EFETIKILO 50 - Embimbiliya - Bíblia Sagrada em Umbundu

¹ Yosefe yu wa nyoñamela kocipala ca isiaye, wa lila ca lua, kuenje wo sipula.

² Oco Yosefe wa tuma akuenje vaye vakuavihemba oku itila ovihemba ketimba lia isiaye okuti ka li voli. Kuenje vakuavihemba va itila ovihemba ketimba lia Isareli.

³ Ca tambula akui akuãla koloneke, momo ovio oloneke vi tambula ovihemba viaco. Kuenje ve Egito vo lila akui epanduvali koloneke.

⁴ Eci oloneke vioku lila via pita, Yosefe wa popia la vakuelombe lia Fareo hati, Nda ci tava ndingi ohenda, sapuili Fareo hoti,

⁵ Tate wa ñisika oku lisila laye hati, Ame ndopo fa, veyambo liange nda fẽla vofeka ya Kanana omo o ka ñenda. Oco cilo nda pinga okuti o ngeca ha kende tate, oco njiya vali.

⁶ Oco Fareo wa kumbulula hati, Lamanẽlako ño, ka kende so, ndomo a ku usika.

⁷ Yosefe yu wa lamana oku ka kenda isiaye. Akuenje va Fareo vosi vo sindikila, ovakulu vonjo yaye, lovakulu vosi vovofeka ye Egito,

⁸ la vakuanjo ya Yosefe vosi, la vamanjaye la vakuanjo ya Isiaye. Otumãla tuavo lika tua siala vofeka ya Gosene, lolomeme viavo kuenda olongombe.

⁹ Akãlu o sindikilavo la vakuatuvalu, kuenje va linga endo linene.

¹⁰ Eci va pitila kocimbandi ca Atade ci kasi kesinya lia Yordão, oco va siakãla onambi, va lila ca lua. Yosefe wa lila isiaye oloneke epanduvali.

¹¹ Eci olonungi viofeka ya Kanana via mõla okulila kuaco kocimbandi ca Atade, oco via linga viti, Okulila kuaco kua lua ndoto kua va Egito. Oco va lukila onduko yaco Havele-Misirami; li kasi kesinya lia Yordão.

¹² Kuenje omãla vaye va linga laye ndeci a va sapuila.

¹³ Omãla vaye vo nena vofeka ya Kanana, kuenje vo kenda veleva li kasi vusenge wa Makapela kutundilo wa Mamire. Eleva liaco Avirahama wa li landa kumue lusenge ha li lingi ovilangu. Wa li landa ku Efirone u Hiti.

¹⁴ Eci va mala oku kenda isiaye, oco Yosefe la vamanjaye lomanu vosi vana vo sindikila oku kenda isiaye, vosi va tiukila ke Egito.

¹⁵ Eci vahuva a Yosefe va limbuka okuti isiavo wa fa, va linga vati, Mbi Yosefe o tu suvuka kuenje o tu fetuluinya ohali yosi tuo talisile.

¹⁶ Oco va tuma ondaka ku Yosefe vati, Osimbu so ka file wa tusika hati,

¹⁷ Sapuili Yosefe hoti, Nda pinga okuti wecela ahuku a vahuvove, lekandu liavo, va ku lingile muẽle lãvi. Oco cilo etu tua livondela kokuove tuti, Ecela ekandu liakuenje va Suku ya so. Yosefe wa lila eci wa vangula laye.

¹⁸ Vahuvaye veya kokuaye, va wila posi, vo fendela vati, Etu tuvakuenje vove.

¹⁹ Yosefe wa popia lavo, hati, Ko ka yokoki, ame nga nda linga Suku?

²⁰ Ene muẽle wa similili ũvi, Suku puãi wo pongolola uwa, oco etaili kuli omanu va lua va kasi lomuenyo omo va popeliwa.

²¹ Oco ko ka kuati usumba. Ene muẽle lotumãla tuene ame ndu tekuli. Oco wa tulumula ovitima viavo kuenje wa va kolisa.

²² Yosefe yu wa tunga ve Egito, eye lepata lia isiaye; kuenje Yosefe wa kala lomuenyo ocita canyamo kanyamo ekui.

²³ Yosefe wa mõla omãla va Efarimi toke kepata liatatu; lomãla va Makiri omõla a Manase va citiwila kolongolo via Yosefe.

²⁴ Yosefe wa popia la vahuvaye hati, Ndopo fa, puãi suku u pasuli oku vu upa kofeka yilo, loku vu tuala kofeka a likuminya oku eca ku Avirahama la Isake kuenda Yakoba.

²⁵ Oco Yosefe wa likuminya lomãla va Isareli hati, Suku u pasuli muẽle, lene wambati akepa ange oku tunda lao kulo.

²⁶ Yosefe yu wa fa. Wa kala locita canyamo lanyamo ekui eci a tula omuenyo. Kuenje vo witila ovihemba, vo kapa vocikasia ve Egito.