ESEKIELE 2 - Embimbiliya - Bíblia Sagrada em Umbundu

¹ Wa popia lame, hati, A Mõlõmunu, talama vilu oco mopie love.

² Kuenje Espiritu lia nyiñila eci a popia lame, yu lia mbotola kuenje nda yeva u wa popia lame.

³ Wa popia lame, hati, A Mõlõmunu, hu tuma komãla va Isareli, kapata ovisuanji, ava va ndingila usuanji. Ovo kuenda olonjali viavo va ndueyela toke etali lilo.

⁴ Omanu vaco va kevela haivo vakuombinde. Hu tuma kokuavo kuenje o va sapuila, huti, Oco ca popia Yehova.

⁵ Oco nda va yeva, nda ka va yevi, momo vakuepata liusuanji ale, va limbuka okuti pa kala uprofeto pokati kavo.

⁶ Oco a Mõlõmunu, ku ka va kuatele ohele pamue oku kala lusumba wolondaka viavo, ndaño enganji lolosongo vi kasi kumue love, love wa tunga pokati kanyenya. Ku ka kale lusumba wolondaka viavo, ku ka yokokele ovipala viavo momo vakuepata liusuanji.

⁷ Puãi o va sapuila olondaka viange, nda va yeva, nda ka va yevi, momo ovisuanji.

⁸ Puãi ove, A Mõlõmunu, yeva eci hu sapuila. Ku ka linge ocisuanji ndepata liaco liusuanji. Asama. Lia eci hu ĩha.

⁹ Eci nda vanja, tala, eka lia ngoluiwila kuenje mua kala ociña celivulu.

¹⁰ Yu wa U nyanyumuĩla kovaso ange. Lia sonẽhĩwa vokati lokoñoño yaco. Mua sonẽhĩwa oku lisiõsiõla loku litetela loku lila.