ESEKIELE 1 - Embimbiliya - Bíblia Sagrada em Umbundu

¹ Kunyamo wakuĩ atatu, kosãi yakuãla, keteke liatãlo kosãi, oco nda kala pokati kolomandekua ocipepi lolui Kevare, kuenje ovailu a yuluka, yu nda mõla ovinjoinjoi via Suku.

² Keteke lia tãlo kosãi, ca kala unyamo watãlo wumandekua wosoma Yehoyakimi,

³ oco ondaka ya Yehova yeya ku Esekiele ocitunda, omõla a Busi eci a kala vofeka ya va Kaldea, ocipepi lolui Kevare, kuenje eka lia Yehova lio wila.

⁴ Yu nda vanja, kuenje tala, kueya ofela yonupi ya tunda ko Norte, lelende linene, ocinyi ca tua ca li ñuala, vokati kalio ondalu ya liakoka. Vokati kondalu mua mõlẽha cimue ca soka ndongula ya kungiwa.

⁵ Kuenje vokati kaco mua tunda ocisetahãi coviendalomuenyo vikuãla. Emõlẽhẽlo liavio lieli: Via setahãla omunu.

⁶ Puãi ocendalomuenyo locendalomuenyo ca kala lovipala vikuãla, kuenda avava akuãla.

⁷ Ovolu avio a miũha kuenda polomãi viavio ndopakonjo onãle. Pa nina ndevala liongula lia kungiwa.

⁸ Vemẽhi liavava avio mua kala ovaka ndovaka omunu kolonẽle viavio vikuãla. Ovipala viavio kuenda avava avio, kakuãla kavio, via kala ndomo:

⁹ Avava avio a litokeka pamosi, ka vi pukuka eci vi enda. Viosi via enda loku suñama kovaso.

¹⁰ Esetahãlõ liovipala viavio lia kala ndomo: Kakuãla kavio, kovaso ocipala comunu, kondio ocipala cohosi, kepĩli ocipala congombe, konyima ocipala congonga.

¹¹ Oco ca kala ovipala viavio. Avava avio a tandavala kilu. Avava avali ocendalomuenyo a lilamba lavava oviendalomuenyo vi kasi konẽle lonẽle, kuenda avali a sitika katimba avio.

¹² Kuenje ocendalomuenyo locendalomuenyo ca enda loku suñama kovaso. Kuosi espiritu lia enda haiko via endavo. Ka vi pukuka eci vi enda.

¹³ Pokati koviendalomuenyo pa mõlẽha cimue ndakãla ondalu a taima, a pita pokati koviendalomuenyo ndovimi. Ondalu yu ya nina kuenje vondalu mua tunda ovaliakulo.

¹⁴ Oviendalomuenyo via Suala ñualãpo ndoviliakulo.

¹⁵ Leci nda vanja oviendalomuenyo, tala, ocipepi lavio nda mõla alola posi, ocendalomuenyo lelola, ocendalomuenyo lelola.

¹⁶ Oku mõlẽha kualola loku tungiwa kuao kua lisoka, kakuãla kao, kua kala ndomo: Oku mõlẽha kuao kua soka ndoku nina kuewe lia turkesa. Oku tungiwa kuao kua kala ndelola vokati kelola likuavo.

¹⁷ Eci a enda, a enda kolonẽle viao vikuãla, ka a pambuka.

¹⁸ Alola aco a kuãla a kala lovinangalo lolosinja, kuenje ovinangalo viosi vie yuka ovaso.

¹⁹ Eci oviendalomuenyo vi enda, alola a endavo kolonẽle viavio. Eci oviendalomuenyo vi yeluka posi, alola a yelukavo.

²⁰ Kuosi espiritu li enda haiko a enda, kuenje alola a yelukila kumosi lavio, momo espiritu liocendalomuenyo lia kala kalola.

²¹ Eci vi enda laovo a enda. Eci vi talama laovo a talama. Eci vi yeluka posi alola laovo a yelukila kumue lavio; momo espiritu lioviendalomuenyo lia kala kalola.

²² Kilu liovitue vioviendalomuenyo kua kala ocisetahãi cilu, ca soka ndovitulu yi nina, yina yi kola, lia nyanyumuĩwĩla kilu liovitue viavio, oku vi tulamẽla.

²³ Vemẽhi lilu avava avio a tandavala, a lisuñama lakuavo. Viosi via kala lavava avali avali a sitika katimba avio.

²⁴ Eci via kala loku enda oco nda yeva onjuvungo yavava avio, ndocileñi covava alua, ndondaka yUkuonenewosi. Oku yuela kuondindimo yaco kua soka ndoku yuela kuovita. Eci via talama oco via sõlõla avava avio.

²⁵ Kilu lilu lia vi tulamẽla kua yevala ondaka. Eci vi talama vi sõlõla avava avio.

²⁶ Kilu lilu lia vi tulamẽla kua kala ocisetahãi comangu yosoma, ya soka ndewe liosafira. Kuenje kilu liocisetahãi comangu kua kala cimue ca soka ndomunu.

²⁷ Tunde kemolẽhẽlo lioviongo viaye toke kilu nda mõla cimue ca soka ndosipi yi nina pamue ndondalu yo ñuala, kuenda tunde kemolẽhẽlo lioviongo viaye toke kombuelo nda mõla cimue ca molẽha ndondalu, locinyi co ñuala.

²⁸ Ndemolẽhẽlo liolukongolo velende eteke liombela oco ca kala emolẽhẽlo liocinyi ca ñualako. Oco ca kala emolẽhẽlo liocisetahãi culamba wa Yehova. Eci nda ci mõla nda wila posi, nda lituvikapo, kuenje nda yeva ondaka yu wa popia.