ESEKIELE 18 - Embimbiliya - Bíblia Sagrada em Umbundu

¹ Ondaka ya Yehova yeya vali kokuange yiti,

² Olusapo luna luofeka ya Isareli luo lomboloki ndati, luna lua linga luti, Olonjali via lialia ayuva angangama kuenje ovayo omãla a kuatiwa luña?

³ Ñala Yehova hati, Ndomo ñasi lomuenyo, olusapo luaco ka lu tiwa vali lene vo Isareli.

⁴ Tala, ovimuenyo viosi viange, ci kale omuenyo wonjali, ci kale omuenyo womõla, viosi viange. U o linga ekandu eye o fa.

⁵ Nda omunu o kala ukuesunga, o linga ukuacili lesunguluko,

⁶ nda ka lila lila kolomunda, ka petuila ovaso aye koviteka via Isareli, ka vihĩsa ukãi wamãle, ka pitila ocipepi lukãi o kasi locituwa,

⁷ ka lingi umue civi, puãi ondolola kondevali onjeke yaye, ka ivaiva, eca olombolo viaye kuava va kasi lonjala, o walisa u o kasi lepẽle,

⁸ ka levalisa losindike, ka tambula ombandeke, o likala oku linga evĩho, o tetuluila esunga komunu omunu,

⁹ endaila vovisila viange, loku lava oviholo viange hã ha lingi esunga, eye ukuesunga muẽle, o kala ocili lomuenyo. Oco ca popia Ñala Yehova.

¹⁰ Nda o cita omõla ocimunu, ocimeseli cosonde, ka lingainga ovina evi,

¹¹ puãi o Ka kolomunda, o vihĩsa ukãi wamãle,

¹² o kangisa olohukuĩ lolosuke, ivaiva, kondolola vali onjeke, o petuila ovaso aye koviteka, o linga umbondo,

¹³ o levalisa losindike, loku tambula ombandeke, o ndoto hẽ, o kala lomuenyo? Ka kala lomuenyo. Wa linga avĩho a osi ocili muẽle o fa. Ongole yaco yaye muẽle, wa lipondisa.

¹⁴ Puãi nda omunu u o cita omola o lete akandu osi isiaye a linga, kuenje o kala lusumba, ka lingi ovina via lisoka lavio,

¹⁵ ka lila lila kolomunda, ka petuila ovaso aye koviteka viepata lia Isareli, ka vihĩsa ukãi wamãle,

¹⁶ ka lingi umue civi, ka kisika onjeke, ka ivaiva, eca olombolo viaye kuava va kasi lonjala, o walisa u o kasi lepẽle,

¹⁷ o likala oku linga eviho, ka tambula osindike pamue ombandeke, o lingainga oviholo viange, endaela vovisila viange; o ndoto ka fila ohole yaisiaye, ocili muẽle o kala lomuenyo.

¹⁸ Isiaye puãi, omo a endaenda loku talisa ohali, loku ivaiva via vakuavo, loku lingainga eci haciwako pokati kavakuavo, tala, eye o fa lohole yaye.

¹⁹ Puãi ene vu popia hoti, nye omõla ka filila ohole ya isiaye? Nda omõla wa linga eci ciwa haico ca sunguluka loku lava ovisila viange viosi, ocili muẽle o kala lomuenyo.

²⁰ Omunu o linga ekandu eye o fa. Omõla ka talela ohali ekandu lia isiaye, ndaño isia ka talela ohali ekandu liomõla. Esunga liukuesunga liaye, ũvi wondingaĩvi waye.

²¹ Puãi ondingaĩvi nda ya imbapo akandu aye osi a lingainga hã ha lavi ovisila viange viosi loku linga eci ciwa haico ca sunguluka, ocili muẽle o kala lomuenyo, ka fi.

²² Oku lueya kuaye kuosi a lingaile ka ku ivalukiwa vali okuti ku veta. O kala lomuenyo mekonda liesunga liaye a linga.

²³ Ame nga, sanjukila okufa kuondingãivi? Ka ca mbelelelepo okuti o tinduka kolonjila viaye hã ha kala lomuenyo? Oco ca popia Yehova Suku.

²⁴ Puãi eci ukuesunga a sia onjila yaye yesunga loku linga evĩho lovina viosi viumbondo vina vi lingainga ondingãivi, o kala hẽ lomuenyo? Ovilinga viaye viesunga vina a lingaile ka vivalukiwa vali. O fila muẽle usuanji waye lakandu aye a linga.

²⁵ Haimo vu popia hoti, Onjila ya Yehova ka ya sungulukile. Yevelela handi, apata lia Isareli. Onjila yange ka ya sungulukile, ale olonjila viene ka via sungulukile?

²⁶ Eci omunu ukuesunga a sia esunga liaye loku linga eviho, o fa, o fila eviho lina a linga.

²⁷ Kuenda vali, eci ondingãivi yimbapo akandu aye a lingainga, hã ha lingi eci ciwa haico ca sunguluka, o popela omuenyo waye.

²⁸ Omo a sokolola, yu wa imbapo oku lueya kuaye kuosi a lingile, ocili muẽle o kala lomuenyo, ka fi.

²⁹ Haimo epata lia Isareli liti, Onjila ya Yehova ka ya sungulukile. Apata lia Isareli, olonjila viange, nga, ka via sungulukile? Halonjila vieneko hẽ ka via sungulukile?

³⁰ Oco ndu tetuluili, apata lia Isareli, omunu omunu ndonjila yaye. Oco ca popia Yehova Suku. Tiuki. Imbipo oku lueya kuene kuosi sanga olohole viu nyoli.

³¹ Imbipo oku lueya kuene kuosi kuna wa ndueyeli. Kuati utima wokaliye lespiritu liokaliye. Vu fila nye, apata lia Isareli?

³² Momo si sanjukila okufa kuomunu umue, oco lipongoluisi, kali lomuenyo. Oco ca popia Yehova Suku.