EFETIKILO 46 - Embimbiliya - Bíblia Sagrada em Umbundu

¹ Oco Isareli wa katuka, wa enda la cosi a kala laco, yu weya ko Bereseva kuenje wa lumbila Suku ya isiaye Isake ovilumba.

² Suku wa popia la Isareli vovinjoinjoi viuteke hati, A Yakoba, a Yakoba! Eye hati, Ame ulo.

³ Oco wa linga hati, Ame Suku, ndi Suku ya so. Ku ka yokokele oku lokila ke Egito, momo oko hu lingisila ofeka yinene.

⁴ Ame ngenda love toke ke Egito, haime hu tiula vali; lovaka a Yosefe a viula ovaso ove.

⁵ Yakoba yu wa tunda ko Bereseva. Omãla va Isareli vambatela isiavo Yakoba lotumãla tuavo lakãi vavo vakãlu Fareo a tuma oku wambatelamo.

⁶ Vambatavo ovinyama viavo lukuasi va fukila vofeka ya Kanana; veya ke Egito, eye Yakoba lepata liaye liosi, okuti

⁷ omãla vaye valume lolonekulu viaye vialume, lomãla vaye vakãi, lolonekulu viaye viakãi via citiwa lomãla vaye valume. Epata liaye liosi wa enda lalio ke Egito.

⁸ Olonduko viomãla va Isareli veya ke Egito vievi, Yakoba lomãla vaye; Ruvene eye nuñulu ya Yakoba.

⁹ Omãla va Ruvene vava; Hanoke, Falu, Hecirone la Karimi.

¹⁰ Omãla va Simeone vava: Yemuele, Yaminu, Ohada, Yakina, Cohara la Saulu eye omõla ukãi u Kanana.

¹¹ Omãla va Lewi vava: Gerisiono, Kohata, la Merari.

¹² Omãla va Yuda vava: Ere, Onane, Sela, Perese la Seraye. Ere la Onane ovo va fila vofeka ya Kanana. Omãla va Perese ovo Hasoroni la Humuli.

¹³ Omãla va Yisakare vava: Tola, Puva, Yovi, la Simironi.

¹⁴ Omãla va Sevulono vava: Serede, Eloni la Yahilele.

¹⁵ Ovo omãla va Lea valume a citila la Yakoba ketapi li Arama kuenda omõlaye ukãi Dina. Ovimuenyo viosi viomãla vaye valume lomãla vaye vakãi va tẽla akui atatu la vatatu.

¹⁶ Omãla va Gadi vava: Sifoni, Hagi, Ecibone, Eri, Arodi, kuenda Areli.

¹⁷ Omãla va Asiere vava: Yimena, Yisiba, Yisivi, Beriya, la Seraye mukãi wavo. Omãla va Beriya vava: Heveru, la Malakiyeli.

¹⁸ Ovo omãla va silipa u Lavane a eca komõlaye Lea, avandeti wa cita ku Yakoba ekui lioviumenyo lepandu.

¹⁹ Omãla va Rahele ukãi wa Yakoba, Yosefe la Benjamini.

²⁰ Yosefe kofeka ye Egito wa citilako Manase la Efarimi avandeti Asenate omõla a Potifera ocitunda ca Oni wa va cita laye.

²¹ Omãla va Benjamini vava: Bela, Bekare, Asifele, Gera, Namana, Ehi, Rosi, Mupimi, Hupimi la Aride.

²² Ovo omãla va Rahele va citiwa la Yakoba, ovimuenyo viosi ekui la vikuãla.

²³ Omãla va Dani vava: Husimi.

²⁴ Omãla va Nafitali vava: Yaciyele, Guni, Yesere, la Silemi.

²⁵ Ovo omãla va Biliha u Lavane a eca komõlaye Rahele, haivo a cita la Yakoba, vosi yavo epanduvali.

²⁶ Omanu vosi veya la Yakoba ke Egito, ava a licitila, okuti akãi volohueli vomãla va Yakoba havoko, omanu vaco vosi va tẽla akui epandu lepandu.

²⁷ Omãla va Yosefe, ava a citila ve Egito, vavali. Omanu vosi vonjo ya Yakoba veya ke Egito va tẽla akui epanduvali.

²⁸ Wa tuma Yuda okuti eye o livanga oku pitila ku Yosefe loku pula ndomo va enda ko Gosene; kuenje va pitila kofeka ya Gosene.

²⁹ Yosefe wa sokiya ekãlu liaye kuenje wa enda oku ka ñualehela la isiaye Isareli ko Gosene. Wa limõlehisa kokuaye, wa petamẽla kosingo yaye, wo kuata loku lila ca lua.

³⁰ Isareli yu wa popia la Yosefe hati, Cilo omo nda mõla ocipala cove, kuenje nda kuliha okuti haimo o kasilili lomuenyo, ndaño ndi fa, si fi vali lesumuo.

³¹ Oco Yosefe wa popia la vahuvaye, lonjo yosi ya isiaye hati, Ngenda ha sapuila Fareo. Mopia laye siti, Vahuvange lonjo ya tate va kaile vofeka ya Kanana veya kokuange.

³² Alume vaco ovangombo, ya lisa lisa ovinyama, veya lolomeme viavo lolongombe viavo la cosi cavo.

³³ Eci Fareo a vu kovonga, kuenje u puli hati, Upange wene we?

³⁴ ene vu kumbulula hoti, Akuenje vove vakuakulisa ovinyama tunde kutila wetu toke cilo, letu lolosekulu vietu, —okuti vu tunga vofeka ya Gosene; momo wosi ungombo o pembuiwa la va Egito.