EFETIKILO 7 - Embimbiliya - Bíblia Sagrada em Umbundu

¹ Yehova wa popia la Noha hati, Iñila vocimbaluku, ove lonjo yove yosi, momo nda mõla okuti vocitumbulukila cilo ove wukuesunga kokuange.

² Povinyama viosi via yela nolapo alume epanduvali, lolomange epanduvali; povinyama ka via yelele nolapo ño vivali vivali, ulume lomange yaco;

³ lolonjila viovusenge laviovo, alume epanduvali lolomange epanduvali, oku popela ombuto yavio kilu lieve liosi.

⁴ Momo pa kamba oloneke epanduvali oco ndokisa ombela kilu lieve akui akuãla kovotanya lakui akuãla kovoteke si nyõli kilu lieve oviluvo viosi nda lulika.

⁵ Noha wa linga cosi co sapuila Yehova.

⁶ Noha wa tẽla ovita epandu kanyamo eci etande liovava lieya kilu lieve.

⁷ Oco Noha wa iñila vocimbaluku kumue lomãla vaye valume, lukãi waye, lakãi vomãla vaye, ha va puluka ketande.

⁸ Kuenda ovinyama via yela lovinyama ka vio yelele lolonjila lovipuka viosi vi likoka posi;

⁹ vivali vivali via iñila la Noha vocimbaluku, ulume lomange ndeci Suku a sapuila Noha.

¹⁰ Eci oloneke epanduvali via pita etande lieya kilu lieve.

¹¹ Kunyamo wovita epandu komuenyo wa Noha kosãi yavali keteke liekui lepanduvali kosãi, eteke liaco halio, olono viosi viokalunga kanene via tuika lapangu okilu a yuluka.

¹² Kuenje ombela ya kala kilu lieve akui akuãla kovotanya lakui akuãla kovoteke.

¹³ Eteke liaco hailio Noha a iñila vocimbaluku kumue la Semi la Hama kuenda Yafete, omãla va Noha, kuenda ukãi wa Noha, lakãi vomãla vaye vatatu,

¹⁴ ovo muẽle kuenda ovinyama viosi viovusenge ndapata avio, lovinyama viosi viovimbo ndapata avio, lapuka osi a likoka posi ndapata avio, lolonjila viosi ndapata avio, otunjila tuosi tuiñi tuiñi.

¹⁵ Kuenje via iñila la Noha vocimbaluku vivali vivali, oviendalomuenyo viosi vi kasi lefuimo liomuenyo.

¹⁶ Evi via iñila via kala ulume lomange koviendalomuenyo viosi ndeci co sapuila Suku; kuenje Yehova wo yikilamo.

¹⁷ Etande liaco lia kala kilu lieve akui akuãla koloneke; ovava aco a futuka, a yelula ocimbaluku kuenje ca tunda posi, ca telela kilu liovava.

¹⁸ Ovava a piãla a lua enene kilu lieve ndokuti ocimbaluku ca telela kilu liovava.

¹⁹ Kuenje ovava a piãla cakahandangala kilu lieve; olomunda viosi visõvisõvi vi kasi vemẽhi lilu liosi, viosi via takatamo.

²⁰ Ekui liovikeya kovikeya vitãlo kilu ovava a piãlako kuenje olomunda via takatamo.

²¹ Oviendalomuenyo viosi via ñuala ñuala posi via fa, lolonjila lovinyama viovimbo lovinyama viovusenge lovipuka vi likoka posi, kuenda omanu vosi;

²² cosi ca kaile lefuimo liofela yomuenyo vanyulu ca fa.

²³ Oviendalomuenyo viosi via kaile kilu lieve via kunduka, lomanu lovinyama viovimbo lapuka lolonjila viovusenge, via kunduka kilu lieve; kua siala lika Noha lava va kala laye vocimbaluku.

²⁴ Kuenje ovava a kala kilu lieve ocita coloneke kakui atãlo.