ESEKIELE 13 - Embimbiliya - Bíblia Sagrada em Umbundu

¹ Ondaka ya Yehova yeya kokuange yiti,

² A Mõlõmunu, imba owanji woku pisa ovaprofeto va Isareli. Imba owanji. Popia lava va imba owanji wovovitima viavo, huti, Yevi ondaka ya Yehova.

³ Ca popia Ñala Yehova ceci, hati, Ovaprofeto vesanda vana va kuama utima wavo muẽle, locinjoinjoi cocili ka va la ci mõla, ngongo yavo.

⁴ A Isareli, ovaprofeto vove va kasi ndolombulu vekalasoko.

⁵ Ene, avaprofeto, ka wa londeli oku sitika apangu. Ka wa tungilili epata lia Isareli ocimbaka cokuti va talama ciwa keteke liovita via Yehova.

⁶ Va mõla ovinjoinjoi viesanda. Va imba owanji wuhembi. Va popia vati, Yehova wa ci popia, osimbu Yehova ka va ci tumile, kuenje va lavoka okuti o lemũlũla ondaka yavo.

⁷ Ka wa muĩli he ocinjoinjoi cesanda? Ka wa imbili hẽ owanji wuhembi, eci wa popaili hoti, Yehova hati, osimbu sia ci popele?

⁸ Oco, ca popia Ñala Yehova ceci, hati, Omo wa popi uhembi kuenda wa mõli cesanda, oco tala, ndo pongolokelimo. Oco ca popia Ñala Yehova.

⁹ Leka liange li pongolokelamo ovaprofeto va mõla ovinjoinjoi viesanda, loku imba owanji wuhembi. Ka va kala vali vohongele yomanu vange, ndaño oku sonẽhĩwa velivulu liolonduko viepata lia Isareli, ndaño oku iñila vofeka ya Isareli. Kuenje vu limbuka okuti ame ndi Ñala Yehova.

¹⁰ Oco, omo va endaenda loku kemba omanu vange, vati, Ombembua! osimbu ka kuli ombembua, lomo, eci omanu va tunga ocimbaka ovaprofeto vesanda va ci kolonga locikela,

¹¹ oco, sapuila ava va ci kolonga locikela, huti, Ci kupuka. Kuiya ombela ya lua, lociwe calua ci loka kuenda ofela yonupi yi sika.

¹² Eci ocimbaka ci kupuka, ka va ka popia hẽ lene, vati, Oku kolonga kuaco wa kolongeli hẽ, kupi?

¹³ Oco Ñala Yehova hati, Oco sikisa ofela yonupi lonyeño yange. Kuiya ombela ya lua loku tema kuange. Kuiyavo ociwe ha ci ci nyõli lonyeño yange.

¹⁴ Kuenje ocimbaka wa kolongeli locikela ndi ci kupuila posi ha ci nyõlẽha cosi. Lociseveto caco ci mõlẽha eci ci kupuka. Lene vu nyõlẽhẽla vokati kaco. Kuenje vu limbuka okuti ame ndi Yehova.

¹⁵ Oco nẽlĩsila onyeño yange kocimbaka, kuenda kuava va ci kolonga locikela. Mopia lene siti, Ocimbaka kaciko vali, ndaño vava va ci kolongele,

¹⁶ ndokuti ovaprofeto va Isareli, vana va imbaimba owanji wovina viya ko Yerusalãi, haivo va mõla ovinjoinjoi viombembua yalio osimbu ka kuli ombembua. Oco ca popia Nala Yehova.

¹⁷ Love, a Mõlõmunu, tamãlãla lomãla vakãi vomanu vove, vana va imbaimba owanji wovovitima viavo. Tamãlãla lavo,

¹⁸ huti, Ca popia Ñala Yehova ceci hati, Akãi va tongela olosĩlo viumbanda kotumukumuku tua vosi, haivo va linga ovifuto viokovitue viomanu vakuavitunga viosi, ha va tavisa omanu, ngongo yavo! Ene nga, vu kuata ovitima viomanu vange ha vu limuĩsa lavio?

¹⁹ Wa mbĩhĩsili pokati komanu vange mekonda liapupu osevata lovimalañanya viombolo. Wa mbĩhĩsa poku ipaya omanu ka va sesamẽlẽle okufa, loku supisapo ava ka va sesamẽlẽle oku kala lomuenyo. Wa mbĩhĩsa poku kemba omanu vange vana va yevelela kuhembi wene.

²⁰ Kuenje Ñala Yehova wa popia hati, Ota nda suvuka olosĩlo viene vina vu kuata lavio ovitima viomanu. Ndi vi upa kovoko ene. Mandulula omanu vana wa kuateli okuti va enda ocipango cavo ndolonjila.

²¹ Fuokola ovifuto viene. Mopela omanu vange povaka ene. Ka va kala vali povaka ene okuti va kuatiwa. Oco vu limbuka okuti ame ndi Yehova.

²² Momo wa sumuisi lesanda utima wukuesunga una ame sia sumuisile. Wa kolisi ondingãivi okuti ka pambuka konjila yaye yĩvi hã ha kala lomuenyo.

²³ Oco ko mõli vali ovinjoinjoi viesanda ndaño oku imba owanji. Mopela omanu vange povaka ene. Oco vu limbuka okuti ame ndi Yehova.