EFETIKILO 48 - Embimbiliya - Bíblia Sagrada em Umbundu

¹ Kovaso yaco va sapuila Yosefe vati, Ota, so o vela. Yu wa endako lomãla vaye vavali, Manase la Efarimi.

² Kuenje va sapuila Yakoba vati, Tala, omõlove Yosefe weya. Oco Isareli wa likolisila, wa tumãla vula.

³ Yakoba yu wa popia la Yosefe hati, Suku Ukuonenewosi wa nukulukila ko Lusi kofeka ya Kanana, wa sumũluisa,

⁴ kuenje wa popia lame hati, Tala, ame hu citaisa, hu luisa, hu lingisa ohongele yapata. Ngeca ofeka eyi kombuto yove yu ku kuãi, yi linga ocitungilo cavo ka ci pui.

⁵ Cilo omãla vove vavali valume wa citila vofeka ye Egito osimbu sieyile kokuove ke Egito, omãla vange muẽle. Efarimi la Manase va linga omãla vange nda Ruvene la Simeone.

⁶ Omãla vove o va cita kovaso yavo ovo vove. Va tukuiwa londuko yavamanjavo kocipiñalo cavo.

⁷ Momo eci nda tunda ko Padana oco Rahele wa fila vofeka ya Kanana konjila eci pa kamba ño naito oku pitila ke Efarata. Ndo kenda kuna konjila yo ke Efarata, haiko ko Beteleme.

⁸ Eci Isareli a mõla omãla va Yosefe, wa pula hati, Velie ava?

⁹ Oco Yosefe wa sapuila isiaye hati, Ava ovo omãla vange Suku a nyihila kulo. Oco wa linga hati, Veye kulo kokuange okuti ndi va sumũluisa.

¹⁰ Ovaso a Isareli a vuvula omo a kuka, ka tẽla vali oku vanja. Oco Yosefe wa vamisa kokuaye, kuenje eye wa va kuata loku va sipula.

¹¹ Isareli wa popia la Yosefe hati, Sia simile okuti eteke ha mõla vali ocipala cove. Cilo Suku wa mbanjisa omãla vove.

¹² Oco Yosefe wa vopako kolongolo viaye, kuenje wa petamela posi.

¹³ Oco Yosefe wa va kuata kavali kavo, Efarimi kondio yaye, kepĩli lia Isareli; Manase kepĩli liaye kondio ya Isareli, kuenje wa va tuala ocipepi laye.

¹⁴ Isareli wa siũla eka liaye liondio, wa li kapa kutue wa Efarimi umãlehe waco, leka liaye liepĩli wa li kapa kutue wa Manase oku pinyanyuisa ovaka aye. Wa ci linga ocipango momo Manase eye nuñulu.

¹⁵ Yu wa sumũluisa Yosefe hati, Suku una olosekulu viange Avirahama la Isake via endaila volonjila viaye, haeye Suku wa songuila omuenyo wange wosi toke ketaili lilo,

¹⁶ haeye ungelo wa njovola kevĩho liosi, eye a sumũluise amãlehe ava; londuko yange yi tumbuluiwe lavo, ndaño olonduko violosekulu viange, Avirahama la Isake. Va linga muẽle owiñi kilu lieve.

¹⁷ Eci Yosefe a mõla okuti isiaye wa kapa eka liaye liondio kutue wa Efarimi, wa ci suvuka, yu wa yelula eka lia isiaye oku li sondolola kutue we Efarimi loku li kapa kutue wa Manase.

¹⁸ Yosefe wa popia la isiaye hati, Oco hacoko a tate; ulo nuñulu, kapa eka liove liondio kutue waye.

¹⁹ Isiaye yu wa likala hati, Ndi ci, amõlange, ndi ci. Leyevo o linga epata, leyevo o kemãla, haimo lumue manjaye u velapo; ombuto yaye yi linga owiñi wolofeka.

²⁰ Oco wa va sumũluisa eteke liaco hati, Va Isareli va lisumũluisa love vati, Suku a ku lingise nda Efarimi kuenda nda Manase; ca lomboloka okuti wa velisapo Efarimi, Manase ci sule.

²¹ Isareli wa popia la Yosefe hati, Tala, ndopo fa puãi Suku o kala love ha ku tiuwiya kofeka yolosekulu viove.

²² Kuenda vali usenge wa Sekeme, una nda kuata peka lia va Amori losipata yange lohonji yange, nda weca kokuove, ku vahuvove hakoko.