ESEKIELE 17 - Embimbiliya - Bíblia Sagrada em Umbundu

¹ Ondaka ya Yehova yeya kokuange, yiti,

² A Mõlõmunu, ta olusapo. Lu ta ndocisetahãi cokepata lia Isareli,

³ huti, Ca popia Yehova Suku ceci, hati, Ongonga yimue yinene hayo yi kuete avava anene locisumba cinene lovonya avala aiñi aiñi, yeya ko Levanone, kuenje yopa ocanja kuti wo-cedro.

⁴ Oco ya teyako osungu yoponumbutue yaco yu ya enda layo kofeka yoku fũlila. Vimbo lia vakuakufũla omo ya yi kapa.

⁵ Kuenje yopavo ombuto yofeka, ya yi kũla posi yocili, ya yi kapa ocipepi lovava a lua, ya yi peka ndewunje.

⁶ Yu ya kula, ya linga uti wayuva wa tanda, umbumbulu, lolonavi viawo via pongolokela kokuayo, lolombombo viawo via kala vemẽhi liayo. Oco ya linga uti wayuva, ya eca olonavi, ya yova.

⁷ Kua kalavo ongonga yikuavo, yinene, lavava anene, lovonya a lua; kuenje tala, uti u wayuva wa imba olombombo viawo kokuayo, wa nyanyumuĩla kokuayo olonavi okuti yu tapela.

⁸ U kasi ale posi yimue yiwa, konele yovava a lua. U kuete ale olonavi, wimale apako, uyuva muẽle wa posoka.

⁹ Popia huti, Ca popia Yehova Suku ceci, hati, Uti waco owu wamako ale? Ka yi puyi hẽ olombombo viawo, loku teta epako liawo okuti u kukuta? Amẽla awo osi ovinjovelela he ka ovuka? Ka ci sukila ongusu yalua pamue owiñi womanu oku u tukũla.

¹⁰ Tala, eci u sondoluiwa hẽ, wamako ale? Ka wuvuka wosi eci ofela yokutundilo yi sikako, ka wuvuka apa wa kũliwa?

¹¹ Oco ondaka ya Yehova yeya kokuange yiti,

¹² Popia lepata liusuanji huti, Ka wa kũlĩhili hẽ ndomo mua lomboloka ovina evi? Va sapuila huti, Tala, osoma ya Bavulono yeya ko Yerusalãi, yambata osoma yavo lapalanga vaco, ya enda lavo ko Bavulono.

¹³ Yu yopa umue kepata liolosoma, ya lisila laye ocisila loku lisinga. Yopamo akulu vofeka

¹⁴ oco usoma u sepuisue okuti ka wamiko vali te poku lava ocisila caye oco u kolisua.

¹⁵ Puãi wo lingila usuanji poku tuma olomunga viaye ke Egito okuti va Egito vo tumisa otuvalu lasualali. O sumulũha hẽ? O linga ovina ndevi hẽ o puluka?

¹⁶ Umue o nyõla ndomo ocisola hẽ o puluka? Yehova Suku hati, Ndomo ñasi lomuenyo, apa pa tunga osoma yina yo vialeka, yina a pembula esingo liayo loku nyõla ocisola cayo, haipo muẽle po Bavulono a fila.

¹⁷ Fareo lolohoka viaye via pama kuenda asualali vaye vakahandangala ko kuatisa kovita eci olondunda viene via ongekiwa lovimbaka via tungiwa oku nyõla ovimuenyo via lua.

¹⁸ Omo a pembula esingo loku nyõla ocisila, lomo a likuminyile puãi wa linga ovina evi viosi, ka puluka.

¹⁹ Oco Yehova Suku hati, Ndomo ñasi lomuenyo, esingo liange lina a pembula, locisila cange cina a nyõla, ndi vi kapa vutue waye.

²⁰ Ndu nyanyumuĩla owanda wange ha fi vonjanjo yange, kuenje ndu nena ko Bavulono haiko ndu sombisila usuanji a ndingila.

²¹ Asualali vaye va velapo va fa losipata, lava va supapo va sandokaila kolonele viosi. Kuenje wu limbuka okuti ame ndi Yehova nda ci popia.

²² Ca popia Yehova Suku ceci, hati, Ame muẽle neya ocanja coponumbutue yo-cedro, ndi ci peka. Kovinjovelela viaco netako olunavi luokaliye kuenje ndu lu peka komunda ya lepa haiyo ya posoka.

²³ Komunda ya lepa ya Isareli oko ndu lu peka kuenje lu eca olonavi, lu ima epako, lu linga uti wo-cedro wa posoka. Vemehi liawo mu vutama ovinyama viosi. Vulembo wolonavi viawo olonjila viosi vi kalamo.

²⁴ Oco oviti viosi viusenge vi kũliha okuti ame ndi Yehova, ame ñupula uti wa lepa, haime ndepisa uti umbumbulu, ame ñukutisa uti u talala, haime nalalisa uti wa kukuta. Ame ndi Yehova ndi ci popia, haime ndi ci linga.