⁴ O va pisa hẽ, a Mõlõmunu, o va pisa? Nda oco, va limbukisa ovombondo olosekulu viavo.

⁵ Kuenje va sapuila huti, Ca popia Ñala Yehova ceci, hati, Eteke nda nola Isareli nda lisila lombuto ya Yakoba. Nda lisituluila kokuavo vofeka ye Egito. Nda lisila lavo siti, Ame ndi Yehova Suku yene.

⁶ Keteke liaco nda lisila lavo siti, Ndu vupa vofeka ye Egito siu tuali kofeka yimue ndo vanjeli ale. Yi tumõha asenjele lowiki haiyo ulamba wolofeka viosi.

⁷ Kuenje nda popia lavo siti, Omunu omunu a imbepo ovombondo osi a sanjuisa ovaso, ka ka livĩhĩse loviteka vie Egito. Ame ndi Yehova, ame Suku yene.

⁸ Puãi va sina, ka va tavele oku njeva. Lomue wa imbapo ovombondo a sanjuisa ovaso aye, ndaño oku sia oviteka via Egito. Oco nda popia siti, Ndi va sukumuĩla onyeño yange. Ndi va tẽlĩsĩla oku tema kuange vokati kofeka ye Egito.

⁹ Puãi nda ci lingila onduko yange okuti ka yi sepuisilua kovaso apata a va ñuala, apata ana a mõla eci nda lisitulula kokuavo poku vopa vofeka ye Egito.

¹⁰ Oco nda vopa vofeka ye Egito, yu nda va tuala kekalasoko.

¹¹ Nda va ĩha ovihandeleko viange. Nda va lekisa ovisila viange, ovisila vina omunu a mõla lavio omuenyo poku vi linga.

¹² Kuenda vali, nda va ĩhavo asambata ange hã ha a lingi ondimbukiso pokati kange lavo, oco va kũlĩhe okuti ame ndi Yehova ame nda a kolisa.

¹³ Puãi, epata lia Isareli lia sinila vekalasoko. Ka va pokuile kovihandeleko viange. Va imbapo ovisila viange, ovisila vina omunu a mõla lavio omuenyo poku vi linga. Va sepuisa calua asambata ange. Oco nda simile siti, Ndi va sukumuĩla onyeño yange vekalasoko loku va nyõla.

¹⁴ Puãi nda ci lingila onduko yange oco ka yi ka sepuisilue kovaso apata, kovaso apata ana a mõla eci nda ka vopile.

¹⁵ Kuenda vali nda lisila lavo vekalasoko okuti si va tuala kofeka yina nda va yĩhile, yina yi tumõha asenjele lowiki, haiyo ulamba wolofeka viosi,

¹⁶ omo va imbapo ovisila viange, ka va pokuile kovihandeleko viange, va sepuisa asambata ange. Ovitima viavo via livela oviteka viavo.

¹⁷ Haimo lumue iso liange lia va popela. Sia va nyõlele ndaño oku va kundula vekalasoko.

¹⁸ Kuenje nda popia lomãla vavo vekalasoko siti, Ko ka endaeli vovisila via vaisiene, ndaño oku lava oviholo viavo, ndaño oku livĩhĩsa loviteka viavo.

¹⁹ Ame ndi Yehova ame Suku yene. Endaeli vovisila viange. Lavi oviholo viange.

²⁰ Kolisi asambata ange okuti a linga ondimbukiso pokati kange lene oco vu limbuke okuti ame ndi Yehova ame Suku yene

²¹ Puãi omãla va sina, ka va endelele vovisila viange, ndaño oku lava oviholo viange, oviholo vina omunu a mõla lavio omuenyo poku vi linga. Va sepuisa asambata ange. Oco nda simile siti, Ndi va sukumũila onyeño yange. Ndi va tẽlĩsila onyeño yange vekalasoko.

²² Puãi nda litiulamo. Nda litiulilamo onduko yange okuti ka yi sepuisilua kovaso apata ana a mõla eci nda ka vopile.

²³ Kuenda vali, nda lisila lavo vekalasoko okuti ndi va sanduila pokati kapata loku va pesila kolofeka,

²⁴ omo ka va lingile oviholo viange. Puãi va likala ovisila viange, va sepuisa asambata ange. Va imba ovaso avo koviteka via vaisiavo.

²⁵ Kuenda vali nda va ĩha ovisila ka vi silivila loviholo ka vi muisa omuenyo.

²⁶ Nda va vĩhĩsila ovilumba viavo poku va yokisa olonuñulu viavo ndocilumba oco ndi va saluise. Nda ci lingila oku va limbukisa okuti ame ndi Yehova.

²⁷ Oco, a Mõlõmunu, popia lepata lia Isareli loku va sapuila huti, Ca popia Ñala Yehova ceci, hati, Ndaño kondaka eyi va isiene va mopia etonãi loku ndingila usuanji.

²⁸ Momo eci nda va nena vofeka yina nda lisila lavo oku va yĩha, oco posi va muĩla onumbuko yimue pamue uti umue wa yumbita, va lumbilapo ovilumba viavo loku nenela olombanjaile viavo vi funguisa, kuenda oku kapapo insensu viavo vielemba li tulumuisa onyeño, loku itilapo ovilumba viavo vioku nyua.

²⁹ Oco nda popia lavo siti, Konumbuko yipi wendi? Kuenje toke etali onduko yayo Numbuko.

³⁰ Oco, popia lepata lia Isareli huti, Ca popia Ñala Yehova ceci, hati, Wu livĩhĩsi hẽ ndocituwa colosekulu viene oku linyõla lovombondo avo?

³¹ Eci weci oviali viene loku pitisa omãla vene vondalu vu livĩhĩsa loviteka viene viosi toke etali lilo. Ndi puliwa lene, a vakuepata lia Isareli? Ca popia Ñala Yehova ceci, hati, Ndomo ñasi lomuenyo, si puliwa lene.

³² Leci wa simi hoti, Tu setahãla vakualofeka, loku lisoka lapata olofeka loku fendela oviti lovawe, lalimue eteke ci lingiwa.

³³ Ca popia Ñala Yehova ceci, hati, Ndomo ñasi lomuenyo leka lia pama lokuokuo kuõloha, kuenda lonyeño ya sakumũha, ndinga osoma yene.

³⁴ Ndu wupi pokati ka vakualofeka. Ndu wongololi kolofeka kuna wa sandekalali leka lia pama lokuokuo kuõloha, kuenda lonyeño ya sukumũha.

³⁵ Ndu tuali vekalasoko lia vakualofeka haimo ndu sombisili ocipala kocipala.

³⁶ Ndomo nda sombisile olosekulu viene vekalasoko liofeka ye Egito haico sombavo lene. Oco ca popia Ñala Yehova.

³⁷ Ndu pitisi vombueti siu kapi kukolo wocisila.

³⁸ Pokati kene nepapo vakuosuanji lava va ndueyela. Ndi vopa vofeka yina va tunga, puãi vofeka ya Isareli ka va iñilamo. Oco vu limbuka okuti ame ndi Yehova.

³⁹ Puãi ene, a vakuepata lia Isareli, ca popia Ñala Yehova ceci, hati, Tunde opo omunu omunu a ende, a ka vumbe oviteka viaye nda ka yongola oku njevelela. Puãi onduko yange yi kola ko ka yi sepuisi vali loviali viene loviteka viene.

⁴⁰ Ca popia Ñala Yehova ceci, hati, Komunda yange yi kola haiyo yi sõvi ya Isareli oko vosi vakuepata lia Isareli, vosi muẽle, oko va mbumbila vofeka yaco. Oko ndi va tambuila, haiko ha yonguila ovilumba viene loviali viene via velapo, lovina viene viosi vi kola.

⁴¹ Ndu tambuli ndelemba li pepa eci ndu wupi pokati ka vakualofeka loku wongololi kolofeka kuna wa sandokalali. Molẽhisa okukola kuange pokati kene kovaso a vakualofeka.

⁴² Vu limbuka okuti ame ndi Yehova eci ndu tuali vofeka ya Isareli haiyo ofeka yina nda likuminya oku yeca kolosekulu viene.

⁴³ Haimo wivalukili olonjila viene lovilinga viene viosi, vina wa livĩhĩsi lavio. Vu likuatela onyanya ene muẽle, mekonda liavĩho ene osi wa lingaingi.

⁴⁴ Kuenje vu limbuka okuti ame ndi Yehova, eci nda ci linga lene mekonda lionduko yange, hamekondako liolonjila viene vĩvi pamue ovilinga viene via vĩha, apata lia Isareli. Oco ca popia Ñala Yehova.

⁴⁵ Ondaka ya Yehova yeya kokuange yiti,

⁴⁶ A Mõlõmunu, imba ovaso ko Sul. Pisa va Sul londaka yove. Imba owanji woku pisa asisi oko Sul.

⁴⁷ Popia lasisi oko Sul huti, Yevi ondaka ya Yehova. Ca popia Ñala Yehova ceci, hati, Tala, vokati kove mihamo ondalu kuenje yi nyõla oviti viove viosi vi talala levi via kukuta. Ulienge u liakoka ño-o, ka wimi. Kuosi wimba ovaso, tunde ko Sul toke ko Norte, cosi ci kakuka lawo.

⁴⁸ Kuenje omanu vosi va limbuka okuti ame ndi Yehova ame nda yi mĩha, ka yimi vali.

⁴⁹ Oco nda popia siti, A Ñala Yehova, va kasi loku mopia vati, O nga, hokuakutako olosapo?