EFETIKILO 47 - Embimbiliya - Bíblia Sagrada em Umbundu

¹ Oco Yosefe weya kuenje wa sapuila Fareo hati, Tate la vahuvange va kaile ko Kanana kaliye veya. Veya lolomeme viavo lolongombe viavo, lovina viavo viosi. Cilo vava vofeka ya Gosene.

² Pokati ka vahuvaye wa nolapo alume vatãlo oku va lekisa ke Fareo.

³ Fareo wa pula vahuvaco hati, Upange wene we? Ovo va sapuila Fareo vati, Upange wetu wungombo tunde kolosekulu vietu.

⁴ Va sapuilavo Fareo vati, Tueyilila oku kala vofeka yilo momo vofeka ya Kanana ka muli owangu woviunda viakuenje vove omo elambu lia piãla li kasimo. Oco cilo tua pinga okuti akuenje vove va tunga vofeka ya Gosene nda ci tava.

⁵ Fareo wa popia la Yosefe hati, So la vahuvove veya kokuove.

⁶ Ofeka ye Egito yeyi peka liove. Tungisa so la vahuvove vofeka ya velapo, va tunge ño vofeka ya Gosene. Nda pokati kavo pali ava va tẽla ciwa upange wungombo, ka va kape vakapusu kovinyama viange.

⁷ Oco Yosefe wa nena isiaye Yakoba kuenje wo lekisa ku Fareo. Yakoba yu wa sumũluisa Fareo.

⁸ Fareo wa pula Yakoba hati, Oloneke vianyamo omuenyo wove viñami?

⁹ Yakoba wa kumbulula Fareo hati, Oloneke vianyamo ungende womuenyo wange ocita lakui atatu kanyamo. Oloneke vianyamo omuenyo wange vitito, haivio vĩvi, kuenje ka via sokele loloneke vianyamo ovimuenyo violosekulu viange, okuti oloneke viokutuñayala kuavo.

¹⁰ Yakoba yu wa sumũluisa Fareo, kuenje wa tunda.

¹¹ Oco Yosefe wa tungisa isiaye la vahuvaye, wa va iha ocitumãlo vofeka ya Ramesese, oyo onele ya velapo yofeka yosi ye Egito. Wa linga ndomo Fareo o sapuila.

¹² Kuenje Yosefe wa tekola isiaye, la vahuvaye, lonjo yosi ya isiaye, ndeci ca soka lapata avo.

¹³ Vofeka yosi ka mua kaile okulia, kuenje elambu lia lua enene, oco ofeka ye Egito lofeka ya Kanana via kala cĩvi, elambu liaco lia lua.

¹⁴ Yosefe wongolola olombongo viosi via kala vofeka ye Egito lovofeka ya Kanana, vina omanu va landa landa lavio okulia keunje Yosefe wa tuala olombongo viaco viosi ku Fareo.

¹⁵ Eci olombongo viosi viofeka ye Egito levi viofeka ya Kanana via pua, oco va Egito vosi veya ku Yosefe vati, Tu avele okulia. Tu fila nye love haipo o kasi? Momo olombongo vietu via pua.

¹⁶ Yosefe wa kumbulula hati, Nda olombongo via pua, neni ovinyama viene, oco ndu waveli okulia lovinyama viene.

¹⁷ Oco va nenela Yosefe ovinyama viavo, kuenje Yosefe wa va iha okulia. Va nena otuvalu tuavo loviunda violomeme loviunda violongombe lovimbulu kuenje Yosefe wa va iha okulia ulima waco londando yovinyama viavo viosi.

¹⁸ Eci ulima waco wa pita oco veya vali kokuaye ulima wavali, va popia laye vati, Ka tu kembi ku cime cetu. Olombongo vietu via pua, loviunda viovinyama vi kasi ku cime cetu. Ove u cime cetu, o lete okuti lacimue vali tua siala laco te atimba etu lovapia etu.

¹⁹ Etu lovapia etu, tu fila nye, love haipo o kasi? Tu lande, etu lovapia etu, o tu ihe okulia. Oco etu lovapia etu tu linga apika va Fareo. Tu ihe vali ombuto okuti tu kala lomuenyo, ka tu fi, lovapia etu ka a lingi vali ovipembe.

²⁰ Oco Yosefe yu wa landa ovapia osi o ke Egito ha a lingi a Fareo, momo va Egito va landisa, omunu epia liaye, omunu epia liaye, omo onjala ya lua. Cilo ofeka ya linga ya Fareo,

²¹ lomanu vaco va linga apika vaye tunde apa pa fetikila ofeka toke apa ya sulila.

²² Ovapia ovitunda lika o-o ka landele. Omo ovitunda via tambola ongaso ku Fareo, kuenje via litekola longaso ya va ihaiha Fareo, oco ka via landisile ovapia avo.

²³ Oco Yosefe wa popia lomanu hati, Ota, etali ndo landi ene lovapia ene ho lingi apika va Fareo. Cilo tambuli ombuto, limi ovapia.

²⁴ Poku ungola, weci onepa yatãlo ku Fareo. Lolonepa vikuãla viene ovio vi linga ombuto yovapia, lokulia kuene, lokulia kuava va kasi volonjo viene, lokulia kuotumãla tuene.

²⁵ Ovo vati, A cime cetu, wa tu muisa omuenyo. Cilo tu linge ohenda okuti tu kala apika va Fareo.

²⁶ Oco Yosefe wa ci kapa ndocihandeleko cofeka ye Egito, kuenje toke etali lilo ci kasi, cokuti onepa yatãlo oyo ya Fareo. Ovapia ovitunda o-o lika ka a lingile a Fareo.

²⁷ Va Isareli va tunga vo Gosene vofeka ye Egito, va fukilamo, kuenje va licita, va lova cimue.

²⁸ Yakoba wa kala vofeka ye Egito ekui lialima kalima epanduvali; oco oloneke vialima omuenyo wa Yakoba via tẽla ocita lakui akuãla kanyamo kanyamo epanduvali.

²⁹ Eci Isareli a limbuka okuti ndopo o fa, oco wa kovonga omõlaye Yosefe, wa popia laye hati, Nda nda sanga ohenda kokuove, kapa eka liove pemehi liocikalo cange. Likuminya locili oku ndinga ciwa. Ku ka ñende ve Egito,

³⁰ puãi ñende apa pali olosekulu viange. Ngambate kofeka ye Egito, nuale kovilangu viavo loku ñendako. Yosefe wa popia hati, Ndinga ndeci wa popia.

³¹ Isareli wa linga hati, Liñuminye yapa; kuenje wo likuminya. Isareli yu wa kunamela konondovitue yula.