EFETIKILO 40 - Embimbiliya - Bíblia Sagrada em Umbundu

¹ Noke, eci pa pita oloneke vimue, oco kalei kovinyu viosoma ye Egito kuenda kalei kolombolo, va temisa cime cavo, osoma ye Egito.

² Soma Fareo wa temela akuenje vaye velombe, kavali kavo, okuti kalei ka vakuavinyu la kalei ka vakualombolo.

³ Yu wa va yikila vonjo ya kesongo liakuenje velombe, vokayike muna mua yikiluavo Yosefe.

⁴ Kesongo liakuenje velombe wa va kundika ku Yosefe kuenje eye wa va vumba. Va kala vokayike oloneke vimue.

⁵ Uteke umue, eci va kala vokayike, oco kavali kavo, kalei kovinyu kuenda kalei kolombolo, va lota olonjoi, omunu lonjoi yaye, omunu lonjoi yaye; onjoi lonjoi yi kuete elomboluilo liayo.

⁶ Omẽle eci Yosefe a iñila vohondo yavo wa va sanga va nyumãla.

⁷ Oco wa pula vakalei va Fareo va kala laye vokayike vonjo ya cime caye hati, Ovipala viene via nyumãlela nye etali?

⁸ Vo kumbulula vati, Tua lota olonjoi kuenje ka kuli umue o tẽla oku tu vi lomboluila. Yosefe wa popia lavo hati, Ha Sukuko hẽ o kasi lalomboluilo? Va vi sapuile ño.

⁹ Oco kalei ka vakuavinyu wa sapula onjoi yaye ku Yosefe hati, Konjoi yange nda mõla uyuva.

¹⁰ Kuyuva waco kua kala ovianja vitatu; tuli wa kula haico olonẽleho viawo via temũla, lovisiakata viawo via ima ayuva.

¹¹ Okopo ya Fareo ya kala peka liange. Ame nda yunga ayuva, nda kamẽla vokopo ya Fareo, nda eca okopo peka lia Fareo.

¹² Yosefe wa popia laye hati, Elomboluilo liaco lieli: ovianja viaco vitatu oloneke vitatu.

¹³ Pokati koloneke vitatu oco Fareo o petula utue wove ha ku tiuwiya vali kukalei wove, hu eci okopo ya Fareo peka liaye ndeci wa tuwile ale eci wa kala kalei kaye kovinyu.

¹⁴ Puãi ndo njivaluke eci o kala vali ciwa. Ndinge ohenda, nukule ku Fareo, oco o njupe vonjo yilo.

¹⁵ Momo va njiva vofeka ya va Heveru; kulo lakovo sia lingile cimue okuti nda va ñapa vocitunu cilo.

¹⁶ Eci kalei ka vakualombolo a yeva okuti elomboluilo liaco liwa, oco wa popia la Yosefe hati, Lamevo nda lota onjoi yange yokuti, nda ambata kutue wange olombango vitatu violombolo.

¹⁷ Vombango yokilu mua kala ovilia via lua via yokiwa, via Fareo, puãi olonjila via vi sokoluila vombango kutue wange.

¹⁸ Yosefe wa tambulula hati, Elomboluilo liaco lieli: olombango vitatu ovio oloneke vitatu.

¹⁹ Pokati koloneke vitatu Fareo o ku teta utue, loku ku nyoñamisa kuti, kuenje olonjila vi sokolola ositu ketimba liove.

²⁰ Keteke liatatu, hailio eteke liulima wa Fareo, Fareo wa lingila akuenje vaye vosi ofesta, yu wa pandulula kalei ka vakuavinyu kuenda kalei ka vakualombolo ha veya pokati kakuenje vaye.

²¹ Oco wa tiuwiya vali kalei ka vakuavinyu kupange waye wolokopo, kuenje wa eca okopo peka lia Fareo.

²² Puãi kalei ka vakualombolo wo nyoñamisa ndeci ca va lomboluila Yosefe.

²³ Haimo kalei ka vakuavinyu ka ivalukile Yosefe, wa wivala muẽle.