EFETIKILO 49 - Embimbiliya - Bíblia Sagrada em Umbundu

¹ Yakoba yu wa kovonga omãla vaye, wa popia lavo hati, Liongololi okuti ndu sapuili eci cu sangi kovaso.

² Likongeli pamosi, yeveleli, amãla va Yakoba, yeveleli isiene Isareli.

³ A Ruvene, ove vunuñulu yange, wulohõlo viange, haive tete kongusu yange, wucimalomata kulamba, wucimalomata kunene.

⁴ O feloka ndovava, ku kuata umalomata momo wa londa lolohaku kula wa so; wo vĩhisa, wa londa kula wange!

⁵ Simeone la Lewi vamanji; olosipata viavo ovimãleho viungangala.

⁶ Otima wange, ku ka iñile vongombo yavo! Konyeño yavo va ipa omanu, kocipange cavo va teta akanja olongombe.

⁷ Onyeño yavo yi siñaliwe momo ya feluka enene; kuenda ocikumbiti cavo, momo ci kangisa omanu! Ndi va tepisa ku Yakoba. Ndi va sandola ku Isareli.

⁸ A Yuda, ove muẽle vahuvove va ku sivaya. Eka liove li kuata kakosi ovanyãli vove. Omãla va so va ku fendela.

⁹ Yuda eye eyove liohosi. Amõlange, wa lia epulukutu, kuenje wa tunda. Wa kukuva, wa yomba ndohosi, pamue ndomange yohosi. Eli u pindula?

¹⁰ Ombueti yonanelo ka yi tundi ku Yuda, ndaño onganji kovitumbulukila viaye, toke Ukuambembua iya, kuenje omanu va pokola kokuaye.

¹¹ O pandekela okacimbulu kaye kuyuva, lomõla ocimbulu caye kuyuva wa fina, o sukula olonanga viaye vovinyu luwalo waye vosonde yuyuva.

¹² Ovaso aye a kusuka lovinyu. Ovayo aye a yela lasenjele.

¹³ Sevulono eye o tunga ketapu liokalunga O linga etapu liolonaviyu. Ongave yaye yi kala ko Sitono.

¹⁴ Yisakare eye ocimbulu ca pama, o pekela pokati kovimanga violomeme.

¹⁵ Wa mõla ocipuyukilo okuti ciwa, lofeka okuti ya posoka, yu wa petamisila ocitai oku ambata. Wa linga ukuenje kupange wutolongo.

¹⁶ Dani eye o tetuluila omanu vaye muẽle. O kuata epata pokati kapata a va Isareli.

¹⁷ Dani o linga ombandanjila vonjila, pamue ombuta pelila, yi lumana kakonjo okavalu kuenje u endelako o kupukila konyima.

¹⁸ Eyovo liove, a Yehova, nda limbila ovaso.

¹⁹ Gadi eye o pundiwa la vakuakupunda, puãi o va ñualisapo kuenje o va lupuisa.

²⁰ Asere eye o lialia okulia ku sosa, kovapia aye ku tunda okulia kuolosoma.

²¹ Nafitali eye ohoha yi liendela, haiyo yi cita cita omãla va posoka.

²² Yosefe eye ocanja cimaima epako, ocanja cimaima epako konele yono. Ovianja viawo vi yandela kocimbaka.

²³ Vakualohonji vo yambula enene, vo wasa lovisongo, vo fukĩlisa.

²⁴ Haimo ohonji yaye ya mia longusu, lovoko aye a kolisua, a kolisua lovaka Ukuonene wa Yakoba kuenda londuko yungombo, haeye Ewe lia Isareli,

²⁵ a kolisua la Suku ya so, una o ku kuatisa, a kolisua la Suku Ukuonenewosi. Eye o ku sumũluisa lesumũluho liombela yi tunda kilu kuenda vali lesumũluho liatumu ovava a tunda posi, o ku sumũluisa koku cita lo koku tekula.

²⁶ Asumũluho a so, ana a velapo okuti asumũluho a sangiwa kolomunda ka vi sondoloaka, a sule, ndaño asumũluho a tunda koviwulu ka vi pui; asumũluho aco o-o a kale kutue wa Yosefe, hao a futise undeti wa tepiwa ku vahuvaye.

²⁷ Benjamini eye ombinji yepulukutu. Omẽle o lia eci ca kuatiwa, oñolosi anjela eci ca pundiwa.

²⁸ A o-o apata osi ekui la avali a Isareli; kuenje ondaka eyi oyo a vosika isiavo eci a va sumũluisa, omunu lesumũluho liaye, omunu lesumũluho liaye, oco a va sumũluisa.

²⁹ Wa vosika hati, Ame ndi likongela la vakuepata lietu, ñendi kumue lolosekulu viange veleva li kasi vepia lia Efirone u Hiti,

³⁰ veleva li kasi vusenge wa Makapela kutundilo wa Mamire, vofeka ya Kanana; hailio Avirahama a landa kumue lusenge ku Efirone u Hiti ha li lingi ovilangu viaye.

³¹ Omo va kenda Avirahama lukãi waye Sara; haimo wa kenda Isake lukãi waye Rebeka; haimo nda kenda Lea.

³² Usenge waco leleva li kasimo via landiwa ku va Hiti.

³³ Eci Yakoba a mala oku usika omãla vaye oco wa pungika ovolu aye vula, kuenje wa tula omuenyo, wa kongeliwa ku vakuepata liavo.