ESEKIELE 12 - Embimbiliya - Bíblia Sagrada em Umbundu

¹ Oco ondaka ya Yehova yeya kokuange yiti,

² A Mõlõmunu, ove wa tunga pokati kepata liusuanji. Va kuete ovaso oku vanja puãi ka va lete. Va kuete ovatũi oku yeva puãi ka va yevite; momo ovo epata liusuanji.

³ Oco ove, a Mõlõmunu, angiliya ovikuata viumandekua. Kuende utanya kumandekua kovaso avo. Kocitumãlo cove o sondolokako hu endi kocitumãlo cikuavo kovaso avo; pamue ci va lomboloka ndaño vakuepata liusuanji.

⁴ Kuenje utanya o tundisa ovikuata viove kovaso avo ndu enda kumandekua. Noke kekumbi ove muẽle o tunda kovaso avo, ndomanu va enda kumandekua.

⁵ Kovaso avo vulula epangu vocimbaka omo o pita.

⁶ Kovaso avo o kapa ocitele pocitẽi loku enda laco vowelema. O vuvika ocipala cove okuti ku mõli osi; momo nda ku kapa ndocindekaise kepata lia Isareli.

⁷ Oco nda linga ndeci nda handelekiwa. Ovikuata nda vi upa utanya ndu enda kumandekua. Noke kekumbi nda vulula vocimbaka lovaka ange. Nda enda uteke loku vi ambata kocitẽi cange kovaso avo.

⁸ Omẽle ondaka ya Yehova yeya kokuange yiti,

⁹ A Mõlõmunu, epata lia Isareli hailio epata liusuanji, ka lia popele love, liti, Nye woku linga?

¹⁰ Popia lavo huti, Ca popia Ñala Yehova ceci, hati, Owanji u u tiama kosoma yo vo Yerusalãi kuenda komanu vosi vakuepata lia Isareli va kasimo.

¹¹ Popia huti, Ame ndicindekaise cene. Ndeci ame nda linga haico ci va lingilua. Va enda ndolohute kumandekua.

¹² Soma yavo ambata ovikuata kocitẽi caye lowelema, kuenje o tunda, o vulula vocimbaka haimo a pita. O vuvika ocipala caye okuti ka mõli osi lovaso aye.

¹³ Ndu nyanyumuĩla owanda wange, yu o kuatiwa vonjanjo yange, kuenje ndu tuala ko Bavulono kofeka ya va Kaldea, puãi ka yi mõli, kuenje haiko a ka fila.

¹⁴ Vosi va kala konẽle yaye oku u kuatisa, lolohoka viaye viosi, ndi va sanduila kolofela viosi loku va somuĩla osipata konyima yavo.

¹⁵ Oco va limbuka okuti ame ndi Yehova eci ndi va sandowaila pokati kapata, loku va sanduila volofeka.

¹⁶ Puãi pokati kavo muluisapo vamue vañamiñami kosipata lokelambu kuenda kefengi, ha va lombolola ovombondo avo osi pokati kapata oko va enda. Kuenje va limbuka okuti ame ndi Yehova.

¹⁷ Oco ondaka ya Yehova yeya vali kokuange yiti,

¹⁸ A Mõlõmunu, lia ombolo yove loku luluma. Nyua ovava ove locinjoko kuenda ohele.

¹⁹ Popia lomanu vakuafeka yaco huti, Ca popia Ñala Yehova coku tukula olonungi via Yerusalãi vofeka ya Isareli ceci, hati, Ombolo yavo va ka yi lia lohele, lovava avo va ka a nyua longuele, momo ofeka yavo yi pundiwa cosi mekonda liungangala wava vosi va tungamo.

²⁰ Ovaimbo anene a linga alunda, lofeka yi nyõlẽha. Kuenje vu limbuka okuti ame ndi Yehova.

²¹ Kuenje ondaka ya Yehova yeya kokuange yiti,

²² A Mõlõmunu, Olusapo hẽ, luna vu kuete vofeka ya Isareli, luti, Oloneke vi pita, ovinjoinjoi puãi ka vi lemũlũiwa?

²³ Oco va sapuila huti, Ca popia Ñala Yehova ceci, hati, Sulisa olusapo luaco kuenje ka lu silivila vali kokuavo ndolusapo lua va Isareli. Puãi va sapuila huti, Oloneke via pitila vioku lemũlũha kuovinjoinjoi viosi.

²⁴ Momo ka ku kala vali ocinjoinjoi cesanda ndaño ocitãho combambe pokati kepata lia Isareli.

²⁵ Momo ame ndi Yehova mopia, londaka mopia yi lingiwa. Ka yamisua vali kovaso. Momo koloneke viene, apata liusuanji, mopia ondaka kuenje ndi yi linga. Oco ca popia Ñala Yehova.

²⁶ Ondaka ya Yehova yeya vali kokuange, yiti,

²⁷ A Mõlõmunu, tala, vakuepata lia Isareli va popia vati, Ocinjoinjoi a mõla coloneke via lua kovaso, lowanji a imba wolotembo vi kasi kupãla.

²⁸ Oco va sapuila huti, Eci ca popia Ñala Yehova ceci hati, Layimue ondaka yamisuako vali, puãi ondaka mopia yi lingiwa. Oco ca popia Ñala Yehova.