EFETIKILO 9 - Embimbiliya - Bíblia Sagrada em Umbundu

¹ Suku yu wa sumũluĩsa Noha lomãla vaye, wa popia lavo hati, Liciti, siati, yukisi oluali.

² Ovinyama viosi viokilu lieve lolonjila viosi viovusenge viu yokokeli, viu lulumili, vi kundikiwa povaka ene kumue lovipuka viosi vi likoka posi, lolõsi viosi viovokalunga.

³ Cosi ci kasi lomuenyo ci ñuala ñuala ci linga okulia kuene; ndeci ndo wihili ale ovikũla vi talala haico cilo ndo wihi cosi.

⁴ Puãi ositu yi kuete omuenyo wayo okuti osonde ka ci tava oku yi lia. Kuenda vali wosi o pesela osonde yaye muẽle ndu yi silĩha.

⁵ Silĩha muẽle osonde ndaño kocinyama ndaño komunu; kuenje kokuange omunu lomunu o kuete ocikele comuenyo womunu ukuavo.

⁶ Wosi o pesela osonde yomunu osonde yaye yi peseliwavo lomunu, momo Suku wa lulika omunu ukuesetahãlo liaye.

⁷ Lenevo liciti, siati, liluisi ca lua kilu lieve, liluisi muẽle.

⁸ Suku wa popia La Noha lomãla vaye hati,

⁹ Ame ocili ñolisila ocisila cange kokuene lokombuto yene yu kuami,

¹⁰ lokovinyama viosi vi kasi lene, lolonjila, lovinyama viovimbo lovinyama viosi viovusenge; cosi ci tunda vocimbaluku.

¹¹ Ame ndi lisila lene ocisila ci kola, siti, Lalimue vali eteke omanu va nyõleha letande; lalimue vali eteke etande li nyõla oluali.

¹² Suku wa linga hati, Ondimbukiso yocisila nda lisila lene loviendalomuenyo viosi vi kasi lene toke kovitumbulukila vi enda ño hũ, yeyi:

¹³ Ñapa olukongolo luange kalende hã ha lu lingi ondimbukiso yocisila pokati kange loluali.

¹⁴ Noke, eci mitisa alende kilu kuenda olukongolo lu mõlehela kalende,

¹⁵ oco njivaluka ocisila cange cina ci kasi pokati kange lene loviendalomuenyo viosi vi kasi lomuenyo, kuenje ovava ka a lingi vali etande oku nyõla cosi ci kasi lomuenyo.

¹⁶ Eci olukongolo lu mõlehela kalende oco ndi lu vanja kuenje njivaluka ocisila ka ci pui ci kasi pokati kange ndi Suku lomanu vosi loviendalomuenyo viosi vi kasi kilu lieve.

¹⁷ Suku yu wa popia la Noha hati, Eyi oyo ondimbukiso yocisila nda lisila lene loviendalomuenyo viosi vi kasi kilu lieve.

¹⁸ Omala va Noha, ava va tunda vocimbaluku, vava: Semi, Hama la Yafete. Hama eye isia ya Kanana.

¹⁹ Ovo omãla vatatu va Noha kuenje kokuavo kua tunda vakuilu lieve vosi.

²⁰ Noha wa linga ongunja yatete yoku lima osi, wa kũla ocumbo cayuva;

²¹ wa nyua kovinyu kuenje wa kolua; wa pekela ño epõlõla vombalaka yaye.

²² Hama, isia ya Kanana, yu o lete ño epõlõla lia isiaye kuenje wa ci sapuila ku vahuvaye vavali va kala posamua.

²³ Semi la Yafete va yelula onyime, va yimba kovitai viavo kavali kavo, va enda ocinyimaime ha va sikĩlila epõlõla lia isiavo, kuenje ovipala viavo via pukukako okuti ka va muĩle epõlõla lia isiavo.

²⁴ Noha yu wa koluluka kuholua wovinyu viaye, kuenje wa limbuka eci co linga omõlaye umãlẽhe.

²⁵ Yu wa popia hati, Kanana a siñaliwe. A linge ukuenje wakuenje vavahuvaye.

²⁶ Wa popiavo hati, Semi a sumuluisue la Yehova, Suku yange. Kanana a linge ukuenje waye.

²⁷ Suku a salalise Yafete. Yafete a sikile volumbalaka via Semi; Kanana a linge ukuenje waye.

²⁸ Oco kovaso yetande Noha wa kala lomuenyo ovita vitatu kakui atãlo kanyamo.

²⁹ Oloneke viosi via Noha ovita ecea kanyamo kanyamo akui atãlo yu wa fa.