EFETIKILO 6 - Embimbiliya - Bíblia Sagrada em Umbundu

¹ Eci omanu va fetika oku lua kilu lieve kuenje kokuavo kua citiwa omãla vakãi,

² oco omãla va Suku valume va mõla omãla vomanu vakãi okuti va posoka, kuenje va nola oku kuela ava va sola ca velapo.

³ Yehova yu wa linga hati, Espiritu liange ka li ka kale ño-o hũ vomunu, momo eye ukuetimba; oloneke viaye puãi vi tẽla ocita canyamo kakui avali kanyamo.

⁴ Koloneke viaco kua kaile ovindululu kilu lieve, lokovaso yaco haico, eci omãla va Suku valume va litokeka lomãla vomanu vakãi kuenje va cita lavo omãla. Ovo haivo olonoi vina viosiahũlu kuenda haivo ovalume va kemãla.

⁵ Yehova yu wa mola okuti uvi womanu wa lova kilu lieve, lovisimĩlo viosi vi simaiwa vovitima viavo via viha ño oloneke viosi.

⁶ Oco Yehova Suku wa livela omo a lulika omunu kilu lieve; co vala vutima.

⁷ Kuenje Yehova wa popia hati, Ndi nyõla omanu nda sovola oco va tunde kilu lieve; lomunu locinyama lapuka lolonjila viovusenge, cosi nda ci nyõla momo nda livela omo nda ci sovola.

⁸ Noha puãi wa sanga ohenda ku Yehova.

⁹ Alo o-o apata a Noha. Eye Noha ukuesunga, haeye wa pua evelo koloneke viaye. Noha wa endaenda la Suku.

¹⁰ Kuenje Noha wa cita omãla vatatu valume, Semi, Hama la Yafete.

¹¹ Oluali lua vĩha ku Suku, hailuo lue Yuka letombo.

¹² Suku yu wa vanja voluali kuenje wa limbuka okuti mua vĩha momo oviendalomuenyo viosi via vĩhisa onjila yavio yokilu lieve.

¹³ Suku wa popia la Noha, hati, Nda likapela muẽle oku nyõla oviendalomuenyo; momo oluali lue yuka letombo liavio; ocili ndi vi nyolela kumue loluali.

¹⁴ Litungila ocimbaluku lovinendele; vokati kocimbalaku tepamo otuhondo; ci laña vokati lokoñoño lekokoto.

¹⁵ O ci tunga ndomo; usõvi wocimbaluku ovita vitatu kovikeya, upati waco akui atãlo kovikeya, oku lepa kuaco kuovilu akui atatu kovikeya.

¹⁶ Kapa onjanela vocimbaluku, yi litepe locimbimbi eci ca soka lukeya. Kapa epito vonele yocimbaluku; ci tunga lolosapalo vitatu.

¹⁷ Momo ame ndokisa kilu lieve etande liovava; nyõla oviendalomuenyo viosi vi kasi lefuimo liomuenyo vemẽhi lilu; cosi ci kasi kilu lieve ci fa.

¹⁸ Puãi ñolisila kokuove ocisila cange, oco wiñila vocimbaluku, ove lomãla vove valume, lukãi wove, lakãi vomãla vove.

¹⁹ Oco koviendalomuenyo viosi wiñisa vocimbaluku vivali vivali oku popela ovimuenyo viavo kumue love, ndokuti ulume lomange.

²⁰ Kolonjila ndapata avio, kovinyama viovimbo ndapata avio, kovipuka viosi vioposi ndapata avio, vivali vivali kolombuto viosi viñile love, oku popela ovimuenyo viavio.

²¹ Pongiyavo ovilia viosi va vi lialia, loku vi soleka hã ha vi lingi ovilia viove kuenda viavio.

²² Haico Noha a linga; cosi co sapuila Suku oco a linga.