EFETIKILO 8 - Embimbiliya - Bíblia Sagrada em Umbundu

¹ Suku yu wa ivaluka Noha loviendalomuenyo viosi lovinyama viovimbo viosi via kala laye vocimbaluku, kuenje Suku wa sikisa ofela kilu lieve; ovava a pupuluka.

² Olono viokalunga via livembika kuenda apangu okilu a lisitika; ombela yokilu ya ca;

³ oco ovava a pupuluka kilu lieve naito naito, toke kefulilo liocita lakui atãlo koloneke kuenje ovava a tepuluka.

⁴ Ocimbaluku ca saka kolomunda via Ararate kosãi yepanduvali keteke liekui lepanduvali kosãi.

⁵ Kuenje ovava a enda loku tepuluka toke osãi yekui kuenje kosãi yekui keteke liatete kosãi, oloñoño violomunda via mõlẽha.

⁶ Kefulilo liakui akuãla koloneke oco Noha wa yulula onjanela a tungilile vocimbaluku.

⁷ Yu wa tundisa ocikuamanga kuenje ca tunda, ca ñuala ñuala toke ovava a takata kilu lieve.

⁸ Oco wa tundisa opomba oku limbuka nda ovava a puako kilu lieve.

⁹ Opomba ka ya sangele apa yi liatela olongonjo viayo kuenje ya tiukila ki Noha kocimbaluku; momo ovava a kasi kilu lieve liosi. Noha wa tundisa eka liaye, wa yi kuata, wa yiñisa vocimbaluku.

¹⁰ Yu wa imbisapo vali oloneke epanduvali, oco wa tundisa vali opomba vocimbaluku.

¹¹ Opomba ya tiuka kokuaye koñolosi, kuenje kuliungu wayo kua kala emẽla li talala lioliveira; oco Noha wa limbuka okuti ovava a tepuluka kilu lieve.

¹² Yu wamisapo vali oloneke epanduvali, oco wa tundisa opomba kuenje ka ya tiukile vali kokuaye.

¹³ Oco kunyamo wovita epandu la mosi, kosãi yatete, keteke liatete kosãi, oco ovava a takata kilu lieve. Noha yu wa tuvula onuviko yocimbaluku oku vanja, kuenje kilu lieve kua kamuha.

¹⁴ Kosãi yavali keteke liakui avali lepanduvali kosãi oco osi ya kukuta.

¹⁵ Suku ya wa popia la Noha hati,

¹⁶ Tundamo vocimbaluku, ove, lukãi wove, lomãla vove, lakãi vomãla vove;

¹⁷ loviendalomuenyo viosi okuti ovinyama viosi vi kasi love, lolonjila, lovinyama viovimbo, lovipuka viosi vi likoka posi, tundila lavio kumue; vi licitile kilu lieve, vi linge ombuto loku siata kilu lieve.

¹⁸ Noha yu wa tundamo kumue lomãla vaye, lukãi waye, lakãi vomãla vaye.

¹⁹ Ovinyama viosi lovipuka viosi lolonjila viosi, cosi ci ñuala ñuala kilu lieve, via tunda vocimbaluku ndapata avio.

²⁰ Noha yu wa tunga utala wa Yehova, kuenje wa nola kovinyama viosi via yela lokolonjila viosi via yela, ha lumbi ovilumba vioku pia elisi kutala.

²¹ Eci Yehova a yeva elemba li pepa oco Yehova wa litana lutima hati, Si siñala vali osi oku yi siñalela omunu, momo ovisimĩlo viutima womunu vi kasi ño civi tunde kutila waye; loviendalomuenyo viosi si vi yambula vali ndeci nda linga.

²² Osimbu yosi oluali lu kasi ka ku pumbi oku kũla loku ungula, lombambi lowuya, londombo lokuenye, lutanya luteke.