ESEKIELE 19 - Embimbiliya - Bíblia Sagrada em Umbundu

¹ Ove, lisiõsuĩla olosoma via Isareli.

² Popia huti, Nyoho yene wa kala ohosi yomange, wa pekela pokati kolondumbu. Pokati kolondumbu viamãlehe, haipo a tekuila omãla vaye,

³ kuenje wa tekula kamue potumãla tuaco. Oko ka lingapo ondumbu. Ya lilongisa oku likuatela ovinyama, ya takĩla omanu.

⁴ Olofeka via yi sandeka, yu ya kuatiwila vonjengele yavio kuenje va yi tuala lovinunga kofeka ye Egito.

⁵ Eci inaco a limbuka okuti wa tatekua, kuenje elavoko liaye lia pua, wopapo vali kamue kotumãla tuaye, kuenje lakovo ka lingavo ondumbu.

⁶ Ya ñuala ñuala pokati kolohosi, ya linga ondumbu. Ya lilongisa oku kuata ovinyama, ya takĩla omanu.

⁷ Ya nyõla olonjo viavo via fina, ya papulula ovaimbo avo. Ofeka, lomanu vosi va kalamo, va lulumila oku kumbakumba kuayo.

⁸ Oco olofeka via yi likongiliyila. Via yi nyanyumuĩla owanda, kuenje ya kuatiwila vonjengele yavio.

⁹ Va yi kapa vongayola lovinunga kuenje va yi tuala kosoma ya Bavulono. Va yi iñisa vombonge ya pama oco ondaka yayo ka yi ka yevale vali kolomunda via Isareli.

¹⁰ Nyoho yene wa kala nduti wuyuva vocumbo wa kũliwa konele yovava. Wa imaima apako, wa yumbita mekonda liovava a lua.

¹¹ Olunavi lua wo lua velapo koku pama lua linga epangati liosoma. Lua kala kilu pokati kovianja via pulika, kuenje lua mõleha kilu pokati kovianja viawo via lua.

¹² Puãi uti waco wuyuva wa puyiwa lonyẽno, wa kupuiwa posi. Ofela yokutundilo yo kukutisa. Apako awo a loluka lolonavi viawo via pama via teka teka. Ondalu yo nyõla.

¹³ Kaliye wa sondoluiwila vekango, vofeka ya kukuta, haiyo yenyona.

¹⁴ Kuenje volunavi luawo mua tunda ondalu ya nyola ovianja viawo lapako awo, okuti ka kua siale olunavi lua pama lu linga epangati liosoma. Oko oku lisiõsiõla kua lisiõsuĩwa.