ESEKIELE 10 - Embimbiliya - Bíblia Sagrada em Umbundu

¹ Oco nda vanja, kuenje tala, vepuluvi lina lia kala kilu liovitue viavakeruvi mua mõlẽha kilu liavo cimue ca soka ndewe liosafira. Oku molẽha kuaco kua setahãla omangu yosoma.

² Kuenje wa popia lulume wa wala ovalatanya hati, Iñila vokati kalola a ñuala toke vemehi liavakeruvi. Yukisa ovaka ove lakãla a taima pokati kavakeruvi, loku a sandowaila vimbo. Yu wa iñila kovaso ange.

³ Vakeruvi vaco va talama konẽle yondio yonjo eci ulume waco a iñila. Elende ha yukisa ocitali covokati.

⁴ Oco ulamba wa Yehova wa votoka ku vakeruvi, weya kuvelo wonjo. Onjo ye yukisua lelende, locitali ce yuka locinyi culamba wa Yehova.

⁵ Lonjuvungo yavava a vakeruvi ya yevala toke kocitali coposamua ndondaka ya Suku Ukuonenewosi eci a popia.

⁶ Eci eye a handeleka ulume wa wala ovalatanya hati, Upa ondalu pokati kalola a ñuala ñuala pokati kavakeruvi, oco a iñila, kuenje wa talama ocipepi lelola.

⁷ Ukeruvi wõlõla eka liaye tunde pokati kavakeruvi toke ondalu ya kala pokati kavakeruvi, yu wa yupako hã ha yi kapi povaka u wa wala ovalatanya, kuenje wa yi tambula, wa tunda.

⁸ Ku vakeruvi kua mõlẽha ocisetãhãi ceka liomunu vemehi liavava avo.

⁹ Oco nda vanja kuenje tala, kua kala alola akuãla ocipepi la vakeruvi, ukeruvi elola, ukeruvi elola. Okumõlẽha kualola kua setãhãla ewe lioturkesa.

¹⁰ Okumõlẽha kuao, kakuãla kao, kua lisoka, okuti elola vokati kelola likuavo.

¹¹ Eci a enda, a enda kolonẽle viao vikuãla, ka a pambuka eci a enda. Kuosi kua imba ovaso elola liokovaso oko alola akuavo a suñama, ka a pukuka eci a enda.

¹² Lovinangalo, lalola kakuãla kavio via kala lao, lolosinja, viosi vie yuka ovaso.

¹³ Kuenje alola a tukuiwa kovatuĩ ange hati, Alola a ñuala ñuala.

¹⁴ Umosi umosi wa kala lovipala vikuãla: Ocipala catete ocipala congombe, ocipala cavali ocipala comunu, ocipala catatu ocipala ohosi, locipala cakuãla ocipala congonga.

¹⁵ Kuenje vakeruvi va yeluka vilu. Evi ovio oviendalomuenyo vina nda muĩle ocipepi lolui Kevare.

¹⁶ Eci vakeruvi va enda alola a enda kumosi lavo, leci vakeruvi va petula avava avo ha va yeluka, alola laovo ka a litepele lavo.

¹⁷ Eci va talama, laovo a talama. Eci va yeluka, laovo a yeluka kumosi lavo; momo espiritu lioviendalomuenyo lia kala kokuao.

¹⁸ Ulamba wa Yehova wa tunda kuvelo wonjo, yu wa talama kilu lia vakeruvi.

¹⁹ Kuenje vakeruvi va petula avava avo, va yeluka posi kovaso ange eci va tunda, lalola kumosi lavo. Va talama puvelo wombundi wokutundilo yonjo ya Yehova. Lulamba wa Suku ya Isareli wa va tulamẽla.

²⁰ Evi ovio oviendalomuenyo vina nda muĩle vemẽhi lia Suku ya Isareli, ocipepi lolui Kevare. Nda ci limbuka okuti ovo vakeruvi.

²¹ Vosi umosi umosi va kala lovipala vikuãla, kuenda vosi umosi umosi va kala lavava akuãla. Vemẽhi liavava avo mua kala cimue ca setahãla ovaka omunu.

²² Loku mõlẽha kuovipala viavo hako oku mõlẽha kuovipala vina nda muĩle ocipepi lolui Kevare. Vosi va enda loku suñama kovaso.