ESEKIELE 14 - Embimbiliya - Bíblia Sagrada em Umbundu

¹ Kuenje kokuange kueya ovalume vamue kovakulu va Isareli, yu va tumãla kovaso ange.

² Oco, ondaka ya Yehova yeya kokuange yiti,

³ A Mõlõmunu, ovalume ava va kapa oviteka viavo vovitima viavo, locilondokua cevĩho liavo va ci kapa kovaso ovipala viavo. Nava hẽ okuti muliwa lavo?

⁴ Oco popia lavo hu va sapuila huti, Ca popia Ñala Yehova ceci, hati, Omunu wosi ukuepata lia Isareli o kapa oviteka viaye vutima waye, loku kapa ocilondokua cevĩho liaye kovaso ocipala caye, nda iya kuprofeto, ame ndi Yehova ame muẽle ndu tambulula mekonda liomumu yoviteka viaye,

⁵ oco ñuate ovitima via vakuepata lia Isareli vana va litepa lame mekonda lioviteka viavo.

⁶ Oco popia lepata lia Isareli huti, Ca popia Yehova Suku ceci, hati, Tiuki. Imbipo oviteka viene. Tinduli ovipala viene kovombondo ene osi.

⁷ Momo omunu wosi ukuepata lia Isareli, pamue umue wa vakualofeka va tunga vo Isareli, nda o tepa kokuange, hã ha kapi oviteka viaye vutima waye, loku kapa ocilondokua cevĩho liaye kovaso ocipala caye, kuenje iya kuprofeto oku pula, ame ndi Yehova ame muẽle ndu tambulula.

⁸ Omunu waco ndu pongolokelamo. Ndu lingisa ocindekaise lelungulo. Ndu wupa pokati komanu vange, kuenje vu limbuka okuti ame ndi Yehova.

⁹ Kuenje nda uprofeto o liañiwa kuenda o popia ondaka yimue, ame ndi Yehova, ame nda liaña uprofeto waco. Ndu wõluĩla eka liange, ndu nyõla pokati komanu vange va Isareli.

¹⁰ Kuenje va sanga eyambulo liavo. Eyambulo liuprofeto li soka leyambulo liukuakupula,

¹¹ okuti oco epata lia Isareli ka li tundi vali kokuange, ndaño oku livĩhĩsa vali loku lueya kuavo kuosi. Puãi va linga omanu vange, lame ndinga Suku yavo. Oco ca popia Yehova Suku.

¹² Ondaka ya Yehova yeya vali kokuange yiti,

¹³ A Mõlõmunu, eci ofeka yi ndueyela loku mbuenguila usuanji, lame ngõluĩla eka liange kokuayo, loku nyõla ombolo yeteku liayo, loku tuma kokuayo elambu, loku nyõla omanu lovinyama,

¹⁴ ndaño ovalume vana vatatu, okuti Noha la Daniele la Yovi, nda va kaile vokati kavo nda va popela lika ovimuenyo viavo muẽle mekonda liesunga liavo. Oco ca popia Yehova Suku.

¹⁵ Nda nda pitisa vofeka ovinyama via tema ha vi yi nyõli, kuenje yi kala upolokoso, ndokuti lomue o pitamo mekonda liovinyama viaco,

¹⁶ ndaño ovalume vaco vatatu nda va kaile vokati kayo, ndomo ñasi lomuenyo, nda ka va popelele omãla valume ndaño omãla vakãi. Ovo lika va popelua, ofeka puãi yi nyõlẽha.

¹⁷ Pamue nda nda nena osipata kofeka yaco, loku popia siti, Osipata yi pite vofeka, pamue nda nda nyõla omanu lovinyama,

¹⁸ oco, ndaño ovalume vaco vatatu, nda va kaile vokati kayo, ndomo ñasi lomuenyo, nda ka va popelele omãla valume ndaño omãla vakãi. Puãi ovo lika va popelua. Oco ca popia Yehova Suku.

¹⁹ Pamue nda nda tuma efengi vofeka yaco loku sukumuila kokuayo onyeño yange losonde okuti nyõlako omanu lovinyama,

²⁰ ndaño Noha, la Daniele, la Yovi, nda va kaile vokati kayo, ndomo ñasi lomuenyo, nda ka va popelele omõla ulume ndaño omõla ukãi. Ovo lika va popelua mekonda liesunga liavo. Oco ca popia Yehova Suku.

²¹ Ca popia Yehova Suku ceci, hati, Ka ci piãla vali hẽ eci numa ko Yerusalãi apiso ange akuãla ana a vala, okuti osipata, lelambu, kuenda ovinyama via tema, lefengi, hã si nyõli omanu lovinyama?

²² Haimo tala, nda mu supuluka vamue, nda omãla valume, pamue omãla vakãi, kuenje va puluka, veya kokuene, ene eci vu mõli olongenda viavo lovilinga viavo oco vu lembelekua kũvi waco nda nena ko Yerusalãi, kovina viosi nda nena kokualio.

²³ Kuenje vo lembeleki eci vu mõla olongenda viavo lovilinga viavo. Vu limbuka okuti cosi nda lingilemo sia ci lingile ño ocipango. Oco ca popia Yehova Suku.