ESEKIELE 11 - Embimbiliya - Bíblia Sagrada em Umbundu

¹ Oco Espiritu lia njelula kuenje lia nuala kombundi yokutundilo yonjo ya Yehova, yina ya imba ovaso kutundilo; kuenje tala, puvelo wombundi pa kala akũi avali kalume kalume vatãlo. Pokati kavo nda mõla Yasaniya omola a Asure, kuenda Pelatiya omola a Benaya, akulu vofeka.

² Yu wa popia lame hati, A Mõlõmunu, ava ndeti ovo ovalume va sima sima evĩho, haivo va ecaeca alungulo ãvi kimbo lilo,

³ vati, Otembo yoku tunga olonjo ka yi pepi. Imbo lilo olio ombia, etu tusitu yaco.

⁴ Oco va imbila owanji wovina vi va veta. Imba owanji, a Mõlõmunu.

⁵ Kuenje Espiritu lia Yehova lia mbuila, lia popia lame liti, popia huti, Ca popia Yehova ceci hati, Apata lia Isareli, oco wa simi? Nda kũlĩha ovisimĩlo vi kasi vovitima viene.

⁶ Wa ipayi valua vimbo lilo. Wa yukisi olokololo vialio lava va pondiwa.

⁷ Oco, Ñala Yehova hati, Ava va pondiwa haivo wa kapi vokati kalio, ovo ositu yaco, imbo olio ombia yaco, puãi wupiwi vokati kalio.

⁸ Vu kuete usumba wosipata kuenje osipata ndi yi nena kokuene. Oco ca popia Ñala Yehova.

⁹ Ndu wupi vokati kalio. Ndu telekali povaka a vakualofeka, kuenje ndu tetuluili.

¹⁰ Vu kupuka losipata. Ndu tetuluili kolongave via Isareli, kuenje vu limbuka okuti ame ndi Yehova.

¹¹ Imbo lilo ka li lingi ombia yene, ndaño ene ka vu lingi ositu vokati kalio. Ndu tetuluili kolongave via Isareli,

¹² kuenje vu limbuka okuti ame ndi Yehova. Momo ka wa endeleli vovisila viange, ka wa lingili oviholo viange, wa lingi puãi oviholo viapata o ñuali.

¹³ Eci nda kala loku imba owanji oco Pelatiya omõla a Nenaya wa fa. Oco nda wila posi, nda lituvikapo. Nda liyula londaka yalua siti, A Ñala Yehova, o mãlũsula pe ocisupe ca Isareli?

¹⁴ Oco ondaka ya Yehova yeya kokuange yiti,

¹⁵ A Mõlõmunu, va Yerusalãi va mumuĩla vamanjove haivo vakuẽlẽ kumandekua, ndaño epata liosi lia Isareli, vati, Va litepa calua la Yehova. Ofeka yilo ya tu ĩhĩwa etu.

¹⁶ Oco popia huti, Ca popia Ñala Yehova ceci, hati, Ndaño nda va tuma kupãla pokati kapata akuavo, ndaño nda va sandowaila pokati kolofeka, haimo nda va lingila ombindikiyo osimbu va kala volofeka omo va sandokaila.

¹⁷ Oco popia huti, Ca popia Ñala Yehova ceci hati, Ndu kongoli pokati kapata. Ndu wongololi kolofeka kuna wa sandokalali. Ndu wĩhi ofeka ya Isareli.

¹⁸ Kuenje eci veya va tundisa ovina viosi vi linga onyanya, lovombondo avo osi.

¹⁹ Ndi va ĩha utima umuamue. Ñapa vokati kavo espiritu liokaliye. Vetimba liavo njupamo utima wewe kuenje ñapamo utima wositu.

²⁰ Oco va endaela vovisila viange loku lava lava oviholo viange loku vi lingainga. Kuenje va linga omanu vange, lame ndinga Suku yavo.

²¹ Puãi ava va kuete utima woku kuama ovina viavo vi linga onyanya, lovombondo avo, ñupuila kovitue viavo ovilinga viavo. Oco ca popia Ñala Yehova.

²² Oco vakeruvi va petula avava avo, lalola a kala kumosi lavo. Kuenda ulamba wa Suku ya Isareli wa va tulamela.

²³ Lulamba wa Yehova wa yeluka vokati kimbo, wa talama kilu liomunda yina yi kasi kutundilo wimbo.

²⁴ Oco espiritu lia njelula, yu vocinjoinjoi lia nuala toke ko Kaldea kolomandekua. Oco ocinjõinjõi nda muĩle ca nunda.

²⁵ Nda vangula lolomandekua ovina viosi Yehova a ndekisa.